THRÜNTAN 28 - AMÜSÜH HÜM CL Bible (BSI)

¹ Judüki Isaknü Jakob ji tüsho api müngühjih, tüsho api ki müneahde tha: “Nünü Kanan liberü dülu.

² Tsahmusubah Paddan-aram ching nü be abuh Bethuel yam ching yüang; tüsho ju ching nü kü Laban tsührübebo lung khülang nü niube luang.

³ Wuto Thrünpuhnü nü müngühshang, tüsho nü aso asode bushang, junangde nü mihtsürü wüh tode akambah;

⁴ tüsho nü le nü tsühsoniusobo kilim Abraham müngühmühi jihchoh, junangde Thrünpuhnü Abraham kilim jihkhi, nüsa khiungkerü thsüde alakhi lomi nüsa kilim jihbah.”

⁵ Junangde Isaknü Jakob ju Paddan-aram ching Jakob le Esau abe Rebeka akhiung, Aramrü Bethuel tsührü Laban yam ching thiyia yüshih.

Esau Niube Püpü Lukhi

⁶ Isaknü Jakob müngühjihkhi tüsho Paddan-aram ching aniube lushihpü thiyia yüshihkhi, tüsho apinü anihbuh müngühjihde, müneahde, “Nünü Kanan liberü dülu,” de athakhi Esaunü ngü,

⁷ tüsho Jakobnü abuh le abe yu ani; tüsho Paddan-aram lim yü.

⁸ Kanan liberünü abuh Isak kheak masühkhi she Esaunü ngü.

⁹ Jumonü Esaunü Ishmael kilim yü tüsho api niuberübo püpü lungnü, Abraham tsührü Ishmael tsührübe tüsho Nebaioth niurü Mahalath lu.

Bethel ching Jakob Milim

¹⁰ Jakobnü Beersheba chingnü chamachih tüsho Haran lim yü.

¹¹ Junangde api dangpung khürü ching arü tüsho tsüngre amuyung binkheam, tümütüsho ani yüzah-a lakheah. Apinü ju dangpung chingnü lung khülang lu tüsho aku mükham, tüsho ju ching api yap.

¹² Judüki api milim mi, tüsho kheahang, leak khülang alo kheaknü thüning khiungde kheanga lakheah; tüsho ju kheak Thrünpuh yunirübo yükihla akila de alakheah.

¹³ Tüsho kheahang, ju kumung Atungpuh zhip tüsho tha: “I nü buh Abraham tüsho Isak Thrünpuh Atungpuh ah; nü yapkhi lo inü nü tüsho nü tsühsoniusobo kilim jihbah.

¹⁴ Nü tsühsoniusobo alo asungthulung nangde alabah; nü aniyüzahlim tüsho aniakhiuklim, dukulim tüsho düjinglim bude ayübah; tüsho nü le nü müjih ching alomi yamkhün alala müngühmühibah.

¹⁵ Kheahang, I nü lung lah tüsho nü kürü ching yübanü nü aheangbah, tüsho ha lo ching nü belode arübah, tümüde inü nü ki asukkhi mürhimoyi khiungde inü nü müdükhe.”

¹⁶ Judüki Jakob ayapkhi chingnü asürü tüsho tha, “Tsükjide ha dangpung ching Atungpuh lah, tüsho inü mümükheah-a lah.”

¹⁷ Api trede alakheah tüsho tha, “Küdükhüh ha dangpung atrebe la! Ha Thrünpuh yam thsüa lah; ha yinmi ripit ah!”

¹⁸ Judüki Jakobnü yapsu mükikde asürü, tüsho api ku mükhamkhi lung ju lubah mümih-lung thsüde khima zo, tüsho ju ku kheak müdangke bukkih.

¹⁹ Tüsho apinü ju dangpung mung Bethel de ji; tüshe ju kiuto mung akhuhlim Luz lakheah.

²⁰ Judüki Jakobnü thiyuchihchim khülang thsü, “Thrünpuh I lung lasho, tüsho I yüchoki ha limro ching I aheangsho, tüsho I kilim atsühpü yikhap tüsho aphuyupü khimmih jihsho,

²¹ junangde I mungtsü chingnü I buh yam lim alode arübah, tüsho Atungpuh ju I Thrünpuh thsübah.

²² Tüsho inü ha mümih-lung khima zokhi ju Thrünpuh yam thsübah, tüsho nünü I kilim jihkhi alala chingnü inü nü kilim thürü shihcham jihbah.”