TÜZHOKHI 3 - AMÜSÜH HÜM CL Bible (BSI)

Thsümüchi, Mulong Rholokhi, tüsho Mulonglam

¹ Thrünpuh bukakhiukkhi tsonü thsünükhi ngübuh I ah;

² apinü I yanyuka bahdo tüsho ayin mülakhi amiting ching I tsahshih;

³ I azhihde apinü nimung amuyung alochode akhah rholodo.

⁴ Apinü I shihtsü tüsho I küp aneankhishih tüsho I robo yihshak;

⁵ apinü I thsümütsü tüsho thsünü rihyam ching rihdo.

⁶ Apinü I adüsonü ashekhi nangde amiting ching binshih.

⁷ Apinü I khiungdoabah, junangde inü mutsokhitkhuk; apinü yinchiliu amülangnü I rhük;

⁸ Inü arung thsungkheak jiji she tüsho zhizhi she, apinü I tamkhüntamnü musojih;

⁹ akheankhi lungbonü apinü I limro yihdojih, apinü I limro khürangshih.

¹⁰ Api I aleangde ayapkhi kuto khülang nangde, kekhüzü khülang nangde jika lah;

¹¹ apinü I limro chingnü yanyukabah tüsho adütre kamde sükthünak; apinü I zhikrangkhündo kamshih;

¹² apinü api sanglüh hünkih tüsho I api hühzo münchi-thsüpung kamshih.

¹³ Apinü hühzopung ching yo hühzo I pang ching kipyuk;

¹⁴ I a I mihtsürü alala münedung kamdo, nimungroro arü keangrümüne khün lah.

¹⁵ Apinü I akhühnü mishih tüsho akhühkenü müshangshih.

¹⁶ Apinü I hü lungjinim kheaknü thüleakshih tüsho awah ching I phamshih;

¹⁷ I mungtsü müladebahdo, latsühlayung inü mihabahdo;

¹⁸ jumonü inü tha, “ I müretahkhi tüsho Atungpuh kilimnü I mulonglamkhi alala tsodo.”

¹⁹ I thsünükhi, tüsho rümde atsahkhi akhüh müzüm inü lümkhitchoh!

²⁰ I menü ju mutukzhakde lümchoh tüsho I pang ching keamyukchoh.

²¹ Tüshe ha I lüm ching inü lümkhitchoh, jumonü I mulonglam lah.

²² Atungpuh amuzho adüküng küyimkishe mükheam, api mihmüthsüm küyimkishe mükheam;

²³ arübo yapsu aban aso lah; nü thülünkhi ju ato ah.

²⁴ “Atungpuh ju I shihcham,” I menü thachoh, “Jumonü inü api kheak mulonglambah.”

²⁵ Atungpuhnü api aleangrü, api yimrü kheak tsülah.

²⁶ Khürünü Atungpuh akhümkhit thsungkheak zhikde aleangkhi ju tsülah.

²⁷ Khürünü athunuchoki arümkheamkhi ju tsülah,

²⁸ api alangzü zhikde binshang tümütüsho Atungpuhnü api kheak ju yihkihjih-a lah,

²⁹ api mün asungthulung ching lashang, khükijua ju ching mulonglam labah.

³⁰ Amüchip damrü kilim amüchip leangshang, tüsho mükhemürangnü mishihang.

³¹ Tümüde Atungpuhnü lünnü mübahyuk.

³² Apinü mulong rozhak jihjih she anihbuh amuzho düküngkhi yande apinü mihmuzho labah;

³³ tümüde apinü künsahde mihtsürü tsührü müthsünüshih yungsho mulong murozhakshih.

³⁴ Küyimki lomi ching aramrü alala api jing khüp jubanü,

³⁵ küyimki mihtsürü alimbo Khide Achang miki bephülapbanü,

³⁶ küyimki khürü thiyuro lakhi bephülapbanü, Atungpuhnü ju müngü de?

³⁷ Atungpuhnü mümulongsho shepünü thiyukhüm jihpü tüsho ju rhimokhukpü?

³⁸ Ha Khide Achang mün chingnü atsü tüsho amütsü arüchoh yung de?

³⁹ Küde thsah arhang larü mihtsürünü arü neakbo dünkheak thsümüchikhi arünü atsanglopü?

⁴⁰ Isanü isa limrobo ajamakheahanü tüsho jurü rükakiakheahanü, tüsho Atungpuh kilim rholoanü.

⁴¹ Isanü isa mulongbo, isa khahbo Thrünpuh kilim yinmi ching shuhkihanü.

⁴² Isanü lakmünimdo tüsho azhihdo tüsho nünü neak mübahjih.

⁴³ Nü bukakhiukkhinü nü muhiudo tüsho isa müsham, mihmuzho mülade laksah;

⁴⁴ nünü amonü nü hingdo, junangde tamkhüntamnükhi muhokhuk.

⁴⁵ Nünü isabo mihtsürü bolung amüneankhi tüsho sünit kamshih.

⁴⁶ Isa riribo alalanü isa azhihde arü münbo khimshuh;

⁴⁷ thsünü tüsho qimürip, abahyukkhi tüsho athsümünim isa kheak arü.

⁴⁸ I mihtsürü thsümünimkhi dünkheaknü I mükbo ching chike ayungbo bukchoh.

⁴⁹ I mükbo chingnü mükheamde sühakhim mülade abukbah,

⁵⁰ Atungpuhnü yinmi chingnü abinkhia mükheahyi khiungde.

⁵¹ I yo kiuto ching athunu liberü alala kuhi thsungkheak I müknü I mulong rozhakshihchoh.

⁵² Akeangnü I riribonü wuhnu khülang nangde I phuhdo;

⁵³ arünü I arhangnü alokhün ching nimyuk tüsho lungnü rhungdo;

⁵⁴ I ku kheak ke dütsüt; inü tha, “ I laksahdo.”

⁵⁵ Alokhün asük chingnü inü nü mung jichoh, O Atungpuh ;

⁵⁶ Inü mushukhi nünü sodo, “Arung thsungkheak inü azhikhi nü nükhün düyihdo!”

⁵⁷ Inü nü jichoki nü phünide arükheah; nünü tha, “Dütre!”

⁵⁸ Nünü I dünkheak mushudo, O Atungpuh , nünü I rhangdung rhokhitdo.

⁵⁹ I ki amülim rhimokhi nünü ngüdo, O Atungpuh ; I dünkheak mahkhapang.

⁶⁰ Arünü I azhihde mülapyukde royimkhi alala nünü ngüdo.

⁶¹ O Atungpuh , arünü I azhihde mükhemürangkhi alala nünü sodo.

⁶² I riribo phiphirarakhi tüsho dapdaprarakhi nimung amuyung I azhihde lah.

⁶³ Arübo bina lalashe yungsho asürürü she– kheahang I a arünü khün thsüde luhmünekhi lah.

⁶⁴ O Atungpuh , arü khahnü arhimokhi yande arü rhimobo dünkheak jihloang!

⁶⁵ Arü ki mulong thsünüpü jihang; nü muthrumünean arü kheak lashang!

⁶⁶ Nü bukakhiukkhi chingnü arü müshamang tüsho Atungpuh yinmibo khüpnü arü dükheakshang.