WÜHKHE 25 - AMÜSÜH HÜM CL Bible (BSI)

Peor ching Israelrü

¹ Israelrübo Shittim ching lachoki mihtsürübonü Moabberübo kheak müzammürampü tankih.

² Arünü mihtsürübo jia arü thrünpuhbo ki laksah-a kingaünshih, tüsho mihtsürübonü tsühyung tüsho arü thrünpuhbo ki khukning.

³ Jumonü Israelrünü nihbuh zangrü Peor ching Baal kheak arihabah, tüsho Israel azhihde Atungpuhnü bukakhiuk.

⁴ Tüsho Atungpuhnü Mosa ki tha, “ Mihtsürü limberübo alala bea lung, tüsho Atungpuh miki anidüchi ching zhinang, ju hode Atungpuh bukakhiukkhi Israel kheaknü rholode atsobah.”

⁵ Jumonü Mosanü Israel mahkhaprübo ki tha, “Nüsa mihtsürü sherübo Peor ching Baal kingaünrü kamdünü nüsanü arübo laksahang.”

⁶ Tüsho kheahang, Israelrü mihtsürü boto arüngyam ripit ki tripde aleangchoki, Israelrü khülangnü Midiaberü bebah Mosa tüsho botonü ngüde anihbuh betsührü kilim arü.

⁷ Küyimki amükeambuh Aron kheak yo, Eleazar tsührü Phinehasnü ju ngükhea, apinü boto lungnü asürübah akhah ching thsüh thrüa lu,

⁸ tüsho apinü Israelbuh dunglim yande khimyam ching yü tüsho alibe ane chido chinkhitde khean. Junangde arüm ju Israel mihtsürü bolungnü tukloabah.

⁹ Tüsho arümnü ashekhi alala thsürubah 24,000 lakheah.

¹⁰ Atungpuhnü Mosa ki tha,

¹¹ “ Amükeambuh Aron kheak yo, Eleazar tsührü Phinehasnü I bukakhiukkhi Israelrü kheaknü tsoloshihdo; tümütüsho inü arü bolung mulongkhi kheak apinü mulongkhit, junangde inü I mükthsükhi ching Israelrübo müdükheakshih.

¹² Jumonü thaang, ‘Kheahang, inü api kilim mungtsü tangzüngkhi jihchoh;

¹³ tüsho ha api le anihbuh tsühsoniuso kheak akheam mülakhi amükeam trük thsüpü tangzüngkhi labah, tümütüsho apinü nihbuh Thrünpuh thsungkheak mulongkhit, tüsho Israel mihtsürü thsungkheaknü dünthsükhijih.’ ”

¹⁴ Kheakü Israelrü shepü Midiaberü lung laksahkheanü api ju Simeon buhtsüh ching limberü Salu tsührü Zimri lakheah.

¹⁵ Tüsho alaksahkhi Midiaberü mung ju Midiarü buhtsüh ching azothsübuh Zur tsührü Kozbi lakheah.

¹⁶ Atungpuhnü Mosa ki tha,

¹⁷ “ Midiarü thsümüchiang, tüsho arü laksahang;

¹⁸ tümüde arünü Peor ching nüsa kheak mülapyukjih tüsho Peor ching arüm lachoki laksahbe, Midia limberü tsührü Kozbi dünkheaknü nüsa thsümüchi.”