WÜHKHE 28 - AMÜSÜH HÜM CL Bible (BSI)

Nimung Aban Kingaünbo

¹ Atungpuhnü Mosa ki tha,

² Israel mihtsürübo kilim thiyukhüm jihang, tüsho arü ki thaang, I ki kingaünbe, I tsühyungbe monü taka kingaünde I kilim arhümthüneabebo akhukhitkhi kim ching kingaünpü nüsanü kümkangang.

³ Tüsho nünü arü ki thaang, Ha nüsanü Atungpuh kilim taka kingaünbeah: lapha mükihkhi namfimihnunu pung 2 kam khülang bankhi mutukzhakde taka kingaünang.

⁴ Namfimihnunu 1 nüsanü yapsu kingaünang, püpü ju arelim kingaün jihang.

⁵ Ju lung ayikangkang khahngak 1 ching oliv müdangke pungdüchi 1 yukbah hi kingaün jihang.

⁶ Ha mutukzhakde Atungpuh kilim arhümthüneashihde monü taka kingaünpü Sinai Müzüng ching arüngde müsühkhitkhi lah.

⁷ Tüsho namfimihnunu abande ayungbe kingaün nangde kingaün sadam kheak ayungbe pungdüchi 1 dungkihang.

⁸ Namfimihnunu püpü ju nüsanü arelim jihang; ju nüsanü yapsu thsakhamkhi hi kingaün tüsho ayungbe kingaünbo lung jihang. Ha monü taka kingaünde Atungpuh kilim arhümthüneashihkhi lah.

Amuni Kingaün

⁹ Tüsho amunimung kam khülang bankhi namfimihnunu lapha mükihkhi 2 tüsho ayikangkang khahngak 2 ching oliv müdangke yukbah hi kingaün tüsho ayungbe kingaün jihang.

¹⁰ Ha mutukzhakde kingaünkhi tüsho ayungbe kingaün lung yukrude amunimung aban taka kingaünpü lah.

Khinu Aban Kingaün

¹¹ Khinu aban akhuhbe nimung nüsanü Atungpuh kilim harü taka kingaünang: moshipung nunu 2, mihnupung 1, tüsho kam khülang bankhi lapha mükihkhi namfimihnunu 7;

¹² moshipung abande hi kingaün nangde ajihpü ayikangkang khahngak 3 ching oliv müdangke yukkhi; mihnupung 1 thsungkheak khahngak 2;

¹³ tüsho namfimihnunu aban khahngak 1 Atungpuh kilim arhümthüneade taka kingaün jihang.

¹⁴ Dükde ayungbe kingaünpü ju moshipung abande ayungbe pungdüchi 2, mihnupung thsungkheak pungdüchi 1 kheak phukrüpkhüh, tüsho namfimihnunu abande pungdüchi 1. Ha taka kingaünpü ju kam amuyung khinu abande alabah.

¹⁵ Tüsho neak kingaünpü thsüde, mutukzhakde taka kingaünkhi tüsho ayungbe kingaün lung yukrude neak kingaün thsungkheak mihnupung khülang Atungpuh kilim jihang.

Phungho-thünio

¹⁶ Akhuhbe khinu nimung thürükheak phüyi nipü ju Atungpuh phungho-thünio ah.

¹⁷ Tüsho ha khinu nimung thürükheak phüngü ni ju thünio tankihbah; nimung thüne phaüm muyukkhi yikhap tsühbah.

¹⁸ Atan nimung ju nüsanü amüsüh amukhung labah, tüsho nüsanü rhimo achak tümü mürhimo.

¹⁹ Tüsho nüsanü Atungpuh kilim monü taka kingaünkhi harü jihang: moshipung nunu 2, namfimihnupung 2 tüsho kam khülang bankhi namfimihnunu 7; jurübo ju lapha mükihkhi thsübeah.

²⁰ Nüsanü ayikangkang lung oliv müdangke yukbah hi kingaün jihpü ju: moshipung 1 thsungkheak khahngak 3, namfimihnupung thsungkheak khahngak 2;

²¹ nüsanü namfimihnunu 7 abande khahngak 1 jihang;

²² tüsho nüsa neak dünthsükhipü mihnupung khülang neak kingaün jihang.

²³ Harübo mutukzhakde taka kingaünkhi lungnü jihang.

²⁴ Hanangde nüsanü tsühyungpü, nimung thüne taka kingaünde Atungpuh kilim arhümthüneashang; ha taka kingaünkhi tüsho ayungbe kingaün mutukzhakde ajihkhi lungnü kingaünang.

²⁵ Tüsho nimung thüne nipü nüsanü amüsüh mukhung laang, tüsho rhimo achak tümü dürhimo.

Yimlukhi Thünio Kingaün

²⁶ Tüsho amunibo thünio kim ching sangsolungsobo akhuh yimlu nimung, küyimki nüsanü hiso kingaün Atungpuh kilim jihbanü, nüsanü amüsüh amukhung laang, tüsho rhimo achak tümü she dürhimo.

²⁷ Nüsanü Atungpuh kilim taka kingaünde arhümthüneashihpü ju moshipung nunu 2, namfimihnupung 1, tüsho kam khülang bankhi namfimihnunu 7;

²⁸ jurü lung ayikangkang ching oliv müdangke yukbah hi kingaün jihpü ju: moshipung abande khahngak 3, namfimihnupung 1 thsungkheak khahngak 2,

²⁹ tüsho namfimihnunu 7 abande khahngak 1;

³⁰ tüsho nüsa neak dünthsükhipü mihnupung 1.

³¹ Nüsanü harübo nimung abande taka kingaünkhi tüsho hi kingaün jihkhi lung ajakde ayungbe kingaün lungnü jihang. Shiwühbo ju lapha mükihkhi thsübeah.