WÜHKHE 14 - AMÜSÜH HÜM CL Bible (BSI)

Israelrünü Reanglokhi

¹ Judüki boto alalanü düsheak achangnü zhi; tüsho mihtsürübo ju re trip.

² Tüsho Israelrü alalanü Mosa le Aron azhihde dapdapneangneang; boto alalanü ane ki tha, “ Isabo Ijip lo chingnü pü sheabahkhülaa! Yungsho isa ha sunglo chingnü sheabahkhülaa!

³ Tümüde Atungpuhnü isa ha lo ching nukshangnü asheshihpü bede yücho le? Isa niuberü tüsho isa tsührübo laksahkhambah; isa Ijip lim alode ayükhipü atsübe thsüba shi?”

⁴ Jumonü arünü khülangnü khülang kheak thaachih, “ Isanü wühkenorü mokhitanü, tüsho Ijip lim alode yüanü.”

⁵ Mosa le Aron anenü Israelrü amukhungrü boto miki mükhüm.

⁶ Tüsho Nun tsührü Jihusua tüsho Jephunne tsührü Kaleb, lomi zütakheah lung benenü khimmih thorüp,

⁷ tüsho Israel mihtsürü boto ki tha, “ Isanü züta kheahde hode ayükhi lo ju khide tsüdaklah.

⁸ Atungpuhnü isa kheak asühsho, apinü isa ha lomi ching bede ayübah tüsho niuhke le mukhuke bukde alakhi lomi ju isa kilim jihbah.

⁹ Atungpuh azhihdü lang duwusu; tüsho lomi ching larü mihtsürü dütre, tümüde arübo isa thsungkheaknü yikhap ah; arü tsungdojihbuh Thrünpuh arü kheaknü akhinabahdo, tüsho Atungpuh isa lung lah; arübo dütre.”

¹⁰ Tüshe boto alalanü ane rusahabahpü asukachih, judüki Atungpuh müretahkhi ashorupung khimyam ching Israelrü mihtsürü alala miki akhiuka huh.

Mosanü Mihtsürübo thsungkheak Tamkhüntamnü

¹¹ Tüsho Atungpuhnü Mosa ki tha, “ Harü mihtsürübonü külokhüh I bahyukba? Tüsho inü arü bolung khinthiyinbe huhhuh she, arünü külokhüh I kheak mükinba?

¹² Inü arü ashebe tukthsünü ashikbah tüsho arü yamrüplurüp mulushih, tüshe inü nü arü kheaknü trük ato tüsho amürangbe kamshihbah.”

¹³ Tüshe Mosanü Atungpuh ki tha, “ Judüasho Ijiprübonü ha dünkheak sobah, tümüde nü sühmüh hode harü mihtsürü arü bolungnü bede atu,

¹⁴ tüsho arübonü ha dünkheak ju lomi ching larübo ki thabah. O Atungpuh , nü ha mihtsürübo lung lah de arünü so, Atungpuh , nü mironü miro ngü tüsho nü yo amo arü kumung zhip; tüsho animung amo dungto chingnü tüsho are mo dungto chingnü arü mikhuh nü yüchoh.

¹⁵ Kheakü nünü harü mihtsürü khülangkinü laksahsho, nü dünkheak sorü trükshihbonü athabah,

¹⁶ ‘ Tümütüsho Atungpuhnü harü mihtsürübo apinü ajihpü alokhikhi lo ching bebah marükhuk, jumonü apinü arübo sunglo ching laksah-a lah.’

¹⁷ Jumonü kheakü inü mushuchoh, nünü asukkhi yande, Atungpuh wu huhang:

¹⁸ ‘Atungpuhnü bukakhiukpü müniokheamchoh tüsho mihmüthsüm ching suhdahlah, neak tüsho azhihde-wusukhi bahjihchoh; tüshe apinü arü bebuhrü neak dünkheaknü tsührübo tüsho tsührü-tsührübo kheak lün mahsam tüsho lün phüyi khiungde mülakphahde athsümüchihbah.’

¹⁹ Nü mihmüthsüm tokhi tüsho Ijip chingnü kheakü khiungde harü mihtsürü neak bahjihkhi nangde, harü mihtsürü neak bahjang de inü tamkhüntamnüchoh.”

