WÜHKHE 31 - AMÜSÜH HÜM CL Bible (BSI)

Midiarü kheak Royimkhi

¹ Tüsho Atungpuhnü Mosa ki tha,

² “ Israel mihtsürü thsungkheaknü Midiarü kheak royimang. Ju dunglim nü a nüsa mihtsürübo lung yübah.”

³ Jumonü Mosanü mihtsürübo ki tha, “Nüsa khürü keochihpü thsungkheaknü tsungthsüh thsakhamang; tüsho arübo Atungpuh thsungkheaknü Midiarü kheak royimpü yüshang.

⁴ Israel trük aban chingnü 1000 keochihpü yüshang.”

⁵ Jumonü Israel trük aban chingnü 1000 mokhit, keochihrü alala thsürubah 12,000.

⁶ Junangde Mosanü keochihpü arübo trük aban chingnü 1000 yüshih; apinü arübo amükeambuh Eleazar tsührü Phinehas yande, amüsüh kukrukbo tüsho akhah ching amütpü hulipungpung shuhbah yüshih.

⁷ Tüsho Atungpuhnü Mosa ki thiyukhüm jihkhi nangde arünü Midiarü bede keochih, tüsho arünü athrürü alala laksahkham.

⁸ Arünü alaksahkhi lungnü Midiarü kiulongthsürübo phüngü harü laksah: Evi, Rekem, Zur, Hur, tüsho Reba. Arünü Beor tsührü Balaam she nuknü laksah.

⁹ Tüsho Israel mihtsürübonü Midiarü azoberübo arü tsührü aninibo bebah rama lu, tüsho arü lakhit thsümünimjihde moshi, mihnu tüsho kukruk alala lukhamjih.

¹⁰ Arünü arü lapung kiutobo, tüsho chipibo she monü takabahjih.

¹¹ Tüsho arünü ayankhikhi tüsho athsümünimkhi mihtsürü tüsho shiwühbo lu.

¹² Tüsho arünü aramrü le kukruk lukhibo tüsho athsümünimkhibo Mosa tüsho amükeambuh Eleazar kilim lubah arü, tüsho Jirikho hobah Jordan ki Moab dükhün binkheampung ching larü Israel mihtsürü boto kilim lubah arü.

Bonungrübo Alodalungkhi

¹³ Tüsho Mosa, amükeambuh Eleazar tüsho boto limberü alalanü binkheampung aleanglim arü mihleangpü wukhiuk.

¹⁴ Tüshe Mosanü bonungrü atorübo, chithürübo tüsho chibo kurungkheak wühkenorübo keochih chingnü alunglorü kheak bukakhiuk.

¹⁵ Tüshe Mosanü arü ki tha, “Nüsanü azoberü alala rhangdung lashihla de?

¹⁶ Kheahang, arünü Balaam yu anibah Israel mihtsürübo Peor ching dünjichoki Atungpuh azhihde amülim rhimoshih, tüsho Atungpuh mihtsürü bolung arüm tukthsü lakheah.

¹⁷ Jumonü azürü bolung athrürübo tüsho athrürü kheak nungrü aliberübo alala laksahang.

¹⁸ Tüshe nüsabo thsungkheaknü atsangkhitkhi anünürübo rhangdung lashang.

¹⁹ Tüsho nüsabo binkheampung aleanglim nimung thüne laang; nüsa mihtsürü laksahrübo, ashemi qiurübo tüsho nüsanü aramrübo asam ni le athüne nipü ching müsühkhitang.

²⁰ Khimmihbo, shihküpnü athsükhibo, mihnu namnü akeakkhi, tüsho sangnü athsükhi alala müsühkhitang.”

²¹ Tüsho amükeambuh Eleazarnü keochih ching yürü mihtsürübo ki tha, “ Ha Atungpuhnü Mosa kilim thiyukhüm jihkhi yakzanbo:

²² Suna, shotoyinchi, müwayinchi, yinchi, müyeyinchi, tüsho mülang yinchi,

²³ mo müyükihbebo ju monü thsahang, tüsho amüsüh labah; tütüshe ju amüsühkhitbe kenü müsühkhitang. Tahle mo yükihbebo a kenü müsühkhitang.

