THRÜNTAN 4 - AMÜSÜH HÜM CL Bible (BSI)

Kain tüsho Abel

¹ Kheakü Adamnü aniube Eve keak nung tüsho alibe mübünkeangde kambah Kain zübejih, tüsho tha, “Inü mihtsürü khülang Atungpuh kilimnü ngüdo.”

² Jushu she alibenü aniurü Abel zübejih. Abel ju namfimihnu neakrü lakheah, tüshe Kain a thulu wochakrü lakheah.

³ Kim khülang ching Kainnü yimlukhi chingnü Atungpuh kilim kingaün hande arü.

⁴ Abelnü she api namfimihnu bolung adüji tüsho amüdang hande arü. Atungpuhnü Abel tüsho apinü kingaünkhi leangkhi,

⁵ tüshe apinü Kain tüsho apinü kingaünkhi müleangkhi. Jumonü Kainnü khide bukakhiuk tüsho api mi khuram.

⁶ Jumonü Atungpuhnü Kain ki tha, “Tümüde nü bukakhiukcho? Tüsho tümü thsükhi nü mi khuramcho?

⁷ Nünü lungkide rhimokhülaa, nü müleangkhibea de? Tüshe tümü alungkianü nünü ju mürhimosho, khimdopü ki neak yaplah; hanü nü mürheangchoh, tüshe nünü ju kukbeah.”

⁸ Kheakü Kainnü aniurü Abel ki tha, “Ike thulu ching yüanü.” Tüsho ane thulu ching lachoki Kainnü aniurü Abel azhihde wusu tüsho api laksah.

⁹ Judüki Atungpuhnü Kain ki keokhi, “Nü niurü Abel kükheak la?” Tüsho apinü alo, “Inü mümükheah. I ju I niurü neakbuh a de?”

¹⁰ Tüsho Atungpuhnü tha, “Nünü tümü rhimokhea? Nü niurü thiyihnü alo chingnü I ki zhichoh.

¹¹ Kheakü küpü lonü nü niurü thiyih nü khah chingnü leangkhipü kadünü ju lo chingnü nü muthrumüneando.

¹² Küyimki nünü alo wochakbanü junü nü kilim tümü makhiukshih, nü a lomi ching lapung mülade tsotsahrümtsahrü thsübah.”

¹³ Tüsho Kainnü Atungpuh ki tha, “I thsümüchikhi ju inü marümkhukbe ah!

¹⁴ Atsütsü khihni nünü alomi chingnü I yana bahdo; I nü kheaknü jikde alabah; I a alomi ching lapung mülade tsotsahrümtsahrü khülang thsübah, tüsho shepünü I ngübanü I laksahbah.”

¹⁵ Tüshe Atungpuhnü api ki tha, “Jude yung, khürünü Kain laksahsho, api kheak thüne ki royimbah.” Tüsho khürünü api ngübah mülaksahshihpü thsüde Atungpuhnü Kain kheak mütsan khülang yihkihjih.

¹⁶ Jumonü Kainnü Atungpuh kinü tso tüsho Eden aniakhiuklim Nod lomi ching la.

Kain Tsühsoniusobo

¹⁷ Kainnü aniube kheak nung, tüsho mübünkeangde kambah Enok zübejih. Tüsho apinü kiuto khülang thsübah atsührü Enok mung müshide ji.

¹⁸ Enok kilim Irad zübejih; tüsho Irad kheaknü Mehujael, Mehujael kheaknü Methushael, tüsho Methushael kheaknü Lamek trükkhit.

¹⁹ Lameknü aniube mahne, Ada tüsho Zilla lu.

²⁰ Adanü Jabal zübe. Api ju shiwühbo akamde khimyambo ching larü abuh lakheah.

²¹ Aniurü mung Jubal lakheah. Api ju bingshang tüsho khungpi khungrü alala abuh lakheah.

²² Zillanü müwayinchi tüsho yinchi rhimosorü alala thsangdanrü Tubal-kain zübe. Tüsho Tubal-kain niurü aliberü Naama lakheah.

²³ Lameknü aniube ki tha: “Ada tüsho Zilla, I düsheak soang; nüke Lamek niuberübo, inü athakhi aniang: Inü athrününgtsüng mihtsürü khülang apinü I yurijihmonü laksahdo.

²⁴ Kain dünkheak thüne ki royimsho, Lamek dünkheak a nerükheak thüne ki labah.”

Seth tüsho Enosh

²⁵ Kheakü Adamnü aniube kheak nung, tüsho alibenü tsührü khülang zübe tüsho amung Seth de jide tha, “Thrünpuhnü Abel müthri tsührü khülang I kilim jihdo, tümütüsho Kainnü api laksah.”

²⁶ Seth tsührü kheaküshe alakheah, tüsho amung Enosh de ji. Judüki mihtsürübonü Thrünpuh mung jipü tankih.