WÜHKHE 13 - AMÜSÜH HÜM CL Bible (BSI)

Rükajamrü Yüshihkhi

¹ Tüsho Atungpuhnü Mosa ki tha,

² “ Inü Israelrü mihtsürü kilim jihkhi Kanan lo züta kheahpü mihtsürübo thiyia yüshang; arü buhrü trük aban ching arü bolung limberü thsüde nünü mihtsürü thiyiang.”

³ Jumonü Mosanü arübo Atungpuh yukhüm yande Paran sunglo ching yüshih; arübo Israel mihtsürü bolung azothsürübo lakheah.

⁴ Tüsho arü mungbo ju harü lakheah: Reuben trük chingnü, Zakkur tsührü Shammua.

⁵ Simeon trük chingnü, Hori tsührü Shaphat;

⁶ Juda trük chingnü, Jephunne tsührü Kaleb;

⁷ Issakar trük chingnü, Josep tsührü Igal;

⁸ Ephraim trük chingnü, Nun tsührü Hoshea;

⁹ Benjamin trük chingnü, Raphu tsührü Palti;

¹⁰ Zebulun trük chingnü, Sodi tsührü Gaddiel;

¹¹ Josep trük chingnü (ju Manase trük chingnü), Susi tsührü Gaddi;

¹² Dan trük chingnü, Gemalli tsührü Ammiel;

¹³ Asher trük chingnü, Maikel tsührü Sethur;

¹⁴ Naphtali trük chingnü, Vophsi tsührü Nabi;

¹⁵ Gad trük chingnü, Maki tsührü Geuel.

¹⁶ Mihtsürü harübo ha alomi züta kheahpü Mosanü ayüshihkheah. Tüsho Mosanü Nun tsührü Hoshea mung ju Jihusua de müthrijih.

¹⁷ Jumonü Mosanü arübo Kanan lo züta kheahpü thiyi, tüsho arü ki tha, “Negeb hode awung lomi ching yüang,

¹⁸ tüsho alomi ju küdürüanü kheahang, tüsho ju lomi ching larü mihtsürü ju müküpla shi yiuhyiuhla, anükhüh a shi ahihkhüh a,

¹⁹ tüsho arü lakhi lomi ju tsüla shi mütsü, arü lakhi kiutobo ju chipi thsüla shi müthsü,

²⁰ tüsho alo ju tsüla shi mütsü, tüsho ju ching sangdung la shi mülanü kheahang. Mulong toang, tüsho ju lo chingnü akhiukkhi sangaso khürü hanbah arang.” Ju kurungaso münpü kim lakheah.

²¹ Jumonü arünü Hamath phünide Zin sunglo chingnü Rehob khiungde züta kheah.

²² Arünü Negeb lim wutu, tüsho Hebron lim arü; tüsho ju ching Anak atoshang tsührübo Ahiman, Sheshai, tüsho Talmai pürü lakheah. (Hebron ju Ijip ching Zoan kheaknü kam thünenü akhuh thrüna lakheah.)

²³ Arübo Eshkol dükhün ching arü tüsho arünü ju ching kurungaso düchi lipkhibahle amülangmonü mihtsürü mahne dükeak sang riyukbahle han, arünü tsarümkiu tüsho khubasobo she hanbah arü.

²⁴ Ju dangpung ki ju Eshkol dükhün de ji, tümütüsho Israelrübonü ju ching kurungaso düchi lipkhi.

²⁵ Nimung yirü dunglim arübonü lomi züta kheahbah alodarü,

²⁶ tüsho arübo Mosa le Aron tüsho Israelrü boto kilim Paran sunglo Kadesh ching arü; arünü thiyusheak hanbah ane le boto ki arü, tüsho ju lomi ching yo sangaso huh.

²⁷ Tüsho arünü Mosa ki tha, “Nünü athiyikhi lomi ching isa yüdo. Dükde ju ching niuhke tüsho mukhuke bukchoh, tüsho ha ju ching yo sangaso ah.

²⁸ Kheaküshe, ju ching lakhi mihtsürübo müranglah; kiutobo ju ayündolah tüsho amülakbo ah; kheaküshe ju ching isanü Anak tsührübo ngüdo.

²⁹ Amalekrü düjing lomi ching lah, Hitrü, Jebus, tüsho Amorrübo awungbo ching lachoh; tüsho Kananrü Mediterranean keto yean le Jordan keto yean ching lah.”

³⁰ Kalebnü mihtsürübo düsheak makhiukshihde yankhiabah tüsho Mosa ki tha, “ Isa khülang ki wutubah alo ju luanü tümüde isanü ju ayankhikhukbah.”

³¹ Tüshe Kaleb lung yürü mihtsürübonü tha, “ Isa jurü mihtsürü azhihde muwutukhuk, tümüde arü isa kheaknü amüküpbeah.”

³² Jumonü arübonü zütakheahkhi dünkheak thiyusheak amütsü Israel mihtsürübo ki tha, “ Isanü zütakheahkhi lonü ju ching larübo lang she tsühyungpü suhdahde akhiuka mükip, isanü angürübo alala atoshang lang ah.

³³ Tüsho isanü ju ching Nephilimrü ngüdo (Nephilim chingnü arükhi Anak tsührübo); tüsho arü miki isabo sangyü-tangkhobo ruk lang kamdo.”