THRÜNTAN 44 - AMÜSÜH HÜM CL Bible (BSI)

Pung Dükheakkhi

¹ Tüsho apinü anihbuh yam kimthsübuh ki thiyukhüm jihde tha, “Mihtsürübo shungliuqiuqiubo ching arünü ahankhukkhi thülün tsühyungbe yukjang, tüsho nihbuh shungliu-qiuqiu mün ching mihtsürübo aban nihbuh sho yukjang.

² I yo shotoyinchi pung she, tüsho hi thulobe sho akheambuh shungliu-qiuqiu mün ching yukjang.” Junangde Josepnü athakhi yu yande apinü rhimo.

³ Ayinkhi akede, mihtsürübo tüsho arü donkibo thiyia yüshih.

⁴ Tüsho küyimki arübo kiuto chingnü wukhiukbah limshu müyüyide alakhea, Josepnü api kimthsübuh ki tha, “Asürübah mihtsürübo müshamang; tüsho küyimki nünü arü yanphuhbanü arü ki thaang, ‘Tümüde nüsanü atsü müthri amütsü jihlokhea?

⁵ Ha chingnü I tungpuhnü yungchoh yung de, tüsho hanü apinü arüngako rhimochoh yung de? Ha hode nüsanü amütsü rhimodo.’ ”

⁶ Jumonü apinü arü yanphuh, tüsho apinü harü yubo tha.

⁷ Tüsho arünü api ki alo, “Tümüde isa tungpuhnü hadürü yubo thacho? Nü yamlarübonü hadürü rhimopü isa kheaknü limshuabahang.

⁸ Kheahang, isa shungliu-qiuqiubo mün ching yo isanü angükhi sho Kanan lomi chingnü nü kilim hanlode arüdo. Dale küde thsah isanü nü tungpuh yam chingnü shotoyinchi yungsho suna ahühpü?

⁹ Nü yamlarübo shepü lung ju ngübanü api sheshang, tüsho isa she isa tungpuh azhorü thsübah.”

¹⁰ Tüsho apinü tha, “Nüsanü athakhi nangde thsang: shepü lung ju ngübanü I yo azhorü kambah, tüsho nüsa aningkhi a amudopü mülade alabah.”

¹¹ Judüki mihtsürü abannü nihbuh shungliu-qiuqiu alo kheak shuhkhi, tüsho khimshuh.

¹² Jumonü apinü azopü kheaknü yimmusubah akheambuh kheaknü kheam; tüsho pung ju Benjamin shungliu-qiuqiu chingnü ngü.

¹³ Judüki arünü arü khim thorüp, tüsho mihtsürü abannü nihbuh donki hah thsüloa mühahbah kiuto lim yülo.

¹⁴ Jumonü Juda tüsho api keoniorübo Josep yam ching arü, tüsho api ju ching lakheah; tüsho arünü api miki alo kheak khukning.

¹⁵ Tüsho Josepnü arü ki tha, “Nüsanü arhimokhi ha tümü a? I hadürü mihtsürünü arüngako rhimo hode ayimkhitbah de nüsanü mümükheahkhea de?”

¹⁶ Judüki Judanü tha, “Isa tungpuh ki isanü tümü thakhukba? Isanü tümü asukba? Yungsho isa amülim mülakhi küde thsah amütsanba? Thrünpuhnü nü yamlarübo mülimkhi yimkhitdo; isa le shepü lung pung ngükheanü isa chido, isa tungpuh yo azhorübo ha kheak lah.”

¹⁷ Tüshe apinü tha, “Inü jude athsüpü I kheaknü limshuang; tüshe shepü mihtsürü khah ching pung ngükheanü I yo azhorü thsübah. Tüsho nüsa a mungtsü chingnü nüsa abuh kilim yüang.”

Judanü Benjamin thsungkheak Mushukhi

¹⁸ Judüki Judanü api thüninde yü tüsho tha: “O I tungpuh, muzhobah nü yamlarünü I tungpuhnü sode thiyu khülang thashang; tümüde nü a Pharao ruk ah.

¹⁹ I tungpuhnü api yamlarübo ki keokhi, ‘Nüsa abuh yungsho nüsa niurü la shi?’

²⁰ Tüsho isanü isa tungpuh ki alo, ‘Isa abuh ashinbuhrü lah, tüsho api ashinshu tsührü, azürü lah; akhiung a sheabahdo, tüsho abe tsührü bolung api lang aninga lah, tüsho abuhnü api muzhochoh.’

²¹ Judüki nünü nü yamlarübo ki tha, ‘Api I kilim bede akiang, junangde inü api kheahanü.’

²² Tüsho isanü isa tungpuh ki alo, ‘Azübuhnü abuh müchamkhikhuk, tümüde apinü abuh chamkhisho, abuh ashebah.’

²³ Tüshe nünü nü yamlarübo ki tha, ‘Nüsa lung nüsa niurü makisho, nüsanü I miro müngülo.’

²⁴ Junangde küyimki isa nü yamlarübo isa abuh kilim wutukhea, isanü isa tungpuh yubo api ki tha.

²⁵ Tüsho isa abuhnü tha, ‘Yüloang tüsho isa thsungkheak tsühyungbe anükhüh thuloang.’

²⁶ Tüshe isanü alo, ‘Isa müyükikhuk; isa niurü akheambuh isa lung besho isa ayükibah; tümüde isa niurü akheambuh isa lung mübesho isanü mihtsürübuh miro müngüde alabah.’

²⁷ Judüki nü yamlarü I buhnü isa ki tha, ‘I niubenü I kilim tsührü 2 zübejihdo de nüsanü mükheahlah;

²⁸ tüsho khülang I kinü wukhiukabahdo, tüsho tsükjide api a adütre kamde thonakdo de inü tha; tüsho judükinü inü api müngü.

²⁹ Tüshe nüsanü ha she I mikinü bede tsobah api kheak thsümütsü yükihsho, nüsanü I ku buyiukkhi mulong rozhakde shekhün ching yüzahshihbah.’

³⁰ Jumonü kheakü, I nü yamlarü I buh kilim yübah tüsho azübuh isa lung mübesho, api rhangdung ju azübuh rhangdung kheak dakkihbah lale,

³¹ azübuh isa lung mübekhi ngüsho api ashebah. Junangde nü yamlarübonü isa abuh nü yamlarü api ku buyiukkhi mulong rozhakde shekhün ching yüzahshihbah.

³² Tümüde nü yamlarünü azübuh thsungkheak I buh ki hahmülang lude tha, ‘Inü api nü kilim belode marüsho, lünnü I buh miki inü mah hanbah.’

³³ Jumonü kheakü, muzhobah azübuh müthri nü yamlarü a I tungpuh azhorü thsüde tukloa lashang, tüsho azübuh a api khiungmungrü lung yüshang.

³⁴ Tümüde I lung azübuh mübede inü küde thsah I buh kilim yüpü? I buh kheak thsümütsü arüpü lakhi inü trelah.”