TITA 2 - AMÜSÜH HÜM CL Bible (BSI)

Thiyuro Kingaün-yakzan

¹ Tüshe tümünü thiyuro kingaünyakzan ayelanü nünü thsangyuang.

² Azobuhrü mihtsürü ki arümkheampü, mulong jihpü, kurhangpü, tüsho akin ching, amuzho ching, tüsho rünkhiungpü ching düküngpü thsangyuang.

³ Junangde azoberübo ki yakli ching wüntre lapü, dünthamungtha mülapü yungsho yukhu yo azhorü mükampü thsangyuang; tümü atsüanü arünü thsangyubeah,

⁴ tüsho anüphulungrübonü nihbe niubuhrü tüsho tsührübo muzhopü,

⁵ zangrü danyukpü, atsangkhitpü, niubuhrü bukkhüp lade mütsanmükühpü, junangde Thrünpuh yu mükhemükim müthsüde alabah.

⁶ Junangde athunu athrürübo ki she arü nihbuh danyukpü tuthsukang.

⁷ Lüpdükhi ching atsü rhimode arü ki amütsan huhang. Nü thsangyukhi ching thiyuro mulong jihkhi

⁸ tüsho mübahyukkhukpü thsüde tsüdakde athakhi huhang, junangde sherünü nü ki azhihchonü isa dünkheak amütsü thapü mülamonü achih ngübah.

⁹ Yamlarübonü arü putungrü bukkhüp lapü tüsho lüpdükhi ching reangkeamde wüntre jihpü thsangdanang; arünü thiyu malolobeah,

¹⁰ yungsho arü kheaknü mahühbeah, tüshe arü kheak dükde mulonglam lakhi huhbeah, junangde lüpdükhi limro ching arünü isa khümkhitrü Thrünpuh dünkheak thsangyukhi alunebe kamshihbah.

¹¹ Tümüde mihtsürü alala khümkhitpü thsungkheak Thrünpuh amüthsüm akhiukdo,

¹² akin mülakhi tüsho alomi yihnelune bahyukpü tüsho adanyukpü alungki, tüsho ha lomi ching akinrü thsüde alapü,

¹³ isa müngühmühi mulonglam aleangpü, isa ato Thrünpuh tüsho akhümkhitrü Jisu Khrista müretah akhiukpü thaa huhdo.

¹⁴ Apinü isa mülimkhibo alala chingnü rhokhitbah atsü rhimopü mulongrü api mihtsürü thsüpü thsungkheak tsangkhitpü isa thsungkheak anihbuh jihabah.

¹⁵ Harübo khipkhitang; thiyukhümsühmüh alalanü tuthsukang tüsho thürühang. Shenü she nü mükhemürang düthsüshih.