WÜHKHE 23 - AMÜSÜH HÜM CL Bible (BSI)

¹ Tüsho Balaamnü Balak ki tha, “ I thsungkheaknü ha ching kingaün sadam thüne thsang, tüsho I thsungkheaknü ha ching moshipung thüne tüsho mihnupung thüne thsakhamang.”

² Balaamnü athakhi nangde Balaknü rhimo, tüsho Balak le Balaam anenü moshipung tüsho mihnupung kingaün sadam abande jih.

³ Tüsho Balaamnü Balak ki tha, “Nü a taka kingaünkhi miki zhipang, tüsho I yüanü; Atungpuh I shorupü arübah, tüsho apinü I ki tümü huhbanü inü nü ki thabah.” Jumonü api azhikpung awung achang ching wutu.

⁴ Thrünpuhnü api shoru tüsho Balaamnü tha, “ Inü kingaün sadam thüne thsakhamdo, tüsho inü kingaün sadam abande moshipung 1 tüsho mihnupung 1 de kingaündo.”

⁵ Atungpuhnü Balaam mün ching thiyu yukjih tüsho tha, “Balak kilim alode yüang tüsho nünü ha thaang.”

⁶ Jumonü apinü Balak kilim alode yü, tüsho taka kingaünkhi miki api lung Moab torübo she alala lakheah.

⁷ Balaknü müchityu tha, “ Aniakhiuklim wung ching Moab kiulongthsüpuh, Balaknü I Aram chingnü bedarü. ‘ Arang I thsungkheaknü Jakob athrujang; arang Israel azhihde zhiyukjang.’

⁸ Thrünpuhnü mathruajikhi inü küde athrupü? Thrünpuhnü azhihde müzhiyukkhi kheak inü küde azhihde azhiyukpü?

⁹ Lunghü mujuk chingnü inü arü ngüchoh, awungbo chingnü inü arü chinzhina kheahchoh, arübo büthsüde alakhi trükshih khülang ah; tüsho püpü trükshih kheaknü arü alü müngühmühibe de arünü mükheahlah.

¹⁰ Shepünü Jakob sungthulung khekhamkhukpü yungsho Israel shihcham phüyi chingnü shihcham khülang khekhukpü? Thiyuro tharü shekhi nangde I sheanü, I nimungbo arü nangde kamanü!”

¹¹ Balaknü Balaam ki tha, “Nünü I kheak tümü rhimokhea? Inü I riri athrushihpü bedarükheah, tüshe kheahang, nünü arübo muzhomopungde müngühjihdo!”

¹² Jumonü apinü alo, “Atungpuhnü I mün ching yukjihkhi yu thapü inü manibea de?”

Balaamnü Müchitkhi Mahnepü

¹³ Balaknü api ki tha, “Nünü arü ngüpung dangpung püpü lim muzhobah I lung arang, nünü arü aleanglimbe shihcham lang angübah, tüshe arü alala müngü; ju kheaknü I thsungkheak arübo athrujang.”

¹⁴ Jumonü apinü Balaam ju Zophim lu, Pisga wung ching bebah arü, tüsho kingaün sadam thüne thsübahle ju abande moshipung 1 tüsho mihnupung 1 de kingaün.

¹⁵ Tüshe Balaamnü Balak ki tha, “ I ju kumung Atungpuh shoruchoki nü taka kingaünkhi miki zhipcholang.”

¹⁶ Judüki Atungpuhnü Balaam shorubah amün ching thiyu yukjih, tüsho tha, “Balak kilim alode yüang, tüsho nünü ha thaang.”

¹⁷ Jumonü apinü Balak kilim arü tüsho taka kingaünkhi miki api lung Moab torübo bebah alakheah. Tüshe Balaknü api ki tha, “Atungpuhnü tümü thade?”

¹⁸ Tüsho Balaamnü müchityu tha: “ Asürang, Balak, tüsho aniang; I ki aniang, Zippor tsührü,

¹⁹ Thrünpuh ju akeangyu thapü thsüde mihtsürü ruk yung, yungsho lümkhi müthripü thsüde mihtsürü tsührü ruk yung. Apinü thabah mürhimocho de? Apinü alokhibah akuk müngücho de?

²⁰ Müngühjihpü yukhüm inü leangkhido; apinü müngühjihdo tüsho inü ju mümüthrikhuk.

²¹ Jakob kheak apinü amülim mükheahkhit, yungsho Israel ching mihbukmuyuk müngü, Atungpuh arü Thrünpuh ju arü lung lah, tüsho api ju arü kiulongthsüpuh ah de azhikhi arü bolung lah.

²² Thrünpuhnü arü Ijip chingnü bekhitchoh; arü ju mütüm moshipung nangde sühmüh lah.

²³ Jakob azhihde rük huhpü müla, Israel azhihde müchitpü müla. Kheakü Jakob tüsho Israel dünkheak thabah, ‘Kheahang Thrünpuhnü tümü rhimoa la?’

²⁴ Kheahang, mihtsürübonü kekhüzü nangde asürüchoh; tüsho kekhüzü nangde zangrü zuhmusuchoh; shiwüh mütsühkhamchoki tüsho alaksahkhi thiyih muyungyikia mübinkheam.”

²⁵ Tüsho Balaknü Balaam ki tha, “ Arü kheak athru she dathru yungsho müngühmühi she dümüngühjih.”

²⁶ Balaamnü alo, “Atungpuhnü athakhi lang inü arhimobah de nü ki inü mütha de?”

Balaamnü Müchitkhi Mahsampü

²⁷ Balaknü Balaam ki tha, “ Muzhobah arang, inü nü dangpung püpü ching bebah ayübah; khükijua ju ching nünü I thsungkheak arü athrukhi Thrünpuhnü asühbah.”

²⁸ Jumonü Balaknü Balaam ju loshelo abina kheahpung Peor wung mujuk ching bebah yü.

²⁹ Tüsho Balaamnü Balak ki tha, “ Ha ching I thsungkheaknü kingaün sadam thsüang, tüsho I thsungkheaknü moshipung 7 tüsho mihnupung 7 thsakhamang.”

³⁰ Balaamnü athakhi nangde Balaknü rhimo tüsho kingaün sadam abande moshipung 1 tüsho mihnupung 1 de kingaün.