THRÜNTAN 48 - AMÜSÜH HÜM CL Bible (BSI)

Jakobnü Ephraim tüsho Manase Müngühjihkhi

¹ Kim anükhüh dunglim Josep ki tha, “Nü buh tukthsülah”; jumonü apinü atsührüne Manase tüsho Ephraim api lung bebah Jakob shorupü yü.

² Tüsho Jakob ki tha, “Kheahang, nü tsührü Josep nü kilim arüchoh”; tüsho Israelnü anihbuh reangzahlo tüsho yapkiu kheak bin.

³ Judüki Jakobnü Josep ki tha: “Wuto Thrünpuh Kanan lomi Luz ching I ki akhiuk tüsho I müngühjih,

⁴ tüsho I ki tha, ‘Kheahang, inü nü aso asoshihbah tüsho wüh bushihbah, tüsho inü nü yimto mihtsürü kamshihbah, tüsho nü dunglim ha lomi akheam müla yamalo thsüde nü tsühsoniusobo kilim jihbah.’

⁵ Tüsho kheakü I Ijip ching nü kilim marüyide Ijip lomi ching nü kilim zübejihkhi tsührü Ephraim tüsho Manase büne I yo ah; Reuben tüsho Simeon nangde, ane I yo thsübah.

⁶ Nü münübo ane dunglim ngükhi nü yo thsübah, tüsho arü yamrüplurüp ngüpü ju Ephraim tüsho Manase hode arübah.

⁷ Tümütüsho I Paddan chingnü arüchoki, Ephrath lim yüpü limro adükeak anükhüh lade, Kanan lomi ching Rachel I kinü sheabah; tüsho inü anihbe Ephrath (ju Bethlehem) lim yüpü limro kheak kiuyukabah.”

⁸ Judüki Israelnü Josep tsührübo ngü tüsho tha, “Ha sherü a?”

⁹ Judüki abuh ki alo, “Ha dangpung ching Thrünpuhnü I kilim jihkhi I tsührübo ah.” Tüsho apinü tha, “Muzhobah arübo I kilim bede arang, tüsho inü arü müngühjihbah.”

¹⁰ Kheakü Israel shina amükbo thrimthrimkhinü müngükhukde alakheah. Judüki Josepnü ane api thüninde bebah arü, tüsho apinü ane müthsüpbah kap.

¹¹ Tüsho Israelnü Josep ki tha, “Inü nü miro ngüpü mülüm; tüshe Thrünpuhnü nü tsührübo she I huhdo!”

¹² Judüki Josepnü api mukhukbo kinü ane beakhin, tüsho apinü amiro alo lim thsübah khukning.

¹³ Tüsho Josepnü ane chido, akhah tsülimnü Israel khah huzulimpeang Ephraim tho, tüsho akhah huzulimnü Israel khah tsülimpeang Manase thobah api thüninde bedarü.

¹⁴ Judüki Jakobnü akhah thrütchahchihbah akheambuh thsüa lalashe akhah tsülimnü Ephraim ku kheak nimkih tüsho akhah huzulimnü adüjibuh Manase ku kheak nimkih.

¹⁵ Apinü Josep müngühjih, tüsho tha: “Thrünpuh shepü müngüh I buh pürü Abraham tüsho Isak tsahkhea, Thrünpuh shepünü I rhangdung amuyung khihni ha khiungde abekhea,

¹⁶ Yunirü shepünü amütsü alala chingnü I rhokhitkhea, azürübo müngühjang; tüsho arü kheak I mung tüsho I buh pürü Abraham tüsho Isak mung lashang; tüsho arübo alomi ching mihhihde kamshang.”

¹⁷ Küyimki abuhnü akhah tsülim Ephraim ku kheak yihkihkhi Josepnü angükhea, junü api masühde kam; jumonü apinü Ephraim ku kheaknü Manase ku kheak yihkihpü abuh khah kheak zhim.

¹⁸ Tüsho Josepnü abuh ki tha, “Jude yung, abuh, ha adüjibuh ah; nü khah tsülim api ku kheak yihkihang.”

¹⁹ Tüshe abuhnü reanglo tüsho tha, “Inü mükheahlah, I tsah-a, inü mükheahlah. Api she mihtsürü khülang kambah, tüsho api ato kambah; tüshe tsükjide akheambuh ha api kheaknü atobe labah, tüsho api tsühsoniusobo ju ahihdakkhi trükshihbo kambah.”

²⁰ Jumonü apinü ju nimung ane müngühjihde tha, “Nüke hode Israel müngühjihde athabah, ‘Ephraim tüsho Manase nangde Thrünpuhnü nüsa kamshang!’ ” Hanangde apinü Ephraim ju Manase müngüh kamshih.

²¹ Judüki Israelnü Josep ki tha, “Kheahang, I shechoh, tüshe Thrünpuh nü lung labah; tüsho nü pü pürü lomi ching nü belode ayübah.

²² Tüsho Amorrü khah chingnü I nukshang tüsho I sanglühnü ayankhikhi awung düpheak khülang nü keoniorübo kheaknü büthsüde nü kilim jihchoh.”