THRÜNTAN 32 - AMÜSÜH HÜM CL Bible (BSI)

Jakobnü Esau Shorupü Thsakhamkhi

¹ Jumonü Jakob anihbuh limro ching yü, tüsho Thrünpuh yunirübonü api shoru.

² Küyimki Jakobnü arübo ngükheanü, apinü tha, “Ha Thrünpuh binkheampung ah.” Tüsho apinü ju dangpung mung Mahanaim de ji.

³ Judüki Jakobnü Edom lomi, Seir lo ching akhiung Esau kilim api müngüh yunithsürübo yüshih.

⁴ Tüsho apinü arü ki thiyukhüm jihde tha, “I tungpuh Esau ki ha thaang, ‘Nü yamlarü Jakobnü ha thachoh: “I Laban lung kheakü khiungde ju ching lakheah.

⁵ I moshipungbo, donkibo, mihnu boto, tüsho athrürü le aliberü yamlarübo lah; tüsho nü miki I amuzho ngüshihpü inü I tungpuh ki thapü arüshihchoh.”’”

⁶ Judüki yunithsürübo Jakob kilim alode arübah tha, “Isa nü khiung Esau kilim yükheah tüsho api lung mihtsürü 400 belah.”

⁷ Jumonü Jakob khide tre tüsho lümthsünü; tüsho apinü anihbuh lung bekhi mihtsürü, tüsho mihnu le moshi boto, tüsho kemelbo bo mahne thsüde cham.

⁸ Tüsho apinü tha, “Esaunü bo khülang kilim arübah zündosho, bo khülang a atsokhitbah.”

⁹ Jakobnü tha, “O I pü Abraham Thrünpuh tüsho I buh Isak Thrünpuh, Atungpuh shepünü I ki tha, ‘Nü lomi tüsho nü buhtsührü kilim alode yüang, tüsho inü nü ki tsüde arhimobah’;

¹⁰ nünü nü yamlarü ki amuzho tüsho thiyuro harü alala huhkhi I müthülün. I ha Jordan hochoki tso khülang lang alakheah, tüshe kheakü I bo mahne kamdo.

¹¹ Inü tamkhüntamnüchoh, I khiung Esau khah chingnü I bekhitang; tümüde inü api trelah, jude yungsho api arübah tüsho I le tsührübo tüsho berübo laksahbah.

¹² Tümüde nünü tha, ‘Tsükjide inü nü tsüde akümbah, tüsho nü tsühsoniusobo mükhekhambe keto loyi nangde hihde akamshihbah.’ ”

¹³ Jumonü ju re apinü ju ching binkheam, tüsho api lung lakhi chingnü akhiung Esau khilim thsambah thsüpü mokhita lu;

¹⁴ mihnu dre 200 tüsho mihnupung 200, namfimihnu dre 200 tüsho namfimihnu pung 20,

¹⁵ kemel anunubo bede 30, moshi dre 40 tüsho moshi pung 10, tüsho donki dre 20 tüsho donki pung 10.

¹⁶ Apinü shiwüh boto aban api yamlarünü akümshihpü jih tüsho ayamlabuh ki tha, “I müngühnü yüang, tüsho shiwüh boto dükeak anükhüh zahshang.”

¹⁷ Tüsho apinü akhuhbuh ki thiyukhüm jihde tha, “Küyimki I khiung Esaunü nüsa shorubah akeoba, ‘Nü putungrü she a tüsho nüsa külim yücho? Nü müngüh harübo ha she yo a?’

¹⁸ Judüki nüsanü athabah, ‘Arübo nü yamlarü Jakob yo ah. Ha I tungpuh Esau kilim thsambah khülang ah; tüsho api she isa dunglim lah.’”

¹⁹ Junangde apinü mahnepü, mahsampü, tüsho shiwüh boto yanrü alala ki tha, “Küyimki nüsanü api ngübanü Esau ki hanangde asukang;

²⁰ tüsho thaang, ‘Kheahang, nü yamlarü Jakob isa dunglim lah.’” Tümüde apinü lüm, “I müngüh yükhi thsambahnü inü api ki mungtsü thsübah, tüsho ju dunglim inü api miro shorubah; khükia apinü I leangkhibah.”

²¹ Jumonü api müngühnü thsambah yü, tüshe api a ju re binkheampung ching bin.

Jakobnü Thrünpuh bede Shochihkhi

²² Apinü ju re asürü tüsho aniube 2, ayamlarü 2, atsührü 11 bebah Jabbok ayung hode yü.

²³ Apinü arü bea lubah ayung hode yüshih, tüsho api lakhi alala yüshih.

²⁴ Judüki Jakob alangzü aninga lakheah; tüsho mihtsürü khülangnü ayinkhi khiungde api bede shochih.

²⁵ Küyimki apinü anihbuh mukukkhi ngükhea, apinü amutsuro kheak qiu; tüsho apinü mihtsürü lung shochihchoki amutsuro phülapkhit.

²⁶ Tüsho apinü anihbuh ki tha, “I tsoshang, tümüde ayinkhipü thsüchoh.” Tüshe apinü tha, “Nünü I mümüngühjihsho inü nü mutsoshih!”

²⁷ Jumonü apinü anihbuh ki tha, “Nü mung she a?” Tüsho apinü alo, “Jakob.”

²⁸ Tüsho apinü tha, “Nü mung kheaküa Jakob de müji, tüshe Israel; tümüde nünü Thrünpuh tüsho mihtsürübo bede shochih, tüsho kukdo.”

²⁹ Judüki Jakobnü api ki keokhi, “Muzhobah I ki nü mung thaang.” Tüsho apinü tha, “Nünü tümüde I mung keokhicho?” Tüsho apinü ju ching api müngühjih.

³⁰ Jakobnü ju dangpung mung Peniel de ji: “Tümüde inü mironü miro Thrünpuh ngüdo, tüshe I rhangdung aninga lah.”

³¹ Api Peniel hobah ani akhiuk, tüsho anihbuh mutsuro mütsükhinü api akheangde alakheah.

³² Jumonü Israelrünü khihni khiungde mutsuro kheak shihyin mütsühchoh, tümütüsho Jakob mutsuro ha yin kheak apinü qiu.