THRÜNTAN 31 - AMÜSÜH HÜM CL Bible (BSI)

Laban kinü Jakob Tsokhi

¹ Kheakü Laban tsührübonü athakhi yubo Jakobnü so, “Isa abuh yo alala Jakobnü ludo, tüsho api lakhit alala isa abuh yo chingnü lakhitdo.”

² Tüsho Laban yakli ju api ki püpüki kheaknü büthsüde Jakobnü kheahkhit.

³ Judüki Atungpuhnü Jakob ki tha, “Nü buh pürü le nüsa buhtsührü lomi lim alode yüang, tüsho I nü lung labah.”

⁴ Jumonü Jakobnü thiyia yüshih tüsho api mihnu boto lapung thulu lim Rachel tüsho Lea ji,

⁵ tüsho ane ki tha, “Inü nüke abuh yakli I kheak püpüki kheaknü büthsüde ngüchoh; tüshe I buh Thrünpuh I lung lakheah.

⁶ Tüsho I sühmüh alalanü nüke abuh tankihdo de nükenü mükheahlah.

⁷ Tütüshe nüke abuhnü I rükaki, tüsho I mihkhahbo thürü ki müthri, tüshe I yuripü Thrünpuhnü api ki mümülüjih.

⁸ Apinü, ‘Amütribo nü mihkhah dün thsübah’ de thasho mihnu alala amütribo anu. Tüsho apinü, ‘Panghingbo nü mihkhah dün thsübah’ de thasho mihnubo alala panghingbo anu.

⁹ Junangde Thrünpuhnü nüke abuh shiwüh alala lude tso tüsho jurübo I kilim jih.

¹⁰ Tüsho mihnubo amüdungpü kim ching inü milim khülang ching abina kheah tüsho mihnubo kheak jukkihkhi namfimihnupungbo ju panghing, amütri tüsho aneakjik kihkhi lakheah.

¹¹ Judüki Thrünpuh yunirünü milim ching I ki tha, ‘Jakob.’ Tüsho inü alo, ‘I ha ching lah.’

¹² Tüsho apinü tha, ‘Nünü zünga kheahang, mihnubo kheak jukkihkhi namfimihnupungbo alala panghing, amütri tüsho aneakjik kihkhi lah; tümüde Labannü nü ki rhimokhi alala inü ngüdo.

¹³ I nünü mujudemüsühkhitkhi mümih-lung tüsho nünü I ki thiyuchihchim thsüpung Bethel Thrünpuh ah. Kheakü ha lomi zojihbah nü zübe lo lim alode yüang.’”

¹⁴ Judüki Rachel le Lea bünenü api ki alo, “Kheaküshe ike abuh yam ching ike thsungkheak shihcham yungsho yamrüplurüp lashi?

¹⁵ Apinü ike hanrü khechoh yung de? Tümüde ike yindo, tüsho ike sho shahde tsühkhamdo.

¹⁶ Tümüde harü lakhit alala ike abuh kheaknü Thrünpuhnü alukhi ju isa le isa tsührübo yo ah; jumonü kheakü tümüpürü Thrünpuhnü nü ki thadünü, ju rhimoang.”

¹⁷ Judüki Jakobnü asürü tüsho atsührübo le api niuberübo kemelbo kheak binshih.

¹⁸ Tüsho apinü anihbuh shiwühbo le apinü alü thsükhi kukrukbo alala, Paddan-aram ching ngükhi shiwühbo lubah Kanan lomi ching abuh Isak kilim yü.

¹⁹ Kheakü Laban anihbuh yo namfimihnu nam rhippü yüa lakheah, tüsho Rachelnü abuh yo yambuk thrünpuhbo ahüh-a lu.

²⁰ Jakobnü Siriabuh Laban ki api tsochoh de mümükheahshihde mülapyuk.

²¹ Jumonü api lakhi alala bede apinü tso. Api tsahmusu tüsho ayung ho, tüsho Gilead wungbo lim yü.

Labannü Jakob Müshamkhi

²² Tüsho Jakob tsodo de mahsam nipü Laban ki tha.

²³ Judüki apinü anihbuh lung akeoniorübo bebah nimung thüne limtsah thsungkheak api müshamde yü, tüsho apinü Gilead wung ching anihbuh yanphuh.

²⁴ Tüshe ju tsüngre milim ching Siriarü Laban kilim Thrünpuh arü, tüsho api ki tha, “Jakob ki atsü yungsho amütsü müthapü kümkangang.”

²⁵ Junangde Labannü Jakob yanphuh. Kheakü Jakobnü awungbo ching api khimyambo thsü, tüsho Labannü api keoniorübo bebah Gilead awung-lomi ching thsü.

²⁶ Tüsho Labannü Jakob ki tha, “I rükakide nünü tümü rhimokhea, tüsho thirithsü ching aramrü nangde I tsührübebo bede atsokhea?

²⁷ Tümüde nünü jikde atsokhea, tüsho I rükakikhea, tüsho züpzüppü le bingkhungbo bede asühkhi khün thsüde ayüshihpü I ki müthakhea?

²⁸ Tüsho nünü I tsührübo le tsührübebo mümüthsüpshih. Nünü makhade rhimodo.

²⁹ Inü nü thsümünimpü sühmüh lah, tüshe nü buh Thrünpuhnü yishih I ki asuk, ‘Nünü Jakob ki atsü yungsho amütsü müthapü kümkangang.’

³⁰ Kheakü atsütsü nü tsodo, tümütüsho nünü nü buh yamkhün tode lümrhihlah, tüshe tümüde nünü I thrünpuhbo ahühkhea?”

