YUNIRÜBO RHIMO 14 - AMÜSÜH HÜM CL Bible (BSI)

Ikonium ching

¹ Kheakü Ikonium ching püpüki nangde Paul tüsho Barnaba Jihudarü sinagog ching yüzah, tüsho thsangyuthsangrabah Jihudarü le Greekrü ahihkhühnü kin.

² Tüshe amükinrü Jihudarünü khiungkerü thurumusu tüsho keoniorübo azhihde arü lümkhi mülapyukjih.

³ Jumonü ane ki amüyinsahbe tüsho khinthiyinbe rhimopü amüthsüm yusheak adüngakhi jihbuh Atungpuh thsungkheak anenü mulong tode thade kim ashang la.

⁴ Tüshe kiuto mihtsürübo ju chamnak; khürü Jihudarü kilim tsang, tüsho püpürü amüsüh-thsangyurübo kilim tsang.

⁵ Küyimki khiungkerü tüsho Jihudarünü arü yakzanshuhrübo bebah ane thsümüchide lungnü arupü mürangkhea,

⁶ anenü ju mükheahbah Lykaonia kiutobo Lystra le Derbe, tüsho mühi lomi ching tsoabah;

⁷ tüsho anenü ju ching thiyusheak-atsü thsangyuthsangra.

Lystra tüsho Derbe ching

⁸ Kheakü Lystra ching zübechokinü jing kika küyimkishe mütsahkhi mihtsürü khülang binde alakheah.

⁹ Apinü Paul yu thakhi so. Paulnü api ju tsüde kheah tüsho athsüngupü api akin lah de kheahyukbah

¹⁰ düsheak achangnü tha, “Nü jingnü langakindo zhipang!” Tüsho apinü züngmusubah tsah.

¹¹ Küyimki Paulnü ju rhimokhi botonü angükhea, arünü düsheak zhide Lykaonia yunü tha, “Thrünpuhbo ju mihtsürübo kambah isa kilim akia lah!”

¹² Arünü Barnaba ki Zeu de ji, tüsho Paul ki ju adungtobe thsangyurü thsümonü arünü Herme de ji.

¹³ Tüsho kiuto mikhuh api arüngyam lakhi Zeu amükeambuhnü moshipungbo le sangbünlakbo lude chipiripitbo ki aki tüsho mihtsürübo kilim laksah-a kingaün jihpü mulong.

¹⁴ Tüshe küyimki Barnaba le Paul bünenü ju sokheanü ane khim thorüpbah boto lung zhide alihde yü,

¹⁵ “Mihtsürübo, tümüde nüsanü ha rhimocho? Isa she nüsa ruk mihtsürü ah, tüsho nüsanü harü akeangkeang chingnü rholobah thüning le alomi tüsho boto le ju ching lakhi alala thrünrü arhang Thrünpuh kilim yüshihpü thiyusheak atsü hande arükheah.

¹⁶ Ahokhi lünbo ching apinü trükshih alala arü limrobo ching tsahpü mülüjih;

¹⁷ tüshe apinü anihbuh thiyumütsan mülade müthsü, tümüde apinü atsü rhimo tüsho thüning chingnü tsüng le akheahmünchi ching sangsolungsobonü nüsa mulong reangkeamde asühshihchoh.”

¹⁸ Harü yubonü mihtsürübonü arü kilim laksah-a kingaünpü lakhi arothsünnü tukloshih.

¹⁹ Tüshe Jihudarübo Antiok tüsho Ikonium chingnü ju ching arü; tüsho mihtsürübo münita lubah Paul ju ashepü thsüde lungnü kingbah kiuto chingnü yankhita bah.

²⁰ Tüshe küyimki akinrübo api mükamde amukhungkhea, apinü asürübah kiuto ching yüzah; tüsho ashidopü apinü Barnaba lungnü Derbe lim yü.

Antiok ching Alodarükhi

²¹ Küyimki anenü ju kiuto ching thiyusheak-atsü thsangyuthsangrakheanü jingyanrü ahihdo kamshih tüsho Lystra le Ikonium tüsho Antiok lim yülo.

²² Arünü akinrübo me düküngshih, akin ching thiyuro lapü tuthsuk, tüsho thsümütsü ahihdo hode isanü Thrünpuh kiulongthsü ching yüzahbeah de tha.

²³ Tüsho küyimki arünü borü aban ching azothsürübo tamkhüntamnüde tüsho khümkeak thsüde amokhitkhea, arünü kinde alakhi Atungpuh kilim arübo shuhmülanga jih.

²⁴ Jushu anenü Pisidia hobah Pamphylia ching arü.

²⁵ Tüsho arünü Perga ching thiyu thabah Attalia ching yüki;

²⁶ Attalia chingnü kheakü arünü bana lakhi Thrünpuh amüthsüm rhimo ching arünü shuhmülanga jihpung Antiok ching yülo.

²⁷ Küyimki arübo akhiungkhea, arünü borü rukhüh bemukhung tüsho Thrünpuhnü arü ki rhimokhi tüsho apinü khiungkerü kilim akin ripit khimshuhkhi alala kheana huh.

²⁸ Tüsho anenü ju ching akinrü bolung aruhkhüh mung.