WÜHKHE 8 - AMÜSÜH HÜM CL Bible (BSI)

Tsünpungbo Zokhi

¹ Tüsho Atungpuhnü Mosa ki tha,

² “ Aron ki thaang, küyimki nünü tsünpung zobanü tsünpung thüne ju ayin tahshihpü thsüde tsünpung dubopung miki zoang.”

³ Tüsho Atungpuhnü Mosa ki thakhi anide Aronnü tsünpungbo ju adubopung miki zo.

⁴ Akulimnü ajing khiungde tsünpung dubopung ju suna yümrude thsü, ju Atungpuhnü Mosa ki thakhi yande rhimo.

Levirübo Müsühkhitkhi

⁵ Atungpuhnü Mosa ki tha,

⁶ Levirübo Israelrü tsührü bolungnü beakhinang tüsho arübo arüngde müsühkhitang.

⁷ Tüsho nünü arü ki ha ruk müsühkhitang: arü kheak amüsühkhitbe ke rhakkihang tüsho arübo pang athrünkhi hütabahshang tüsho khimmihbo müsühshang, tüsho arübo amüsüh labah.

⁸ Tüsho arübonü moshipung nunu le hi kingaün lushang, ju ching ayikangkang tüsho oliv müdangke yukshang, tüsho nünü neak kingaünpü moshipung nunu püpü luang.

⁹ Jushu Israelrü athrünkhi mukhungshang, tüsho arüngyam miki Levirübo zhipshang.

¹⁰ Junangde nünü Levirübo Atungpuh miki bedarang, tüsho Israelrü tsührü athrünkhinü arü khah Levirü kheak nimbah;

¹¹ tüsho Aronnü Levirübo Israelrü bolungnü müleamde ajihkhi kingaün nangde Atungpuh miki jihbah, junangde arünü Atungpuh rhimo rhimobah.

¹² Levirübonü arü khah moshipung mahne ku kheak nimbah; khülang neak kingaün jihbah tüsho püpü ju taka kingaünbah, junü Levirü müsühkhitkhi rhimobah.

¹³ Levirübo ju müsühkhitde I kilim müleamde kingaünang, tüsho arü ju Aron le atsührübo miki zhipshang.

¹⁴ Hanangde Levirübo Israelrü bolungnü chamkhiang, tüsho arübo I yo thsübah.

¹⁵ Ju dunglim küyimki nünü Levirübo müsühkhitbah, I kilim müleamde kingaünkhi jihbanü, arübo arüngyam ching tankihpü yübah.

¹⁶ Tümüde arübo Israelrü bolungnü I kilim shahde jihabahdo; Israelrü alala akhuh zübekhi müthri inü arübo I thsungkheaknü ludo.

¹⁷ Tümüde Israelrü mihtsürü bolung akhuh zübekhibo ju mihtsürü yungsho shiwüh thsüthsü I yo ah; inü Ijip lo ching akhuh zübekhi laksah nimung inü arübo I thsungkheaknü müsühkhit,

¹⁸ tüsho inü Israelrü mihtsürü akhuh zübekhi lupü dün Levirübo ludo.

¹⁹ Tüsho inü Levirübo ju Aron le atsührübo kilim Israel mihtsürü bolungnü thsambah nangde jih, junangde arübonü Israelrü mihtsürü thsungkheak ashorupung khimyam ching rhimobah, tüsho Israelrü mihtsürü thsungkheak dünthsükhibah, jude athsükhinü Israel tsührübo arüngyam phünide arüchoki arü kheak arüm müyükih.

²⁰ Jumonü Mosa, Aron tüsho Israelrü mihtsürü athrünkhinü, Atungpuhnü Mosa ki thiyukhüm jihkhi nangde Levirübo ki rhimo.

²¹ Levirübonü arü zangrü müsühkhit tüsho khimmihbo müsüh, tüsho Aronnü arübo müsühkhitbah Atungpuh kilim müleamde kingaünkhi nangde jih tüsho apinü arübo müsühkhitde dünthsükhia bah.

²² Ju dunglim Levirübonü ashorupung khimyam ching rhimopü Aron tüsho atsührübo miki yü; Atungpuhnü Mosa ki Levirübo dünkheak thiyukhüm jihkhi nangde mihtsürübonü arübo ki ju ruk rhimo.

²³ Tüsho Atungpuhnü Mosa ki tha,

²⁴ “Levirübo thsungkheaknü ha ruk labah: kam mukukheak phüngünü akumung ashorupung khimyam ching tankihkhi rhimopü yüzahbah;

²⁵ tüsho kam thünimpü ching a arübo rhimo chingnü atuklobah, tüsho kheaküa mütankih,

²⁶ tüshe arübonü keoniorü rungde ashorupung khimyam ching tankihpü kuklah, tahle arü zangrünü tümü mürhimo. Hanangde arü rhimorhiyi ching Levirübo ki nünü arhimobah.”