THRÜNTAN 41 - AMÜSÜH HÜM CL Bible (BSI)

Josepnü Kiulongthsüpuh Milimbo Thanakkhi

¹ Kam mahnepü akheam lim Pharao milim khülang lakheah; api Nile ayung miki zhip.

² Zukleangnü ayung chingnü moshi thüne, akheah atsü tüsho shihkih-a akhiuk; tüsho arünü sangrung tsühpü tankih.

³ Judüki püpü moshi thüne trukkhita ashih-mükihde ayung chingnü akhiuk, tüsho ayung yean püpü moshibo ki zhip.

⁴ Tüsho trukkhita ashih-mükihkhi moshibonü akheah atsü tüsho ashih-kihkhi moshibo ju tsühabah. Jushu a Pharao asürüabah.

⁵ Kheaküshe api yapshede yü tüsho mahnepü milim khülang mi: Hidung khülang kheaknü aye thüne liuhliuh tüsho tsüde akhiuka lakheah.

⁶ Jushu aniyüzahlim pungnü ayündüsükkhi aye thüne arü dunglim akhiuk.

⁷ Tüsho adüsükkhi aye thünenü aliuhliuh aye thüne ju muyuabah. Pharao asürü, tüsho ju milim khülang lakheah.

⁸ Jumonü yapsu api me küpkhukde alakheah; apinü thiyia yüshihbah Ijip wurük-huhrü tüsho lümlung lakhi mihtsürü alala ji. Pharaonü arü ki api milim tha, tüshe Pharao thsungkheak jurü thanakpü she mülakheah.

⁹ Judüki pung-jihrü azopünü Pharao ki tha: “Khihni inü I mülimkhi lümkhitchoh.

¹⁰ Küyimki Pharao api yamlarübo kheak bukakhiukkhea, tüsho aheangrü wühkenobuh yam rihyam ching I le yikhap-takrü azopü zokheanü,

¹¹ tsüngre khülang chingnü ike abande milim mi. Ike milim aban athanakkhi büthsüthsü lakheah.

¹² Ju ching aheangrü wühkenobuh yamlarü Ibri mihtsürü khülang ike lung lakheah. Ikenü api ki tha, tüsho apinü ike thsungkheak milimbo thanak; mihtsürü abande apinü nihbuh milim yande thanaka jih.

¹³ Tüsho apinü ike ki thanakkhi yande ju dünji. Apinü I rhimoyam ching yüloshih, tüshe yikhap-takbuh a wuka zhin.”

¹⁴ Judüki Pharaonü thiyia yüshihbah Josep ji, tüsho arünü niokheamde rihyam chingnü bekhit; apinü hützühütdoa lu tüsho khimmih müthribah Pharao kilim arü.

¹⁵ Tüsho Pharaonü Josep ki tha, “Inü milim khülang mido, tüsho ju thanakkhukrü she müla. Tüsho nünü milim thanakkhuklah de inü sodo.”

¹⁶ Jumonü Josepnü Pharao ki alo, “Ju I kheak yung; Pharaonü alunekhi Thrünpuhnü alojihbah.”

¹⁷ Pharaonü Josep ki tha: “Kheahang, milim ching I Nile yean zhipde alakheah.

¹⁸ Zukleangnü akheah atsü tüsho ashih-kihkhi moshi thüne akhiuk, tüsho arübo sangrung tsühpü thsüde alakheah.

¹⁹ Judüki inü Ijip lomi alala ching ha ruk makhamde müngüakheahkhi püpü moshibo thüne trukkhita ashih-mükihde arü dunglim akhiuk.

²⁰ Tüsho trukkhita makhamde alakhi moshibonü ashih-kihkhi atan moshibo thüne ju tsühabah,

²¹ tüshe küyimki arünü tsühabahkheanü arünü jurü tsühdo de shenü mümükheah, tümüde arübo atan nangde trukkhita akheahpü mütsüdü lang alakheah. Jushu I asürü.

²² Kheaküshe inü I milim ching zukleangnü hidung khülang kheak aye thüne liuhliuh tüsho tsüde akhiukde ngü.

²³ Judüki aniakhiuklim pungnü yündüsükkhi aye thüne jurü dunglim akhiuk.

²⁴ Tüsho adüsükkhi aye thünenü aye atsü thüne ju muyuabah. Jumonü inü ha wurük-huhrübo ki tha, tüshe I ki thanakkhukpü she mülade alakheah.”

²⁵ Judüki Josepnü Pharao ki tha, “Pharao milimbo khülang tüsho rukhüh ah; apinü tümü rhimopü lanü Thrünpuhnü Pharao ki huhdo:

²⁶ Moshi atsü thüne ju kam thüne, tüsho aye atsü thüne ju kam thüne ah; milimbo khülang lang ah.

²⁷ Tüsho trukkhita ashih-mükihkhi moshi thüne arü dunglim akhiukkhi ju kam thüne, tüsho aniakhiuklim pungnü yündüsükkhi aye thüne ju kam thüne khümzung ah.

²⁸ Ha inü Pharao ki thado. Thrünpuhnü Pharao ki apinü arhimopü lakhi huhdo.

²⁹ Ijip lomi alala ching kam thüne muzhomopungkhi kam thüne arübah;

³⁰ tüshe jurü dunglim kam thüne khümzung labah, tüsho muzhomopungkhi alala Ijip lomi ching mihabahbah, tüsho khümzungnü lomi thsümünimbah.

