WÜHKHE 9 - AMÜSÜH HÜM CL Bible (BSI)

Mahnepü Phungho-thünio

¹ Atungpuhnü Mosa ki Sinai sunglo ching arü Ijip ching akhiukshu mahnepü kam akhuhbe khinu ching tha,

² “ Israel mihtsürübonü akhukhitkhi kim ching phungho-thünio leangkhishang.

³ Ha khinu nimung thürükheak phüyi nipü shuhyini ching, akhukhitkhi kim ching nüsanü leangkhiang: yakzan tüsho thiyuzüngbo yande nüsanü leangkhiang.”

⁴ Jumonü Mosanü mihtsürübo ki phungho-thünio leangkhipü tha,

⁵ tüsho akhuhbe khinu nimung thürükheak phüyi ni shuhyini ching arünü Sinai sunglo chingnü leangkhi. Atungpuhnü Mosa ki thiyukhüm jihkhi nangde mihtsürübonü lüpdükhi rhimo.

⁶ Tüshe judüki mihtsürü khürünü mihtsürü shekhi mi qiukhi hode müneana lakheah, jumonü arünü ju nimung ching phungho-thünio müleangkhikhuk tüsho arünü ju nimung Mosa le Aron büne miki arü;

⁷ tüsho arübonü Mosa ki tha, “ Isabo mihtsürü ashemi qiukhi hode müneana lah, tüshe tümüde isa Israelrü bolung akhukhitkhi kim ching Atungpuh kilim kingaün müjihshihba le?”

⁸ Mosanü alo, “Atungpuhnü I kilim nüsa dünkheak müthsangdanchoki khiungde aleangang.”

⁹ Atungpuhnü Mosa ki tha,

¹⁰ “ Israel mihtsürübo ki thaang, Nüsa khürü yungsho nü tsührü-tsührü ashemi qiubah müneansho yungsho limshu ching hantsahde lalashe, anihbuhnü Atungpuh ki phunghothünio leangkhibeah.

¹¹ Khinu mahne nimung thürükheak phüyi ni shuhyini ching arünü ju leangkhibah; arünü phaüm muyukkhi yikhap tüsho akhüh wokephüyak bebah atsühbah.

¹² Arünü yapsu khiungde ju maningshih, yungsho aro khülang she müyihshak: Phungho-thünio yakzan yande arünü aleangkhibah.

¹³ Tüshe mihtsürü shepü müsühla tüsho hantsah müyü, tüshe phunghothünio müleangkhisho, api I mihtsürü lungnü khekhita bahbah, tümütüsho apinü akhukhitkhi kim ching Atungpuh kingaün mühan; api zangrünü api neak hanbah.

¹⁴ Tüsho nüsa lung larü khiungkerü khürünü Atungpuh phungho-thünio leangkhipü lümsho, phungho-thünio arüngako yakzanbo yande apinü aleangkhipü kuklah; khiungkerü tüsho nihbuh lo ching larü ane chido thsungkheak nünü yakzan khülang lang thsang.”

Amo Tüsho Mo

¹⁵ Arüngyam thsü nimung amonü tangzüng khimyam ju liudo; tüsho arelim arüngyam kumung amo ju mo nangde akhiukbah yapsu khiungde la.

¹⁶ Junangde mutukzhakde animung amonü liudo, tüsho azhing ching mo nangde la.

¹⁷ Tüsho küyimki amo ju arüngyam kumungnü akhinkhea, jushu Israelrü mihtsürübonü tsahmusu; tüsho amo kükheak keambanü ju kheak Israel mihtsürübonü arü khimyam thsü.

¹⁸ Atungpuh yukhüm anide Israel mihtsürübonü tsahmusu, tüsho Atungpuh yukhüm anide arünü binkheam; amo ju arüngyam kumung kihchoki khiungde arünü binkheampung ching la.

¹⁹ Amo junü nimung ashang arüngyam kumung lalashe Israelrübonü Atungpuh yu anide mütsahakhin.

²⁰ Kim kim ching a amo ju arüngyam kumung nimung anükhüh lang la, tüsho Atungpuh yukhüm anide arünü binkheampung ching la; tüsho Atungpuh yukhüm anide arünü tsahakhin.

²¹ Tüsho kim kim ching a amo ju arenü yapsu khiungde kih; tüsho küyimki amo ju yapsu akhinbanü, arünü tsahmusu, animung yungsho are thsüthsü küyimki amo ju akhinbanü arünü tsahmusu.

²² Hoju nimung mahne, yungsho khinu khülang, yungsho kam khülang thsüthsü, amo ju arüngyam kumung la khiungde Israelrübonü binkheampung ching la tüsho mütsahmusu; tüshe küyimki akhinabahkheanü arünü tsahmusu.

²³ Atungpuh yukhüm anide arünü binkheam tüsho Atungpuh yukhüm anide arünü tsahmusu; Atungpuhnü Mosa ki thiyukhüm jihkhi anide arünü Atungpuh yu ani.