WÜHKHE 20 - AMÜSÜH HÜM CL Bible (BSI)

Kadesh ching Dünjikhibo

¹ Israel mihtsürü boto athrünkhi, khinu akhuhbe ching Zin sunglo ching arübah mihtsürübo Kadesh ching la; tüsho ju ching Miriam shea kiuyukabah.

² Kheakü ju ching boto thsungkheaknü ke mülade alakheah; jumonü arünü Mosa tüsho Aron azhihde mukhung.

³ Tüsho mihtsürübonü Mosa kheak rukachihde tha, “ Isa she keoniorübo lung Atungpuh miki sheabahkhülaa!

⁴ Tümüde nünü Atungpuh boto ha sunglo ching bede atunü isa tüsho shiwühbo ha ching sheshihpü thsükhea?

⁵ Tüsho tümüde nünü ha amütsü dangpung ching bedarüpü isa Ijip chingnü atushihkhea? Ha hi yungsho khubaso yungsho kurungaso yungsho tsarümkiu lapung yung; ke yungpü she müla.”

⁶ Jumonü Mosa tüsho Aron anenü boto mikinü arüngyam ripit ki yü tüsho ane miro koyu tüsho Atungpuh müretahkhi ane ki akhiuka huh.

⁷ Tüsho Atungpuhnü Mosa ki tha,

⁸ “ Tso luang, nü tüsho nü khiung Aron nükenü boto bemukhungang. Arü mük kinü lung ki thaang, tüsho ke akhiukbah; hanangde nünü arü thsungkheak lung chingnü ke handarübah, tüsho boto le arü shiwühbo yungshihbah.”

⁹ Jumonü apinü thiyukhüm jihkhi nangde Mosa nü Atungpuh mikinü tso lu.

¹⁰ Tüsho Mosa le Aron anenü lung miki boto bemukhung; tüsho apinü arü ki tha, “Kheakü aniang, nüsa azhihrübo! Ikenü nüsa thsungkheak ha lung chingnü ke yihkhitba de?”

¹¹ Jushu Mosanü akhah shuhkihbah atsonü lung kheak mahne ki rhap; tüsho ke suhdahde akhiuk, tüsho boto le arü shiwühbonü yung.

¹² Tüshe Atungpuhnü Mosa tüsho Aron ki tha, “ Tümütüsho nükenü Israelrü mük ki I amüsüh de akin jihde muhuh, jumonü nükenü harü boto inü arü kilim jihpü alokhikhi lomi ching bebah müyü.”

¹³ Ha Meriba ke lakheah tümütüsho Israel mihtsürübonü Atungpuh kheak rukachih, tüsho apinü arü bolung amüsüh de huh.

Edom Kiulongthsüpuhnü Israel Yanlokhi

¹⁴ Kheakü Mosanü yunithsürübo Kadesh chingnü Edom kiulongthsüpuh kilim yüshih, “Ha nü keoniorü Israelrünü thachoh: Isa kheak küpkhuk lakhi alala nünü mükheahlah,

¹⁵ künangde isa jipürü Ijip ching yükikhea, tüsho isa kim ashang Ijip ching lakhea, tüsho Ijiprünü isa le nüsa jipürü kheak thsümüchikhea.

¹⁶ Küyimki isanü Atungpuh ki zhikhea, apinü isa düsheak sobah yunirü thiyi tüsho isa Ijip chingnü bede akhiuk; kheakü isa nü lomi aredung yean, Kadesh kiuto ching lah.

¹⁷ Muzhobah isa nü lomi hode yüshang. Isanü thulubo yungsho kurungasolubo hode müyü, yungsho kekhip chingnü ke muyung; isanü kiulongthsüpuh limro ching lang ayübah; isanü nü lomi muhoyichokia tsülim yungsho huzulim manguh.”

¹⁸ Tüshe Edomrünü alo, “Nüsanü isa lomi hode müyükhuk, jude yungsho thsühnuk shuhbah nüsa azhihde isa khiukbah.”

¹⁹ Jumonü Israel mihtsürübonü tha, “Isa limto yande ayübah, tüsho isa le isa shiwühbonü nüsa ke yungsho, isanü ju dün shakbah; zhikde isa jingnü hoshang, püpü müla.”

²⁰ Edomrünü alo, “Nüsa muhokhuk.” Jumonü arü azhihde Edom bonungrü amüküpbonü thsühnuk shuhbahle akhiuk.

²¹ Hanangde Edomrünü Israelrübo arü lomi hode müyüshih; jumonü Israelrübonü arü kheaknü rholobah püpü limro chingnü yü.

Aron Shekhi

²² Jumonü Israelrü mihtsürübo, boto athrünkhi, Kadesh chingnü tsahmusubah Hor wung ching arü.

²³ Tüsho Atungpuhnü Edom lomi aredung yean Hor wung chingnü Mosa tüsho Aron ki tha,

²⁴ “ Aron a nihbuh mihtsürü bolung yübah, tüsho inü Israel mihtsürübo kilim jihpü alokhikhi lo ching api müyüzah, nükenü Meriba ke ching I yu azhihdo.

²⁵ Aron tüsho atsührü Eleazar bebahle Hor wung ching atuang;

²⁶ tüsho Aron khimmih yihkhitbahle atsührü Eleazar khümjang; tümüde Aron a nihbuh mihtsürü lung yübah tüsho ju ching shebah.”

²⁷ Jumonü Mosanü Atungpuh yukhüm yande rhimo; arübo boto mük kinü Hor wung ching wutu.

²⁸ Mosanü Aron khimmihbo yihkhitbahle atsührü Eleazar kheak khümjih; tüsho Aron a ju wung mujuk kheaknü sheabah. Jushu Mosa tüsho Eleazar awung chingnü aki.

²⁹ Küyimki boto alalanü Aron shea angükhea, Israel yamkhün alalanü Aron dünkheak nimung samrü tüzho.