³¹ Junangde khümzung arükhinü lomi ching muzhomopungkhi mümükheahde akambah, tümüde ju khide muthsukde alabah.

³² Tüsho milim ju Pharao ki mahne ki huhdo, tümütüsho Thrünpuhnü ha thsakhama lah, tüsho Thrünpuhnü ha nahde adünjishihbah.

³³ Kheakü jumonü, Pharaonü mütsankhitrü tüsho lümlung lakhi mihtsürü khülang mokhitang, tüsho api Ijip lomi kurungkheak zojang.

³⁴ Pharaonü ha rhimoang, tüsho muzhomopungkhi kam thüne ching Ijip lomi chingnü akhiukkhi phüngü shihcham thremukhungshihpü lomi kurungkheak atorübo zoang.

³⁵ Tüsho arünü kam atsübo arükhi ching tsühyungpü alala hanmukhungshang, tüsho Pharao yukhüm bukkhüp chingnü hibo zomukhungshang, tüsho arünü kiutobo ching tsühyungbebo zoshang.

³⁶ Tüsho ju tsühyungbe ju Ijip lomi ching lapü lakhi kam thüne khümzung thsungkheak küma-zokhi labah, junangde khümzung lachoki alomi ju müdükheak.”

Josep Ijip Kovünor Kamkhi

³⁷ Junangde lümlung jihkhi ju Pharao tüsho api yamlarü alala ki atsü lakheah.

³⁸ Tüsho Pharaonü ayamlarübo ki tha, “Thrünpuh me lakhi mihtsürü hadürü isanü angükhukba de?”

³⁹ Pharaonü Josep ki tha, “Thrünpuhnü ha alala nü ki huhdo, nü nangde sheshe mütsankhitkhi tüsho lümlung larü müla.

⁴⁰ Inü nü I lomi kurungkheak zojihbah, tüsho I mihtsürü alalanü nü yukhümbo anibah; kiulongthsübinkiu ching lang I nü kheaknü atobe labah.”

⁴¹ Tüsho Pharaonü Josep ki tha, “Kheahang, inü nü Ijip lomi alala kurungkheak zojihlah.”

⁴² Pharaonü api yingkhing chingnü yingkhüm yihkhit tüsho Josep yingkhing ching yukjih; apinü khimthünakbo api kheak phukihjih tüsho suna wuhrünlak ahung mükamde yukjih.

⁴³ Tüsho apinü api yo khora-lolungbe mahnepü kheak binshih; tüsho arünü api miki zhi, “Khukningang!” Junangde api Ijip lomi alala kurungkheak zojih.

⁴⁴ Kheaküshe Pharaonü Josep ki tha, “I Pharao ah, tütüshe nü yukhüm mulude Ijip lomi alala ching mihtsürü shenü she khah yungsho jing mushuhkih.”

⁴⁵ Tüsho Pharaonü Josep mung Zaphenathpanea de ji. Apinü anihbuh kilim On amükeamrü Potiphera tsührübe Asenath aniube thsüpü jih.

⁴⁶ Josep Ijip kiulongthsüpuh Pharao khinkih thsüpü yüzahchoki kam 30 azorü lakheah. Josepnü Pharao mikinü wukhiuk tüsho Ijip lomi alala ching yü.

⁴⁷ Suhdahkhi kam thüne dükeak ching alonü muzhomopungde akhiukshih.

⁴⁸ Jumonü apinü kam thüne ching yo tsühyungbe Ijip lomi ching lakhi hanmukhung, tüsho kiutobo ching zo; apinü arü mühi thulubo ching yo tsühyungbe ju kiuto abande zo.

⁴⁹ Josepnü hi ju apinü akhepü mutukloyi khiungde keto loyi nangde hihdakde hanmukhung, tümüde ju madünbinbe lakheah.

⁵⁰ Tüsho khümzung kambo marüyide, On amükeamrü Potiphera tsührübe Asenathnü api kilim tsührü 2 zübejih.

⁵¹ Josepnü adüjibuh mung Manase de ji tüsho tha, “Thrünpuhnü I küpkhukbo tüsho I buh yamkhün alala mihshih.”

⁵² Mahnepü mung apinü Ephraim de ji, “Tümüde Thrünpuhnü I küpkhukkhi lomi ching I aso asoshih.”

⁵³ Judüki Ijip lomi ching muzhomopungkhi kam thüne akheam thsü,

⁵⁴ tüsho Josepnü athakhi nangde kam thüne khümzung arüpü tankih. Khümzung ju lomi alala ching lakheah, tüshe Ijip lomi alala ching tsühyungbe lakheah.

⁵⁵ Jumonü küyimki Ijip lomi alala ching akhümpü tankihkheanü, mihtsürübonü Pharao ki tsühyungbe thsungkheak zhi. Judüki Pharaonü Ijiprü alala ki tha, “Josep kilim yüang; apinü nüsa ki tümü thabanü rhimoang.”

⁵⁶ Khümzung ju alomi alala ching lakheah, tüsho Josepnü jakambo alala khimshuh tüsho Ijiprübo ki yinjih. Tüsho khümzung ju Ijip lomi ching muthsukde kam.

⁵⁷ Jumonü alomi alalanü hi thulopü Ijip ching Josep kilim arü, tümütüsho khümzung ju lomi alala ching muthsukde alakheah.