WÜHKHE 16 - AMÜSÜH HÜM CL Bible (BSI)

Mosa tüsho Aron kheak Azhihkhi

¹ Kheakü Levirü tsührü Kohath kheaknü atrükkhitkhi Izhar tsührü Kora, ju lung Eliab tsührübo Dathan tüsho Abiram tüsho Reuben kheak yo, Peleth tsührü On, arünü mihtsürübo bea lu;

² tüsho arünü Israel mihtsürü boto chingnü mokhitkhi mungkhung limberübo 250 bebah Mosa azhihde wusu.

³ Arübo rukhühnü Mosa tüsho Aron azhihde mukhungbahle ane ki tha, “Nüke khide münchi hodo, tümüde Israelrü boto alala ching mihbüm abande amüsüh lah, tüsho Atungpuh arü lung lah, dale küde thsah Atungpuh borü kurungkheak nüke zangrü shuhkihcho?”

⁴ Küyimki Mosanü ju sokhea, apinü amiro zhinabah;

⁵ tüsho apinü Kora tüsho ajingyanrübo ki tha, “Shido yapsu Atungpuhnü sherü api yo a tüsho shepü amüsühanü ahuhbah, tüsho ju buh mihtsürü api phünide ayülishihbah; junangde shepü apinü amokhitbanü api phünide ayüshihbah.

⁶ Hade thsang: Kora tüsho nü jingyanrü alalanü mophuru shuhang;

⁷ shido Atungpuh miki jurü ching mo tüsho rhümthüneabe yukang, tüsho mihtsürü shepü Atungpuhnü mokhitbanü amüsühbuh labah. Nüsa Levirübo khide münchi hodo!”

⁸ Tüsho Mosanü Kora ki tha, “Nü Levi tsührü, kheakü aniang:

⁹ Nüsa Israelrü Thrünpuh hode Israel boto chingnü chamkhita Atungpuh arüngyam ching rhimopü api miki yüpü, tüsho boto tankihshihpü thsüde arü miki zhipshihpü thsükhi nüsanü khide ninilah de lümcho de?

¹⁰ Tüsho apinü nü tüsho nü keoniorü Levirübo api phünide bedarüdo, tüshe kheakü nünü amükeamrü shihcham she yimchoh!

¹¹ Jumonü nü tüsho nü jingyanrü alala thsürubah Atungpuh azhihchoh, tüsho Aron ju tümü ah de nüsanü api azhihde dapdapcho?”

¹² Tüsho Mosanü Eliab tsührübo Dathan le Abiram büne jipü thiyi, tüshe anenü tha, “ Ike matu!

¹³ Niuhke tüsho mukhuke bukde alakhi Ijip lo chingnü isa bekhitbah sunglo ching laksahpü thsükhi, tüsho nünü isa kurungkheak atungrü thsükhi ha anikhüh ah de lümchoshi?

¹⁴ Kheaküshe nünü isa niuhke tüsho mukhuke bukpung lo ching bede marü, yungsho thulu le kurungasolu yamrüplurüp isa kilim müjih. Nünü harü mihtsürü mükji khünkhita bahjihpü? Isa matu!”

¹⁵ Tüsho Mosanü bukakhiukde Atungpuh ki tha, “ Arübonü kingaünkhi düleangkhi: Inü arü yo donki khülang lang she mulu, yungsho arü shepü kheak she amütsü mürhimo.”

¹⁶ Tüsho Mosanü Kora ki tha, “Shido, nü tüsho nü jingyanrübo alala tüsho Aron she de Atungpuh miki arang.

¹⁷ Nüsa mihbüm abande mophuru lubah ju ching arhümthüneabe yukang tüsho mophuru 250 ju nüsa abande Atungpuh miki lubah arang, nü tüsho Aron she nihbuh mophuru abande shuhang.”

¹⁸ Jumonü mihtsürü abannü nihbuh mophuru ching mo yukbah ju kheak arhümthüneabe yihkih, tüsho Mosa le Aron ane lung arüngkhimyam ripit ki zhip.

¹⁹ Tüsho Koranü arü azhihde alala arüngkhimyam ripit ki bemukhung, tüsho Atungpuh müretahkhi boto alala ki akhiuka huh.

²⁰ Tüsho Atungpuhnü Mosa le Aron ki tha,

²¹ “Nüke boto chingnü atrütang, tüsho inü arübo khülangkiyu thsüde akheamshihbah.”

²² Tüsho anenü mi zhinbahle tha, “O Thrünpuh mihtsürü me alala Thrünpuh, mihtsürü khülang neak dün, boto alala kheak nü bukakhiukba de?”

²³ Jumonü Atungpuhnü Mosa ki tha,

²⁴ “Kora, Dathan tüsho Abiram arüsam kinü akhinang de boto ki thaang.”

²⁵ Mosanü asürübahle Dathan, Abiram tüsho api jingyanrü Israelrü azothsürübo kilim yü.