²⁰ Tüsho Atungpuhnü tha, “Nü yu yande, inü neak bahjihdo;

²¹ tüshe tsükjide I lale, alomi athrünkhi I müretahkhinü amibah–

²² tümütüsho Ijip sunglo ching I müretahkhi, tüsho inü khinthiyinbe rhimokhi ngürü mihtsürü alalanü kheakü I ki thürü ki rükakido, tüsho I yu mani,

²³ inü arü bebuhrü ki thiyuchihchimkhibo tsükjide arünü müngü, yungsho I bahyukrü shenü she ju müngü.

²⁴ Tüshe I yamlarü Kaleb kheak me büthsüde alakhi hode mulong jihde I yan, api yükhi lo lim inü api bedarübah tüsho atsührü-tsührübonü ju yamrüplurüp lubah.

²⁵ Kheakü Amalekrü tüsho Kananrü jindükhün ching lachoh, shido rholoang tüsho Amürüm Keto limro yande sunglo lim tsahmusuang.”

Atsanglorü Thsümüchikhi

²⁶ Tüsho Atungpuhnü Mosa tüsho Aron ki tha,

²⁷ “ I azhihde dapdapneangneangkhi amütsü boto kheak inü külokhüh arümpü? Israelrü tsührübonü I azhihde dapdapneangneangkhi inü sodo.

²⁸ Arübo ki thaang, Atungpuhnü tha, Tsükjide I lale, inü sode nüsanü tümü thakheanü inü nüsa ki rhimobah:

²⁹ nüsa kam mukunü akumung wühkhe lurü, I azhihde dapdapneangneangrü ashemibo sunglo ching keambah.

³⁰ Jephunne tsührü Kaleb tüsho Nun tsührü Jihusua ane kheak hode, nüsa sheshe inü alokhikhi lo ching müyüzah.

³¹ Tüshe thsümütsü ngübah de nüsanü athakhi nüsa tsührübo a, nüsanü abahyukkhi lomi ching inü bede yüzahbah tüsho arünü ju lomi mükheahbah.

³² Tüshe nüsa ha sunglo ching shekhambah.

³³ Tüsho nüsa tsührübo sunglo ching kam yirü rümde atsahbah, tüsho nüsa ashemi sunglo chingnü mükheam khiungde nüsanü thiyuro mülakhi dünkheak thsünübah.

³⁴ Nüsanü lomi zütakheahkhi nimung yirü yande nimung khülang dün kam khülang ju kam yirü, nüsa münean hanbah, tüsho inü abahyukkhi nüsanü amükheahbah.

³⁵ I Atungpuhnü ha thado; ha amütsü boto I azhihde amukhungrü kheak dükde inü arhimobah. Ha sunglo ching arübo akheam thsübah, tüsho ju ching arü shebah.”

³⁶ Tüsho Mosanü lomi züta kheahpü thiyikhi mihtsürübo, sherübonü alodarübah lomi yusheak akeangyu jihde boto alala api azhihde dapdapshihkhea,

³⁷ lomi chingnü amütsü yusheak hanbah arürü mihtsürübo, arümnü Atungpuh miki sheabah.

³⁸ Tüshe Nun tsührü Jihusua tüsho Jephunne tsührü Kaleb anea lomi züta kheahpü yürü mihtsürü bolungnü aninga arhang la.

Lomi ching Kühde Yüzahkhi Akhuhbe

³⁹ Küyimki Mosanü Atungpuh yu Israelrü mihtsürübo ki thakhea, mihtsürübonü khitode tüzho.

⁴⁰ Tüsho arünü yapsu mükikde asürübahle awung mujuk kheak wutu tüsho tha, “ Isa ha ching lah, tüsho Atungpuhnü alokhikhi dangpung ching isa wutubah, tümüde isanü neak yihbeakdo.”

⁴¹ Tüshe Mosanü tha, “Kheakü tümüde nüsanü Atungpuh yukhüm thsümünimcho? Ju akuk müngü.

⁴² Duwutu, jude yungsho nüsa ririnü nüsa kukbah, tümüde Atungpuh nüsa bolung müla.

⁴³ Tümütüsho Amalekrü tüsho Kananrü nüsa müngüh lah, tüsho nüsa nukshangnü akeamshihbah; tümütüsho nüsanü Atungpuh kheaknü alode tsodo, Atungpuh nüsa lung lapü yung.”

⁴⁴ Tüshe Atungpuh tangzüng sangdan tüsho Mosa binkheampung chingnü matrüttrüt she arünü awung mujuk ching wutupü mürang.

⁴⁵ Tüsho ju wung ching larü Amalekrü le Kananrü akibah arü yanyukabah tüsho Horma khiungde yande müsham.