YUNIRÜBO RHIMO 15 - AMÜSÜH HÜM CL Bible (BSI)

Jirusalem ching Mukhungkhi

¹ Tüshe mihtsürü khürü Judea chingnü akibah keoniorübo ki, “Mosa yakzan yande nüsa tsütamübahsho, nüsa mükhümkhitkhuk,” de thsangyude alakheah.

² Ha hode Paul le Barnaba bünenü arü ki atsangachihpü kam. Jumonü ha keokhikhi dünkheaknü Jirusalem ching wutubah amüsüh-thsangyurü le azothsürübo shorupü akinrübo püpürü lungnü Paul tüsho Barnaba ane mokhit.

³ Jumonü borünü ane limro ching yüshihkhi nangde khiungkerü mulong müthrikhi thiyusheak jihde Phoenikia tüsho Samaria hode yü, tüsho ha yusheaknü keoniorü alala khide asühshih.

⁴ Küyimki ane Jirusalem ching arükhea, borü tüsho amüsühthsangyurü le azothsürübonü ane leangkhi, tüsho Thrünpuhnü arü kheak rhimokhi alala thaa huh.

⁵ Tüshe akinrü khürü Pharisirü bolung berünü wusubah tha, “Khiungkerü tsütabahbeah tüsho Mosa yakzan zhimshihbeah.”

⁶ Amüsüh-thsangyurübo tüsho azothsürübonü ju lümakheahpü rukhüh mukhung.

⁷ Tüsho khide atsangachih dunglim, Peternü zhipbah arü ki tha, “Keoniorübo, khiungkerü ki thiyusheak atsü thsangyuthsangrade arünü sobah akinpü thsüde Thrünpuhnü adüsonü nüsa bolungnü I mokhitdo de nüsanü mükheahlah.

⁸ Mulong mükheahbuh Thrünpuhnü isa ki rhimokhi nangde Amüsüh Me jihde arü leangkhikhi huh;

⁹ tüsho apinü isa le arü dükeak tümü mübüthsüjih, tüshe akinnü arü mulong müsühjih.

¹⁰ Dale tümü thsükhi nüsanü isa jipürü yungsho isanü mühankhukkhi akinrübo düthsün kheak hah yihkihjihde Thrünpuh rükakipü mulongla?

¹¹ Arü nangde, Atungpuh Jisu amüthsüm hode isa khümkhitbah de isanü kinlah.”

¹² Tüsho amukhungrü alalanü zhikde la, tüsho Thrünpuhnü ane hode khiungkerü ki amüyinsahbe le khinthiyinbebo rhimokhi thiyusheak jihchoki arünü Barnaba tüsho Paul ki ani.

¹³ Anenü athakham dunglim, Jakobnü alo, “Keoniorübo, I ki aniang.

¹⁴ Thrünpuhnü arü bolungnü api mihtsürü thsüpü bea lude akhuhde khiungkerü rhuakheahkhi Simonnü thanaka huhdo.

¹⁵ Tüsho hanü wukihrübo yubo thrüta lakhi ayelah,

¹⁶ ‘Ha dunglim inü arholobah tüsho keama lakhi David lapung thsülobah; athsümünimkhi inü athsülobah tüsho inü ju laloshihbah,

¹⁷ junangde aningkhi mihtsürübo, I mung chingnü jia larü khiungkerünü Atungpuh yimbah,

¹⁸ adüsonü harü mükheahshihbuh Atungpuhnü thachoh.’

¹⁹ Jumonü I lümkhi ju, Thrünpuh kilim rholorü khiungkerü isanü küpkhuk müjihbeah,

²⁰ ju müthri isanü arü ki sangthsübo kilim kingaünkhi amümüsüh mütsühpü, müzammüram müyihbeakpü, tüsho athünitsahkhi shiwüh yungsho thiyih mütsühpü thrütbeah.

²¹ Tümütüsho Mosa yakzan ju adüsonü Amuni aban sinagogbo ching khede lah, tüsho api yubo kiuto aban ching thsangyuthsangrado.”

Khiungkerü Akinrübo kilim Kihüm

²² Judüki amüsüh-thsangyurübo tüsho azothsürübonü borü alala bede arü mihtsürü khürü Paul le Barnaba lung Antiok ching yüpü pungkhi. Arünü mihtsürü mahne keoniorü bolung limberübo lakhi Barsaba de ajikhi Juda tüsho Sila mokhit.

²³ Arü kheaknü kihüm ha mühah: “Keoniorübo, amüsüh-thsangyurübo tüsho azothsürübo, Antiok le Siria tüsho Kilikia ching lakhi khiungkerü kilim salüm.

²⁴ Isanü müthiyide isa bolungnü khürü wukhiukbah arü yu thakhinü nüsa lümkhi thsümünimde küpkhuk jihdo de isanü sodo.

²⁵ Jumonü mihtsürü khürü mokhitbah isanü amuzhokhi Barnaba tüsho Paul büne lungnü nüsa kilim arüshihpü isa alalanü mulong–

²⁶ Atungpuh Jisu Khrista thsungkheaknü rhangdung shuhmülanga jihrü mihtsürübo.

²⁷ Jumonü münnü ju ruk thiyusheak jihshihpü Juda le Sila büne nüsa kilim thiyichoh.

²⁸ Tümütüsho harü yihnüpü kheak hode nüsa kheak hahmülang ato müyihkihpü Amüsüh Me tüsho isa ki atsü lado:

²⁹ junangde nüsanü sangthsü kingaünkhi, thiyih, athünitsahkhi, tüsho müzammüram chingnü akümkangbah. Nüsanü harü chingnü tsokhide lasho tsüde arhimobah, tsüde laang.”

³⁰ Jumonü küyimki ane ayüshihkheanü Antiok ching yüki; tüsho boto rukhüh bemukhungbah anenü kihüm ju jih.

³¹ Tüsho küyimki ju khekhea, atuthsukyu ching arünü asühachih.

³² Juda tüsho Sila, wukihrübo a le thiyu ahihdonü keoniorübo tuthsukde düküngshih.

³³ Tüsho ju ching ane anükhüh mung dunglim, keoniorübonü salüm mühahbah arü thiyia arüshihrü kilim yüshih.

³⁴ Judüalalashe Silanü ju ching mungpü tsülah de lüm.

³⁵ Tüshe Paul le Barnaba a ane lung püpürü ahihdo thsürubah Atungpuh yu thsangyude tüsho thsangyuthsangrade Antiok ching mung.

Paul tüsho Barnaba Chamachihkhi

³⁶ Tüsho nimung anükhüh dunglim Paulnü Barnaba ki tha, “Arang, ikenü Atungpuh yu zhiyukpung kiuto aban ching keoniorübo küde lanü rhua kheahanü.”

³⁷ Tüsho Barnabanü arü lung Mark de ajikhi Johan bepü mulong.

³⁸ Tüshe shepü Pamphylia ching tuklobah arü lung rhimo ching müyükheanü Paulnü arü lung mübepü tsülah de lüm.

³⁹ Hanangde ane marüpachihkhinü chamachih; Barnabanü api lung Mark bebah sangkung chingnü Saipra lim yüabah,

⁴⁰ tüshe Paul a keoniorübonü Atungpuh amüthsüm lim tsülah dükhi yande Sila bea lubah chamachih.

⁴¹ Tüsho apinü borübo reangzahshihde Siria tüsho Kilikia hode yü.