WÜHKHE 17 - AMÜSÜH HÜM CL Bible (BSI)

Aron Tso

¹ Tüsho Atungpuhnü Mosa ki tha,

² “ Israelrü ki nihbuh buhtsüh aban chingnü limberü abande tso thürükheak mahne lupü thaang. Mungbo nihbuh tso kheak thrütkihang.

³ Tüsho nünü Aron mung Levi tso kheak thrütkihang. Tümüde buhtsüh ching azothsürü abande tso khülang khülang labah.

⁴ Nünü jurübo inü nü shorupung khimyam ching tangzüng sangdan miki zojang.

⁵ Tüsho mihtsürü shepü tso inü mokhitbanü apungbah; junangde Israel mihtsürübonü nü azhihde dapdapkhi ju inü atukloshihbah.”

⁶ Jumonü Mosanü Israel mihtsürübo ki tha, tüsho arü buhtsühbo ching limberü abande tso thürükheak mahne api kilim jih; tüsho Aron tso she ju lung lakheah.

⁷ Tüsho Mosanü tsobo ju tangzüng khimyam ching Atungpuh miki zo.

⁸ Ashidopü Mosanü tangzüng khimyam ching yü, tüsho kheahang, Levirü buhtsührü Aron tso chingnü pungde akhiukbah almond aso müna lakheah.

⁹ Jumonü Mosanü A TUN GPU H miki yo tso alala Israel mihtsürübo ki hande khiuk; tüsho arünü kheahbah buh tsotso lu.

¹⁰ Tüsho Atungpuhnü Mosa ki tha, “ Aron tso ju azhihde-wusurü amütsan zopü thsüde tangzüng sangdan ki hanlode arang, junangde arünü I azhihde dapdapkhi nünü akheamshihbah, jude yungsho arü ashebah.”

¹¹ Atungpuhnü api ki thiyukhüm jihkhi nangde Mosanü rhimo.

¹² Tüsho Israel mihtsürübonü Mosa ki tha, “ Isa dükheakchoh, isa dükheakdo, isa alala dükheakdo!

¹³ Shepünü Atungpuh yam ki lang she phünide arübanü ashebah. Isa alala asheba de?”