THRÜNTAN 26 - AMÜSÜH HÜM CL Bible (BSI)

Gerar ching Isak Lakhi

¹ Akhuhlim Abraham kim ching lakhi khümzung kheaknü püpü khümzung lomi ching lakheah. Tüsho Isaknü Gerar ching Filistia kiulongthsüpuh Abimelek kilim yü.

² Judüki Atungpuh api ki akhiuk tüsho tha, “Ijip lim düyüki; inü nü ki thapü lakhi lomi ching laang.

³ Ha lomi ching lacholang, tüsho I nü lung labah tüsho nü müngühjihbah; tümüde inü nü le nü tsühsoniusobo kilim harü lobo alala jihbah, tüsho nü buh Abraham ki thiyuchihchimkhi dünjishihbah.

⁴ Tüsho inü nü tsühsoniusobo ju thüning ching chiningbo nangde abushihbah; inü nü tsühsoniusobo kilim harü lobo alala jihbah; tüsho nü müjih ching alomi trükshih alala müngühmühibah;

⁵ tümütüsho Abrahamnü I yu ani tüsho I yakzanbo le thiyukhümbo alala zo.”

⁶ Jumonü Isaknü Gerar ching la.

⁷ Küyimki ju ching lakhi mihtsürübonü aniube dünkheak keokhikheanü, apinü alibe ju api niurü ah de tha. Apinü alibe ju aniube ah de athapü tre tümütüsho ju ching lakhi mihtsürübonü Rebeka dünkheaknü api laksahpü labah de lüm, tümüde alibe akheahpü atsü lakheah.

⁸ Küyimki Isak ju ching kim ashang lakheanü, Filistia kiulongthsüpuh Abimeleknü ayinripit chingnü abinkhia kheah tüsho Isak le aniube Rebeka büne muzhoachihde ngü.

⁹ Jumonü Abimeleknü Isak ji tüsho tha, “Dükde anihbe nü niube ah! Tümüde nünü ‘I niurü ah’ de athakhea?” Isaknü api ki alo, “Tümütüsho anihbe dünkheaknü I rhangdung dükheakpü labah de inü lüm.”

¹⁰ Tüsho Abimeleknü tha, “Nünü isa ki rhimokhi ha tümü a? I mihtsürü khürünü nahde nü niube lung müyambah, tüsho nünü isa kheak amülim hande arüpü lakheah.”

¹¹ Jumonü Abimeleknü api mihtsürü alala ki thiyukhüm jih: “Shepünü ha mihtsürü yungsho aniube qiubanü tsükjide asheshihbah.”

¹² Judüki Isaknü ju lo ching mükhean, tüsho ju kam chinü alü thsüde yimlu; tüsho Atungpuhnü api müngühjih.

¹³ Mihtsürü ju alarü kam, tüsho api khide mülakhityi khiungde lakihde yü.

¹⁴ Api mihnu boto le moshi boto tüsho yamlarübo khide hihde alakhinü Filistiarünü api kheak mükthsü.

¹⁵ Jumonü abuh Abraham kim ching api yamlarübonü akiukhi kekhip Filistiarünü alonü dangabahjih.

¹⁶ Tüsho Abimeleknü Isak ki tha, “Isa kheaknü akhinde tsoang; isa kheaknü nü khide wulakhi kamdo.”

¹⁷ Judüki Isaknü ju chingnü chamachih tüsho Gerar dükhün ching api khimyam thsübah ju ching la.

¹⁸ Isaknü abuh Abraham kim ching kekhipbo kiubah api sheshu Filistiarünü atukloshihkhibo kiulo. Apinü jurübo abuhnü ajihkhi mungbonü ji.

¹⁹ Isak yamlarübonü jindükhün ching kekhip kiu, tüsho arünü ju ching ke amüsüh kekhip khülang kiukhit.

²⁰ Tüshe Gerar moshi neakrünü Isak moshi neakrü kheak rukachihde tha, “Ke ha isa yo ah.” Jumonü apinü kekhip mung ju Esek de ji, tümütüsho arünü api kheak rukachih.

²¹ Jushu arünü kekhip püpü kiu, tüsho arünü ju thsungkheak she rukachih. Jumonü apinü ju mung Sitna de ji.

²² Tüsho apinü ju chingnü akhinbah kekhip püpü kiu, tüsho arünü ju thsungkheak a bede murukachih. Jumonü apinü ju mung Rehoboth de ji, tümütüsho apinü tha, “Tümüde kheakü Atungpuhnü isa thsungkheak khiungshak thsüjihdo, tüsho isa lomi ching aso asode alabah.”

²³ Judüki apinü ju chingnü Beersheba lim wutu.

²⁴ Ju tsüngre Atungpuh api ki akhiuk tüsho tha, “I nü buh Abraham Thrünpuh ah; dütre, tümüde I nü lung lah. Inü I yamlarü Abraham thsülimnü nü müngühjihbah tüsho nü tsühsoniusobo bushihbah.”

²⁵ Jumonü apinü ju ching kingaün sadam khülang thsü tüsho Atungpuh mung ji, tüsho apinü ju ching anihbuh khimyam thsü; tüsho Isak yamlarübonü ju ching kekhip khülang kiu.

Isak le Abimelek dükeak Thiyuchihchim

²⁶ Judüki Abimeleknü api lung amüyamrü Ahuzzath tüsho api bonungrü limthobuh Phikol bebah Gerar chingnü arü.

²⁷ Tüsho Isaknü arü ki tha, “Nüsanü I thraneande nüsa kheaknü thiyia tsoshihbah tümü thsüpü I kilim arükhea?”

²⁸ Tüshe arünü tha, “Atungpuh nü lung lah de isanü tsükjide ngüdo. Jumonü isanü thachoh, nü tüsho isa dükeak thiyuchihchim khülang lashihanü, tüsho isanü nü kheak tangzüng khülang thsanü,

²⁹ jude thsüsho lang isanü nü kheak müqiude atsü rhimobah mungtsü ching thiyia tsoshihkhi nangde nünü isa ki amütsü müthsüde alabah. Nü a kheakü Atungpuhnü müngühjih-a lah.”

³⁰ Jumonü apinü arü khilim tsühyungpü thsakhamjih, tüsho arünü tsühyung.

³¹ Jushu arünü yapsu mükikde asürü tüsho khülangnü khülang ki thiyuchihchim lu; Isaknü arü thiyia tsoshih, tüsho arünü mungtsü chingnü api kheaknü chamachih.

³² Ju nimung Isak yamlarübonü arü tüsho arünü akiukhi kekhip dünkheak api ki tha, “Isanü kekhip ngüdo.”

³³ Jumonü apinü ju ki Sheba de ji. Jumonü khihni khiungde kiuto ju Beersheba de jichoh.

Esau Khiungkerü Niuberübo

³⁴ Küyimki Esau kam 40 azorü lakheanü, apinü niuberübo, Hitrü Beeri tsührübe Judith tüsho Hitrü Elon tsührübe Basemath lu.

³⁵ Tüsho arübo ju Isak le Rebeka mulong kimishihbe lakheah.