TÜZHOKHI 2 - AMÜSÜH HÜM CL Bible (BSI)

Atungpuhnü Jirusalem Thsümüchikhi

¹ Künangde Atungpuhnü abukakhiukkhi amonü Zion tsührübe liudola! Apinü Israel tsakamkhi yinmi chingnü alomi ching jipkhido; apinü api bukakhiukkhi nimung ajing thrümpung mülümkhit.

² Atungpuhnü mihmüthsüm mülade Jakob lapungbo alala muyuabah; api bukakhiukkhi ching apinü Juda tsührübe chipibo lukkheamjih; apinü kiulongthsü tüsho yakzanshuhrübo wüntre mülakhi ching alo lim thokhi.

³ Apinü müshakde bukakhiukkhi chingnü Israel sühmüh alala lipkhido; apinü thiriri mikinü akhah tsülim arü kheaknü tuklodo; apinü Jakob azhihde amühi alala aniuabahde takdo.

⁴ Thiriri khülang nangde api khah tsülimnü hünkih-a amudo; Zion tsührübe khimyam ching asühde angükhi alala apinü laksahdo; mo nangde api bukakhiukdo.

⁵ Atungpuh ju thiriri khülang nangde kamdo; apinü Israel tüsho kiulongthsürü-yambo muyuabahdo tüsho apinü anihbe chipibo thsümünimdo, tüsho Juda ching mitripkhi tüsho tüzhokhi alü kamshihdo.

⁶ Apinü api yünshim ju awündo nangde luka bahdo, apinü anihbuh mukhungyam thsümünimdo; Atungpuhnü Zion ching thünio tüsho amuni mihabahdo, tüsho abukakhiukkhi ching kiulongthsürü tüsho amükeamrü bahyukdo.

⁷ Atungpuhnü api kingaün sadam tüsho api arüngyam bahyukdo; apinü kiulongthsürü-yam chipibo thiriri khah ching jihdo; thünio nimung nangde Atungpuh yam ching düsheak khülang zhikihdo.

⁸ Atungpuhnü Zion tsührübe chipi thsümünimpü lümkihlah; apinü aru tholang; athsümünimpü chingnü apinü akhah mutuklo; apinü aheangsadam tüsho chipi tüzhoshih, arübo rukhühnü shekhia lah.

⁹ Anihbe chipiripitbo alo ching keamyukdo; apinü akhrihbebo yihshak tüsho thsümünimdo; anihbe kiulongthsürü tüsho yakzanshuhrü trükshih bolung lah; kheaküa yakzan müla, tüsho anihbe wukihrübo Atungpuh kilimnü michih müngü.

¹⁰ Zion tsührübe azothsürübo alo kheak zhikde binlah; arünü arü ku kheak awah yihkih tüsho shungliukhim phuyu; Jirusalem athunu liberübonü arü ku alo lim mükhüm.

¹¹ I mük chingnü chike kungabahdo; I mulong thsünüchoh; I mihtsürü thsümünimkhi mulong rozhakkhi hode I khia lah, tümütüsho azürübo le khungarübo kiuto kiudunglimrobo ching sheshichoh.

¹² Arübo yurirü nangde kiuto kiudunglimrobo ching sheshide, arü berü khüh kheak arübo keaksah-a lachoki, arünü arü berübo ki zhichoh, “ Yikhap tüsho yukhu küching la?”

¹³ Inü nü thsungkheak tümü thakhukba, tümü ki nü akeba, O Jirusalem tsührübe? Inü nü shukheampü thsüde tümü ruk laba, O atsangkhit Zion tsührübe? Tümüde keto zünmülihkhi nangde nü thsümünimkhi lah; shenü nü thsüngukhukba?

¹⁴ Wukihrübonü nü thsungkheak akeangyu tüsho mülapyukkhi michihbo ngüdo; arünü nü kuhibo ngülopü thsüde nü mülimkhi mülahkhit, tüshe nü thsungkheaknü akeangyu tüsho bemüchihpü müchityu ngüdo.

¹⁵ Limro tsahhorü alalanü nü kheak arü khahbo damchoh; arünü Jirusalem tsührübe kheak ish thsüchoh tüsho ku lukchoh; “ Khiukdahde akhamkhi de ajikhi kiuto alomi alala asühbe thsü ha a de?”

¹⁶ Nü riribo alalanü nü azhihde arü mün khimshuhchoh; arü ish thsüchoh, arünü hü mütrütchoh, arünü zhichoh: “ Isanü anihbe muyudo! Ah, ha isanü akünkhi nimung lah; akheam ching isanü ha ngüdo!”

¹⁷ Atungpuhnü tümü lümkheanü rhimodo, apinü api yu thakhi dünjido; apinü adüsonü thiyuzüng thsükhi nangde amuzho mülade thsümünimdo; apinü nü kurungkheak thiriri asühshihdo tüsho nü riri sühmüh shuhkihdo.

¹⁸ Atungpuh ki achangnü zhiang! O Zion tsührübe chipi! Ayung nangde chike animung tüsho are bukkhishang! Nü sühakhim dulu, nü tripkhi dütuklo!

¹⁹ Aheangpü tankihchoki azhing ching asürang, zhiang! Atungpuh miki ke nangde nü mulong bukkhitang! Nü tsührübo rhangdung lapü thsungkheaknü api ki nü khah shuhkihang, sherübo akhümkhinü kiudunglimro mungyean aban lungcho.

²⁰ Kheahang, O Atungpuh , tüsho lümakheahang! Shepü ki nünü ha rhimokhea? Azoberübonü arünü azübekhi tsührü tsühba shi? Amükeamrü tüsho wukihrübo Atungpuh arüngyam ching laksahba de?

²¹ Athunu tüsho azorü kiudunglimrobo ching alo kheak yaplah; I yo athunu liberübo tüsho athunu athrürübo nukshangnü keamdo; nü bukakhiukkhi nimung ching nünü mihmüthsüm mülade arü laksahdo,

²² Thünio nimung khülang nangde nünü mühi alala chingnü I riribo juyukdo; tüsho Atungpuh bukakhiukkhi nimung she mutsokhit yungsho maning; shepü inü zübekhea tüsho mütrükheanü I ririnü thsümünimdo.