THRÜNTAN 37 - AMÜSÜH HÜM CL Bible (BSI)

Josep tüsho Api Keoniorübo

¹ Jakob ju abuh lacholakhi lomi, Kanan lomi ching lakheah.

² Ha Jakob yamkhün yukhean. Josep kam 17 azorü lachoki abuh hanniuberü Bilha tüsho Zilpa tsührübo akhiung pürü lung namfimihnubo neakde alakheah. Apinü akhiung pürünü arhimokhi amütsü yusheak arü abuh kilim lude arü.

³ Kheakü Israelnü api tsührü alala kheaknü Josep muzho, tümütüsho api ju ashinshu tsührü lakheah. Apinü anihbuh khilim züt-thsükhi shulünkhim she thsüjih.

⁴ Tüshe küyimki arü abuhnü akeoniorübo alala kheaknü api alü muzhokhi akhiung pürünü angükhea, arünü api mükheahnede kam, tüsho api ki amuzho yu müthakhukde alakheah.

⁵ Kheakü Josepnü milim khülang mi, tüsho apinü ju akhiung pürü ki thaa huh; tüsho arünü api alü mükheahnede kam.

⁶ Jumonü apinü arü ki tha, “Muzhobah inü amikhi milim ha aniang:

⁷ Isabo thulu ching hiphung thsünde alakheah, tüsho kheahang, I hiphung wusu tüsho langakindo zhip; tüsho kheahang, nüsa hiphungbonü ju mükamdo tüsho I hiphung ki khukning.”

⁸ Akhiung pürünü api ki tha, “Nünü isa kurungkheak kiulongthsüpü? Yungsho nünü isa kurungkheak yakzan shuhpü?” Jumonü api milimbo tüsho api yubo dünkheaknü arünü alü api mükheahnede kam.

⁹ Judüki api milim püpü mi tüsho akhiung pürü ki tha, “Inü milim püpü mido. Kheahang, ani, khinu, tüsho chining 11nü I ki khukningdo.”

¹⁰ Jumonü apinü ha abuh tüsho akhiung pürü ki thaa huh; abuhnü thürüh tüsho api ki tha, “Nünü amikhi milim ha tümü a? Nü be le I tüsho nü khiung pürünü arübah nü miki alo kheak khukningba de?”

¹¹ Akhiung pürübonü api lungkhang, tüshe ju dünkheak abuhnü lüm ching zo.

Josep Yinkhi tüsho Ijip lim Bede Ayükhi

¹² Judüki akhiung pürübo arü abuh namfimihnubo kümpü Shekem ching yü.

¹³ Tüsho Israelnü Josep ki tha, “Nü khiung pürübo Shekem ching namfimihnubo kümchoh yung de? Arang, inü nü arü kilim yüshihanü.” Jumonü api ki alo, “I ha kheak lah.”

¹⁴ Apinü anihbuh ki tha, “Nü khiung pürü le namfimihnubo tsüde lanahnü muzhobah yünü kheahang, tüsho I kilim thiyusheak lubah arüloang.” Jumonü apinü Hebron jindükhün chingnü thiyia wukhiukshih, tüsho apinü Shekem lim yü.

¹⁵ Kheakü mihtsürü khürünü api ngü, tüsho api thulu ching rümde alakheah. Mihtsürünü api ki keokhi, “Nü tümü yimcho?”

¹⁶ Jumonü apinü alo, “I akhiung pürü yimchoh. Arü küching namfimihnubo kümchonü muzhobah I ki thaang.”

¹⁷ Tüsho mihtsürünü tha, “Arübo ha kheaknü tsodo, tümüde arünü athakhi inü sodo, ‘Isanü Dothan lim yüanü.’” Jumonü Josepnü akhiung pürü dunglim yü tüsho arübo Dothan ching yimkhit.

¹⁸ Küyimki api limshu ching arüde arünü angükhea, arü ki api thüninde marüyide arünü api laksahpü rük asah.

¹⁹ Judüki arü khülangnü khülang ki thaachih, “Kheahang, ha milim mibuh thsü arüchoh!

²⁰ Jumonü arang, isanü api laksahanü tüsho alokhün khürü ching bahanü; tüsho isanü athabah, ‘Mütüm shiwüh khürünü api tsühdo.’ Api milimbo tümü kambanü isanü akheahbah!”

²¹ Tüshe Reubennü ju so, tüsho apinü arü khah chingnü anihbuh bekhit tüsho tha, “Isanü api mülaksahnü.”

²² Tüsho Reubennü arü ki tha, “Thiyih dübuk, tüshe sunglo ching lakhi shingkung ching api jipyukang, tüsho api kheak khah düchung”–ha apinü arü kheaknü bekhitbah abuh kilim belode arüpü lümkhi thsükheah.

²³ Küyimki Josep akhiung pürü kilim arükhea, arünü Josepnü aphuyukhi züt-thsükhi shulünkhim khukkhia lujih.

²⁴ Jushu arünü api bea lu tüsho shingkung ching jipyuk. Tüsho shingkung ju ke müzahde akeangkeang lakheah.

²⁵ Arü yimtsühpü binde alachoki, arünü abinkih-a kheah tüsho Ishmaelrü hantsahrü bo khülang Gilead limnü arüde ngü. Arü yo kemelbo ju thüneathürabebo, molike tüsho jinjinlaknü hah thsüa lakheah, tüsho arü jurü hanbah Ijip lim yükide alakheah.

²⁶ Jumonü Judanü api keoniorübo ki tha, “Isanü isa niurü laksahbah api thiyih ramkhi chingnü tümü alü la?

²⁷ Arang, isanü api Ishmaelrü ki yinanü, tüsho isa khah api kheak muchungnü, tümüde api isa niurü tüsho isa shih ah.” Tüsho api keoniorübonü mulong.

²⁸ Küyimki Midiarü shothsümolorü arüde alakheanü, akhiung pürünü Josep ju shingkung chingnü thokhit tüsho shotoyinchi nak 20 mo Ishmaelrü ki yin. Tüsho arünü api Ijip lim bede yüki.

²⁹ Judüki Reubennü shingkung lim alode yü, tüshe Josep ju shingkung ching mülade alakheah; tüsho apinü akhimmihbo thorüp.

³⁰ Apinü akeoniorübo kilim yülo tüsho tha, “Azübuh müla; tüsho I külim yüba?”

³¹ Judüki arünü mihnu khülang laksah tüsho Josep yo shulünkhim thiyih ching thsam.

³² Arünü züt-thsükhi shulünkhim ju arü abuh kilim lulode yü tüsho tha, “Isanü ha ngükheah, ha nü tsührü shulünkhim a shi yungnü kheahang.”

³³ Apinü ju kheahkhit tüsho tha, “Ha I tsührü shulünkhim ah. Mütüm shiwüh khürünü api tsühdo. Josep a atsütsünü adütre kamde thonakdo.”

³⁴ Judüki Jakobnü api khimmihbo thorüpbah achim kheak shungliukhim yihkih, tüsho api tsührü thsungkheak nimung ahihdo tüzho.

³⁵ Tüsho api tsührübo le tsührübebo alalanü api shukheampü wusurü; tüshe apinü ashukheampü arochih tüsho tha, “Tümüde I tsührü shepung I tüzhode ayükibah.” Hanangde abuhnü api thsungkheak mitrip.

³⁶ Kheakü api ju Midiarünü Ijip ching Pharao torü tüsho api aheangrü wühkenobuh Potiphar ki yin.