THRÜNTAN 3 - AMÜSÜH HÜM CL Bible (BSI)

Mihtsürü Rükaki ching Ayokhi

¹ Kheakü Atungpuh Thrünpuhnü athrünkhi shiwüh alala kheaknü phuruto ju rük amütsü lakheah. Tüsho phurutonü alibe ki keokhi, “Atsütsü shahwün ching lakhi sangdung küpü kheaknü she mütsühpü Thrünpuhnü thadü de?”

² Tüsho alibenü phuruto ki alo, “Isanü shahwün ching lakhi sangdungbo kheaknü sangaso tsühpü kuklah;

³ tüshe shahwün phulung ching lakhi sangdung kheaknü aso dütsüh, yungsho ju düqiu, jude thsüsho nüsa ashebah de Thrünpuhnü thado.”

⁴ Phurutonü alibe ki tha, “Nüsa atsütsünü müshe.

⁵ Tümütüsho küpü nimung nüsanü hoju tsühbanü nüsa mük khimshuhbah tüsho nüsa ju Thrünpuh nangde atsü tüsho amütsü mükheahbah de Thrünpuhnü mükheahlah.”

⁶ Junangde alibenü sangaso ju atsühpü atsü, mük ki reangkeambe khülang tüsho lümlung ngüpü sangdung ngü, alibenü ju sangaso lu tüsho tsüh. Alibenü ayamkhünbuh kilim she jih tüsho apinü tsüh.

⁷ Judüki ane mük khimshuh tüsho bünkeang ah de mükheah; jumonü anenü khubaso yü thürerubah yihdo.

⁸ Arelim anenü Atungpuh Thrünpuh shahwün ching tsahkhi jingkhün sobah api kheaknü shahwün ching sangdung bolung jikabah.

⁹ Tüshe Atungpuh Thrünpuhnü Adam ki jide tha, “Nü küching la?”

¹⁰ Apinü alo, “Shahwün ching nü düsheak sobah I bünkeang lakhinü trede jiklah.”

¹¹ Tüsho apinü tha, “Nü bünkeang ah de shepünü nü ki thakhea? Inü nü ki dütsüh de athakhi sangaso nünü atsühkhea shi?”

¹² Judüki mihtsürünü alo, “Nünü I lung lashihkhi alibenü sangdung kheaknü sangaso I kilim jih tüsho inü tsüh.”

¹³ Atungpuh Thrünpuhnü alibe ki tha, “Tümü thsükhi nünü ha rhimokhea?” Alibenü alo, “Phurutonü I mülapyukjih, tüsho inü tsüh.”

Thrünpuhnü Mahkhapkhi

¹⁴ Judüki Atungpuh Thrünpuhnü phuruto ki tha, “Nünü ha rhimokhinü akam-shiwüh tüsho mütüm shiwüh alala kheaknü alü nü muthrumünean thsang; nü buknü achinbah tüsho nü rhangdung amuyung asungthulung tsühbah.

¹⁵ Inü alibe le nüke dükeak tüsho nü müjih le alibe müjih dükeak lungkhangachih zojihbah; apinü nü ku thrümrüpbah tüsho nünü api lahzhi kheak mukiubah.”

¹⁶ Apinü alibe ki tha, “Inü nü khungarü hankhi thsünü alü kamshihbah; nü thsünüsahde khungarü zübebah; jude thsüthsü she nü niubuh mürühpü nü kheak labah, tüshe apinü nü kurungkheak yakzan shuhbah.”

¹⁷ Apinü Adam ki tha, “Tümütüsho nünü nü niube yu anide inü nü ki dütsüh de thiyukhüm jihkhi sangdung chingnü tsühdo: nü dünkheaknü alo muthrumüneana lah; nü rhangdung amuyung khisahbah lang atsühbah.

¹⁸ Ayangbo tüsho thrümthrukbe nü thsungkheaknü akhiukshihbah, tüsho mükeak ching yo wokephüyak tsühbah.

¹⁹ Nü alo mükamloyi khiungde nü kingkang chingnü shoke shude rhimobah lang tsühyungbe ngübah, tümüde nü alonü akamkheah; nü a alo ah tüsho nü alo kamlobah.”

²⁰ Tüsho Adamnü aniube ki Eve de ji, tümütüsho anihbe mihtsürü alala abe ah.

²¹ Atungpuh Thrünpuhnü Adam le aniube thsungkheak shihküpnü khimmih thsüa phuyujih.

Adam le Eve Shahwün chingnü Ayankhitkhi

²² Judüki Atungpuh Thrünpuhnü tha, “Kheahang, mihtsürü ju atsü tüsho amütsü mükheahpü isa nangde kamdo; api khah chungde rhangdung sangdung chingnü rhoa tsühbah lünnü api rhangdung lapü mümülübeah.”

²³ Jumonü Atungpuh Thrünpuhnü küpü lonü api thrünkheanü ju wochakshihpü Eden shahwün chingnü yankhitabah.

²⁴ Junangde apinü mihtsürü ju yankhitabah; tüsho apinü rhangdung limro aheangshihpü Eden shahwün aniakhiuklim cherubim tüsho azhingzhing nukshang khülang khülim khülim phürapde zo.