TITA 3 - AMÜSÜH HÜM CL Bible (BSI)

Khristan Yakliyakko

¹ Yakzanshuhrü tüsho thiyukhümsühmüh khüp lapü, mihyuanipü, thiyuro rhimo tümü thsüthsü she arhimopü thsakhama lapü,

² she dün amütsü masukpü, mungtsü tüsho müyamrü thsüpü tüsho alala ki thiyuro azhihayih huhpü arü ki lümkhitshang.

³ Tümüde isa she khülangki makhade mihyumanide, tsophülapde, shihkünkhi tüsho asühara aphuaphu azhorü thsüde, isa nimungbo alungchihpü, mükthsüpü, mihtsürü khülangnü khülang thraneanachihde hoshih;

⁴ tüshe küyimki isa khümkhitrü Thrünpuh tsükhi tüsho amuzho amikheak akhiukkhea,

⁵ isanü thiyuro-lungki rhimokhi dünkheaknü yung tüshe api amüthsüm hode, zübelode müsühkhitde tüsho Amüsüh Me ching aso kamlode apinü isa khümkhit,

⁶ küpü apinü isa khümkhitrü Jisu Khrista hode isa kheak me suhdahde dungkihjih,

⁷ junangde api amüthsüm hode isa alim kamshihpü tüsho lün rhangdung mulonglam ching yamrüplurüp lurü kampü lakheah.

⁸ Ha thakhi dükdü ah. Inü a harü kheak nünü ningkihshihpü mulonglah, junangde sherünü Thrünpuh kheak kinkheanü atsü rhimopü kümkangbah. Harü ha atsüdak tüsho mihtsürübo kilim alü thsübe lah.

⁹ Tüshe makhade atsangachihkhi, lünkhe-yukean thrütkhi, achamnakbo, tüsho yakzan dünkheak rukachihkhibo bahang, tümüde jurü alü müla tüsho akeangkeang.

¹⁰ Achamnak akhiukshih mihtsürü ki mahne ki düh de thaang, tüshe jushu a api kheak tümü düthsü.

¹¹ Hadürü mihtsürü athsümünim ah de nünü mükheahang, tüsho api amülim ah de api neakbonü mütsanchoh.

Akheam Thsangdankhibo

¹² Küyimki inü Artema yungsho Tykika nü kilim thiyibanü, Nikopolo ching nü I kilim arüpü mürangang, tümüde tsüngkam a I ju ching mungpü pungkhilah.

¹³ Mahkhaprü Zena tüsho Apollo büne hantsahchoki nünü akukthürün rungang tüsho ane yihnüpü lakhi lüpdükhi kheahjang.

¹⁴ Atsütsü yihnüpü thsungkheak rungpü thsüde isa mihtsürübonü atsü rhimopü anikhitbeah; arünü alü mülakhi rhangdung mülabeah.

¹⁵ I lung larü alalanü nü kilim salüm mühahchoh. Akin ching isa muzhorü ki salüm thaang. Nüsa alala lung amüthsüm laang.