²⁴ Tüsho nüsanü khimmihbo athüne nipü müsühang tüsho müsühde kamang, tüsho jushu nüsa binkheampung ching arüpü kuklah.”

Ayankhikhi Kukrukbo Chamkhi

²⁵ Atungpuhnü Mosa ki tha,

²⁶ Nü le amükeambuh Eleazar tüsho gukbo ching azothsürübonü, yankhia lubah arükhi mihtsürü tüsho shiwühbo khea kheahang;

²⁷ tüsho ayankhikhi ju shihcham mahne thsüde, keochih ching berü tüsho aningkhi boto chamjang.

²⁸ Keochih ching yürü bonungrübo kheaknü Atungpuh kilim ruk jihpü thsüde mihtsürü, moshi, donki, tüsho namfimihnubo chi phüngü aban chingnü khülang yihkhitang;

²⁹ ju lubahle Atungpuh kilim kingaün nangde amükeambuh Eleazar kilim jihang.

³⁰ Tüsho aningkhi Israel mihtsürübo kheaknü mihtsürü, moshi, donki, namfimihnu tüsho akam-shiwühbo thünim chingnü khülang yihkhitbah Atungpuh arüngyam neakrü Levirübo kilim jihang.

³¹ Jumonü Mosa tüsho amükeambuh Eleazar anenü Atungpuhnü Mosa ki thiyukhüm jihkhi yande rhimo.

³² Tüsho bonungrübonü keochih ching yankhikhi nihbuh lupü zokhi thsürubah namfimihnu 675,000,

³³ moshi 72,000,

³⁴ donki 61,000,

³⁵ tüsho atsangkhit anünürü 32,000.

³⁶ Keochih ching bonungrübo yo: namfimihnu 337,500,

³⁷ ju chingnü Atungpuh kilim ruk jihkhi 675;

³⁸ moshi 36,000, ju chingnü A TUN GPU H kilim ruk jihkhi 72,

³⁹ donki 30,500, ju chingnü Atungpuh kilim ruk jihkhi 61;

⁴⁰ mihtsürü 16,000, ju chingnü Atungpuh kilim ruk jihkhi 32,

⁴¹ Atungpuhnü thiyukhüm jihkhi nangde Mosanü ruk ju Atungpuh shihcham thsüde amükeambuh Eleazar kilim jih.

⁴² Tüsho keochih ching berü shihcham kheaknü Mosanü chamkhia Israelrübo kilim jihkhi–

⁴³ boto yo namfimihnu 337,500,

⁴⁴ moshi 36,000,

⁴⁵ donki 30,500,

⁴⁶ tüsho mihtsürü 16,000.

⁴⁷ Tüsho Israel mihtsürü shihcham mihtsürü le shiwühbo thünim chingnü khülang yihkhita Atungpuhnü thiyukhüm jihkhi nangde Mosanü Atungpuh arüngyam neakrü Levirü kilim jih.

⁴⁸ Tüsho chithürü kumung atorübo, chithürü kumung wühkenorü tüsho chi kumung wühkenorübo Mosa ki arü;

⁴⁹ tüsho arünü Mosa ki tha, “Nü yamlarübonü keochih ching berü isa yukhüm ching lakhi mihtsürü khea kheahdo, tüsho mihtsürü khülang lang she müdükheak.

⁵⁰ Jumonü isanü angükhi shoto kukrukbo: khu, bingkhüm, yingkhüm, nüpü, tüsho lakbo isa neak dünthsükhipü Atungpuh kilim handarüdo.”

⁵¹ Jumonü Mosa tüsho amükeambuh Eleazar anenü suna tüsho züt akhambe kukrukbo arü kheaknü leangkhia lu.

⁵² Tüsho chithürübo tüsho chibo kurungkheak wühkenorübonü Atungpuh kilim kingaün jihkhi suna ju khahngak 200 khüh lakheah.

⁵³ Keochih ching berü abannü nihbuh thsungkheak ayankhikhi kukrukbo lu.

⁵⁴ Tüsho Mosa le amükeambuh Eleazar anenü chithürü kumung wühkenorü tüsho chi kumung wühkenorübo kheaknü suna leangkhi, tüsho ju Israel mihtsürü thsungkheak lümkhitde alapü thsüde Atungpuh miki arüngyam ching handarü.