WÜHKHE 6 - AMÜSÜH HÜM CL Bible (BSI)

Nazirit thsungkheak Yakzan

¹ Atungpuhnü Mosa ki tha,

² Israelrü mihtsürübo ki thaang, Küyimki athrürü yungsho aliberü khülangnü arü Atungpuh kilim büthsüpü Nazirit kampü thiyuchihchimbanü,

³ apinü yukhu tüsho phapke chingnü achamkhibeah; apinü yukhu tüsho püpü phapke chingnü athsükhi muyung, tüsho kurungaso ke muyung yungsho kurungaso aphüyak yungsho akungkhi mütsüh.

⁴ Api Nazirit thsükhi nimung amuyung kurungaso chingnü akhiukkhi tümü she mütsüh, ajibo yungsho aküpbo she mütsühbeah.

⁵ Api Nazirit thiyuchihchim bukkhüp lakhi khiungde ku kheak kuyüliuh müyihkih; api Atungpuh kilim müsühkhitkhi nimung mübankhityikia, api amüsüh labah, tüsho apinü kuyü le münnam shangshihbah.

⁶ Api Atungpuh kilim müsühkhitkhi nimungbo ching ashemi ki phünide müyü.

⁷ Apinü abuh yungsho abe, akhiung yungsho achi pürü shechoki she müneana mulu, tümütüsho api Thrünpuh kilim müsühkhitkhi amütsan aku kheak lah.

⁸ Api Nazirit thsü khiungde anihbuh Atungpuh kilim müsühkhitkhi labah.

⁹ Mihtsürü zukleangnü api mikinü shebahle, junü anihbuh kuyü amüsühkhitkhi müneanjihsho, apinü akuyü ju api müsühkhitpü nimung hütabahbah; nimung athüne nipü apinü ahütbah.

¹⁰ Nimung atizheah nipü apinü chithüreku mahne yungsho müthrithrümpü mahne ashorupung khimyam ripit ki amükeambuh kilim handarübah.

¹¹ Tüsho amükeambuhnü khülang neak kingaün jihbah tüsho püpü ju taka kingaünbah, tüsho api thsungkheak dünthsükhibah tümütüsho apinü ashemi qiukhinü neak yihbeak, tüsho apinü ju nimungnü akuyü müsühkhitbah.

¹² Tüsho api Nazirit thsükhi kim Atungpuh kilim müsühkhitlobah, tüsho ashaklo kingaün kam khülang bankhi namfimihnunu pung handarübah tüshe akhuhlim kim ju a mükhe, tümütüsho api kuyü müsühkhitkhi müneanabahdo.

¹³ Kheakü ha Nazirit thsungkheaknü yakzan: Küyimki anihbuh Nazirit thiyuchihchimkhi nimungbo bankhitbanü, api ashorupung khimyam ripit ki bedarübah.

¹⁴ Tüsho apinü Atungpuh kilim lapha mükihkhi shiwüh mahsam jihbah: taka kingaünpü kam khülang bankhi namfimihnunu pung tüsho neak kingaünpü kam khülang bankhi namfimihnunu dre, tüsho mungtsü kingaün thsungkheak mihnupung khülang de ajihbeah,

¹⁵ kheaküshe apinü phaüm muyukkhi yikhap mulukkhüh, ayikangkang ching oliv müdangke yukbah athsükhi yikhap tüsho oliv müdangke yukbah anungkhi phaüm müzahkhi yikhap ninibo, arü hi kingaünbo tüsho yukhu kingaünbo lungnü ajihbah.

¹⁶ Tüsho amükeambuhnü jurübo Atungpuh miki handarübah tüsho api thsungkheak neak kingaün tüsho taka kingaünkhi jihbah;

¹⁷ tüsho apinü mihnupung Atungpuh kilim mungtsü kingaün phaüm muyukkhi yikhap mulukkhüh lung jihbah; amükeambuhnü hi kingaün tüsho yukhu kingaün she ajihbah.

¹⁸ Tüsho Naziritbuhnü ashorupung khimyam ripit kinü müsühkhitkhi ku hütbah tüsho kuyü lubahle mungtsü kingaün khüp mo kheak yihkihbah.

¹⁹ Tüsho amükeambuhnü mihnupung dubuh akhiungkhi, phaüm muyukkhi yikhap muluk chingnü khülang, tüsho phaüm muyukkhi yikhap anini khülang de lubah Naziritbuh api kuyü müsühkhitkhi hütabahshu akhah ching yukjihbah,

²⁰ tüsho amükeambuhnü jurü Atungpuh ki müleamde kingaünbah; mihnupung khüh tüsho apho ju amükeambuh thsungkheaknü amüsüh kingaün, yakzan yande ju amükeambuh yo thsübah. Jushu, Naziritbuhnü yukhu yungpü kuklah.

²¹ Harü ha Nazirit thsungkheaknü yakzanbo; Atungpuh kilim arü kingaün ju arünü ajihkhukpü lakhi kheaknü büthsüde Nazirit thiyuchihchim yande alabeah. Arünü thiyuchihchimkhi yande, arü müsühkhitpü thsungkheaknü yakzan yande arhimobah.

Amükeamrünü Müngühjihpü

²² Tüsho Atungpuhnü Mosa ki tha,

²³ Aron le atsührübo ki thaang, Ha limro yande nüsanü Israelrü tsührübo müngühjihbah:

²⁴ Atungpuhnü nüsa müngühshang tüsho nüsa kümshang;

²⁵ Atungpuh miro nüsa kheak yinshang tüsho nüsa ki müthsümshang;

²⁶ Atungpuhnü nüsa kheak mulongde kheahshang tüsho nüsa kilim mungtsü jihshang.

²⁷ Junangde arünü I mung Israelrü tsührü kheak yihkihjihbah, tüsho inü arü müngühjihbah.