³¹ Jakobnü Laban ki alo, “Tümütüsho I trede alakheah, tümüde nünü nü tsührübebo I kheaknü arochihde bea lubah de inü lüm.

³² Shepü lung nü thrünpuhbo ngübanü api dülashih. I ki nü yo tümüpürü lanü I keoniorübo mikinü mütsanang tüsho nünü luang.” Tümüde Rachelnü jurü ahühkhi Jakobnü mümükheah.

³³ Labannü Jakob khimyam ching, Lea khimyam ching, tüsho yamlaberü mahne khimyambo ching yüzah, tüshe apinü jurü müngü. Jushu apinü Lea khimyam chingnü wukhiukbah Rachel khimyam ching yüzah.

³⁴ Kheakü Rachelnü yambuk thrünpuhbo lubah kemel düthsün kheak binpung khüp yuk tüsho jurü kheak bin. Labannü khimyam alala ching kheah tüshe jurü müyimkhit.

³⁵ Tüsho alibenü abuh ki tha, “Inü nü miki müzhipkhi dünkheak I tungpuhnü bukdakhiuk; I aliberü yakli kim ah.” Junangde apinü yim tüshe yambuk thrünpuhbo müngü.

³⁶ Judüki Jakobnü bukakhiuk tüsho Laban müneah; Jakobnü Laban ki keo, “Inü athsümünimkhi tümü la? Nünü müthsakkihde müshamde arüpü thsüde I neak tümü la?

³⁷ Nünü I kukrukbo alala ching yimyim she, nünü nü yambuk kukruk khürü tümü ngüde? I keoniorü le nü keoniorü miki ju zoang, junangde arünü ike dükeak mahkhapbah!

³⁸ I kam muku nü lung lado; nü yo namfimihnubo tüsho mihnubo manumüchih, yungsho nü mihnu boto chingnü namfimihnupungbo mütsüh.

³⁹ Ari-shiwühnü anguhsahkhi inü nü kilim lude marü; adükheakkhi inü I küdah thsüde khaabah. Tüsho animung yungsho azhing ching ahüh-a lukhi dün ashaklo nünü I kilimnü kheang.

⁴⁰ I ha ruk lakheah: animung alamkhinü takbeak, azhing ching athsakkhinü dükhan, tüsho I yapshede müyükhukde alakheah.

⁴¹ Hanangde I nü lung kam muku lakheah; nü tsührübe mahne thsungkheak inü nü kam thürükheak phüyi tankih, tüsho nü mihnu boto thsungkheak kam thuruk, tüsho nünü I mihkhah thürü ki müthrijih.

⁴² I buh Thrünpuh, Abraham Thrünpuh tüsho Isak trekhi I lung mülakhülaa, tsükjide nünü I khahkeang tsoshih-a labah. Thrünpuhnü I thsünükhi tüsho I khah rhimobo ngü, tüsho yishih nü thürüh.”

Labannü Jakob kheak Tangzüngkhi

⁴³ Tüsho Labannü Jakob ki alo, “Harü aliberü I tsührübebo ah, harü azürübo I tsührübo, tüsho ha mihnu boto I yo; nünü angükhi alala I yo ah, tüshe harü I tsührübebo le arü tsührübo dünkheak inü tümü thsükhukpü?

⁴⁴ Jumonü kheakü ikenü tangzüng khülang thsanü, tüsho junü ike dükeak thiyumütsan khülang lashihanü.”

⁴⁵ Jumonü Jakobnü lung khülang lu tüsho mümih-lung thsüde khima zo.

⁴⁶ Judüki Jakobnü api keoniorübo ki tha, “Lungbo shuhmukhungang.” Arünü lungbo lubah rhunga mujungshih tüsho ju lungrhung kheaknü arünü yimtsüh.

⁴⁷ Labannü ju ki Jegar-sahadutha de ji, tüshe Jakobnü Galeed de ji.

⁴⁸ Tüsho Labannü tha, “Khihni ha lungrhung ha ike dükeak thiyumütsan khülang ah.” Jumonü ju mung Galeed de ji.

⁴⁹ Mizpa düshe ji, tümütüsho apinü tha, “Ike limshuachihde alachoki Atungpuhnü ike dükeak kheahde lashang.

⁵⁰ Nünü I tsührübebo kheahmüchihsho yungsho I tsührübebo kheak atrüpde püpü niuberübo lusho, isa lung she mülalashe, ike dükeak Thrünpuh thiyumütsan lah de lümkhitang.”

⁵¹ Judüki Labannü Jakob ki tha, “Inü ike dükeak zokhi, ha kheak lungrhung lah tüsho ha kheak mümih-lung lah.

⁵² Ha lungrhung thiyumütsan lah, tüsho ha mümihlung thiyumütsan lah, junangde athsümünim thsungkheak inü ha lungrhung hode nü kilim marü, tüsho ha lungrhung le mümih-lung hode nünü I kilim marü.

⁵³ Abraham Thrünpuh, Nahor Thrünpuh, tüsho arü jipürü Thrünpuhnü ike dükeak mahkhapshang.” Tüsho Jakobnü abuh Isak trelimnü thiyuchihchim.

⁵⁴ Judüki Jakobnü awung kheak shuhmülanga kingaünkhi jih, tüsho yikhap tsühpü api keoniorübo ji. Arünü yikhap ju tsüh tüsho tsüngreroro awung kheak bin.

⁵⁵ Yapsu mükikde Laban asürü, tüsho api tsührübo le tsührübebo müthsüp tüsho arü müngühjih. Judüki Labannü chamachih tüsho api lapung lim alode yü.