TÜZHOKHI 5 - AMÜSÜH HÜM CL Bible (BSI)

Mihmüthsüm thsungkheak Tamkhüntamnü

¹ O Atungpuh , isa kheak tümü keamkih-a lanü lümkhitjang; mürüngang, tüsho isa achih ngükhi kheahang!

² Isa yamrüplurüp mihsorü kilim tsodo, isa yambo khiungkerü kilim tsodo.

³ Isa mürerü, buhrü-mülarü kamdo; isa berübo khimoberübo nangde lah.

⁴ Isanü ayungkhi ke dün isanü ajihpü kamchoh; atakbe-sang athulopü kamchoh.

⁵ Isa müshamrübo isa lahzhi ki lah; isa khia lah, isa sühakhim müla.

⁶ Yikhap suhde angüpü isanü Ijip tüsho Asiria kheak arihdo.

⁷ Isa jipürübonü neak yihbeak; arü kheaküa müla, tüsho isanü arü amülimbo hanlah.

⁸ Azhorübonü isa kurungkheak yakzan shuhchoh, arü khah chingnü isa bekhitpü she müla.

⁹ Isa rhangdungbo atrebe chingnü isanü yikhap ngüchoh tümütüsho sunglo ching nukshang lah.

¹⁰ Khümzungnü isa küp mokin nangde taklah.

¹¹ Zion ching aliberübo, Juda kiutobo ching atsangkhitkhibo kheak amütsü thsüdo.

¹² Yakzanshuhrübo arü khahbo kheaknü zhinlah; azothsürübo ki wüntre müjih.

¹³ Athrününgtsüngbo hi chupü nimkihchoh, tüsho athrürü nunubo sanghahnü ajapchoh.

¹⁴ Azobuhrübonü kiuto chipiripit bahbah tsodo, athrününgtsüngbonü khün müthsüdebahdo.

¹⁵ Isa mulong asühkhi keamdo; isa tsünkhi ju mitrippü kamdo.

¹⁶ Isa ku kheaknü kuthran ayokhido; isa are, tümüde isanü neak yihbeakdo!

¹⁷ Ha dünkheaknü isa mulong tukthsülah, harübo hode isa mükbo tsünshelakdo kamdo:

¹⁸ Zion müzüng zhikrangkhündo alakhinü shirungbonü ju kheak apheanchoh.

¹⁹ O Atungpuh , tüshe nünü lünnü kiulongthsüchoh; nü kiulongthsü-binkiu lünnü lün lachoh.

²⁰ Tümüde nünü isa shahde mih-a la? Tümüde nünü isa haruhroro bahyukkhea?

²¹ Isa nü kilim beloang, O Atungpuh , junangde isa lalobah; adüso nangde isa nimungbo aso kamshang–

²² nünü isa shahde bahyuka mülasho, tüsho makekhukpü thsüde bukakhiuka lah yungsho.