WÜHKHE 12 - AMÜSÜH HÜM CL Bible (BSI)

Miriam Thsümüchikhi

¹ Mosanü Kushberü lukhi dünkheak Miriam le Aron anenü azhihde tha.

² Anenü tha, “Atungpuhnü Mosa hodü lang asukkhea de? Apinü isa hodü she masukkhea de?” Tüsho Atungpuhnü ju so.

³ Mosa ju alomiküp kheak larü alala kheaknü khide azhihayih mihtsürü lakheah.

⁴ Zukleangnü Atungpuhnü Mosa, Aron tüsho Miriam ki tha, “Nüsasam arüngyam ching akhiukang.” Jumonü arüsamnü wukhiuk.

⁵ Tüsho Atungpuhnü amo dungto ching akhiukbahle arüngyam ripit ki zhip tüsho Aron le Miriam büne ji: tüsho ane chido mikhuhlim yü.

⁶ Tüsho Atungpuhnü tha, “Kheakü I yu aniang! Küyimki nüsa bolung wukihrü labanü, inü arü michih ching I akhiuka huhchoh tüsho inü arü kheak milim ching asukachihchoh.

⁷ I yamlarü Mosa ki a ju ruk yung; inü api Israel mihtsürü athrünkhi kurungkheak zojihlah.

⁸ Jumonü inü api kheak mironü miro khipkhitde asukachih, neamneamde yung; tüsho apinü Atungpuh pang she ngüdo. Jumonü tümüde nükenü I yamlarü Mosa azhihde athapü mütrekhea?”

⁹ Tüsho ane kheak Atungpuh bukakhiukkhi alü kam, tüsho api tsoabah;

¹⁰ tüsho küyimki amo ju khimyam kumungnü atsokheanü, kheahang, Miriam kheak apham phürüm müyekhi nangde akhiuk. Aronnü Miriam kilim abina kheahshe alibe apham kih-a lakheah.

¹¹ Tüsho Aronnü Mosa ki tha, “O I tungpuh ike düthsümüchi tümütüsho ikenü mudukmükede neak yihbeakdo.

¹² Nihbuh berü buk chingnü azübechoki shih thripkhüh tsüabahkhi nangde muzhobah alibe ashekhi dükamshih!”

¹³ Jumonü Mosanü Atungpuh ki zhide tha, “O Thrünpuh, alibe thsüngujang de inü nü ki mushuchoh.”

¹⁴ Tüshe Atungpuhnü Mosa ki tha, “ Anihbe abuhnü alibe jak kheak mukhiukkih-a lasho, anihbenü nimung thüne mungchih mulubea de? Jumonü anihbe binkheampung aleanglim nimung thüne rihdoa binshang, tüsho jushu alibe belode azahang.”

¹⁵ Jumonü Miriam ju binkheampung aleanglim nimung thüne rihdoa zo; tüsho Miriam belode mazahyi khiungde mihtsürübonü mütsahmusu.

¹⁶ Jushu mihtsürübo Hazeroth chingnü tsahmusude yübah Paran sunglo ching binkheam.