²⁶ Tüsho apinü boto ki tha, “Kheakü khimyam ching lakhi harü amütsü mihtsürübo kheaknü akhinang! Arü yo tümü she düqiu, jude yungsho arü neakbo dünkheaknü nüsa kheamkhambah.”

²⁷ Jumonü arübo Kora, Dathan tüsho Abiram arüsam yam kinü tsoakhinabah; tüsho Dathan le Abiram anenü akhiukbahle ane niuberü, ane tsührü athrürü tüsho tsührü aninibo bebah arü khimyam ripit ki zhip.

²⁸ Tüsho Mosanü tha, “ Ha hode harübo rhimoshihpü Atungpuhnü thiyikheah de nüsanü amükheahbah, tümüde jurübo inü amulongkhi chingnü rhimochoh yung.

²⁹ Harü mihtsürübo ha tukthsünü shesho tüsho püpüki mihtsürü kheak dünjikhi ruk lang thsüsho, Atungpuhnü I müthiyikheah.

³⁰ Tüshe Atungpuhnü tümükhüh aso-thsüde rhimosho tüsho alonü mün kabahle arübo le kukrukbo muyusho tüsho arübo arhangnü alokhün ching yüzahsho, harü mihtsürübonü Atungpuh bahyuka lah de nüsanü amükheahbah.”

³¹ Tüsho apinü harü yu thakhamshu arü bukkhüp alo azüabah,

³² tüsho alonü amün kabahle arü lung betsührübo, Kora lung mihtsürü alala tüsho arü kukrukbo muyuabah.

³³ Jumonü arü le arü lung lakhi mihtsürübo arhangnü alo khün ching yüzahbah; alonü arü hüpdoabah, tüsho arübo boto bolungnü dükheakabah;

³⁴ tüsho arü mühide alarü Israelrü alala zhide alihyukbah tso, tümüde arünü tha, “ Alonü isa she muyubah mütsüle!”

³⁵ Tüsho Atungpuh kilimnü mo akhiukbahle arhümthüneabe jihrü mihtsürü 250 ju taksahabah.

Mophurubo

³⁶ Tüsho Atungpuhnü Mosa ki tha,

³⁷ “ Amükeambuh Aron tsührü, Eleazar ki mo chingnü phurubo ju thrükhitang de thaang, tümüde jurübo amüsüh ah, tüsho mo ju limshude hiumüzüta bahang.

³⁸ Arü me azhihde neak yihbeakrü yo mophuru ju kingaün sadam lüpdopü thsüde phurubeak kamde yümnakshang, tümütüsho arübonü ju Atungpuh miki jihmonü amüsüh kamdo; tüsho jurübo Israelrü thsungkheaknü amütsan thsübah.”

³⁹ Jumonü Eleazar amükeambuhnü taksahabahrübonü ajihkhi müwayinchi mophurubo lu tüsho kingaün sadam lüpdopü thsüde kingbeak,

⁴⁰ tüsho ju Israel tsührübo thsungkheaknü mümih-mütsan thsü, junangde api ki Atungpuhnü Mosa hode alokhikhi nangde Aron tsührübo khah hobah püpürü shenü she Atungpuh miki arhümthüneabe jihpü marü, jude yungsho api ju Kora tüsho api jingyanrübo ruk kambah.

Aronnü Mihtsürübo Khümkhit

⁴¹ Ashidopü Israel mihtsürü boto alalanü Mosa tüsho Aron azhihde tha, “Nüsanü Atungpuh mihtsürü laksahdo.”

⁴² Tüsho küyimki botonü Mosa tüsho Aron azhihde mukhungkhea, anenü arüngkhimyam lim abin; zukleangnü amonü ju liudoabah, tüsho Atungpuh müretahkhi akhiuk.

⁴³ Judüki Mosa le Aron ane arüngkhimyam ki arü.

⁴⁴ Tüsho Atungpuhnü Mosa ki tha,

⁴⁵ “ Harü boto chingnü tsoakhinang, tüsho inü arübo khülangkiyu thsüde akheamshihbah,” tüsho ane miro zhinabah.

⁴⁶ Jumonü Mosanü Aron ki tha, “ Mophuru khülang kingaün sadam kheaknü lubah ju ching mo tüsho arhümthüneabe yukang tüsho ju nahde lubahle boto kilim yübah arü thsungkheak dünthsükhiang; tümüde bukakhiukkhi Atungpuh kheaknü wukhiukdo. Arüm tankihabahdo.”

⁴⁷ Mosanü athakhi nangde Aronnü ju lubahle boto phulung yü; tüsho arüm ju boto ching tankih-a lakheah. Jumonü apinü mokhih kheak arhümthüneabe yukbahle mihtsürübo thsungkheak dünthsü,

⁴⁸ tüsho apinü asherü le arhang larü dükeak zhip; jumonü arüm ju tukloabah.

⁴⁹ Kheakü Kora lung sherü mükhede, arümnü ashekhi 14,700 lakheah.

⁵⁰ Jumonü Aronnü Mosa kilim ashorupung khimyam ripit ki alode yü, tümüde arüm ju tukloa lakheah.