THRÜNTAN 25 - AMÜSÜH HÜM CL Bible (BSI)

Abraham Tsühsoniuso Püpübo

¹ Abraham kheaküshe aniube lu, tüsho alibe mung Ketura lakheah.

² Alibenü api kilim Zimran, Jokshan, Medan, Midian, Ishbak, tüsho Shua zübejih.

³ Jokshan ju Sheba tüsho Dedan abuh lakheah. Tüsho Dedan tsührübo ju Asshurim, Letushim, tüsho Leummim.

⁴ Tüsho Midian tsührübo ju Epha, Epher, Hanok, Abida, tüsho Eldaa. Harü alala Ketura tsührübo lakheah.

⁵ Abrahamnü api lakhi alala Isak kilim jih.

⁶ Tüshe Abrahamnü api hanniubebo tsührübo kilim thsambahbo jih; tüsho api lade alachoki apinü arübo ju atsührü Isak kheaknü aniakhiuklim lomi lim thiyia yüabahshih.

Abraham Shekhi tüsho Mi Bahkhi

⁷ Abraham kam alalanü 175 lakheah.

⁸ Abraham kutsüpde shinde labah sheabah, tüsho api mihtsürü kilim yü.

⁹ Tüsho api tsührübo Isak tüsho Ishmael bünenü Hitrü Zohar tsührü Ephron lu ching Mamre müngüh Makpela lungkhün ching api kiuyukabah.

¹⁰ Thulu ju Abrahamnü Hitrü ki thulokheah; ju ching Abraham tüsho aniube Sara kiuyukabah.

¹¹ Abraham she dunglim, Thrünpuhnü atsührü Isak müngühjih. Tüsho Isak ju Beer-lahai-roi ching lakheah.

Ishmael Tsühsoniusobo

¹² Kheakü ha Sara yamlabe Ijiprü Hagarnü Abraham kilim zübejihkhi Ishmael lünkhe ah.

¹³ Arü zübekhi ayannü atsührü mungbo: Nebaioth, Kedar, Adbeel, Mibsam,

¹⁴ Mishma, Duma, Massa,

¹⁵ Hadad, Tema, Jetur, Naphish, tüsho Kedema.

¹⁶ Harü ha Ishmael tsührü mungbo, arü kiutobo tüsho lapungbo, arü trükshih ayannü yakzanshuhrü 12 lakheah.

¹⁷ Ishmael kam 137 lakheah; api sheabah tüsho api mihtsürü kilim yü.

¹⁸ Ishmael tsühsoniusobo Ijip aniakhiuklim, Asiria limro kheak Havila tüsho Shur dükeak ching lakheah. Arübo Abraham tsühsoniusobo püpürü kheaknü chamkhibah alakheah.

Esau tüsho Jakob Zübekhi

¹⁹ Ha Abraham tsührü Isak lünkhe ah.

²⁰ Paddan-aram chingnü Aramrü Bethuel tsührübe tüsho Aramrü Laban niurü Rebeka luchoki Isak kam 40 azorü lakheah.

²¹ Kheakü Isaknü aniube thsungkheak Atungpuh ki mushu, tümütüsho alibe bünkeangberü lakheah; apinü amushukhi Atungpuhnü alojih, tüsho aniube Rebeka mübünkeangde kam.

²² Khungarübo anihbe nuyam ching khangachih, tüsho alibenü tha, “Tümü thsükhi I kheak ha dünjicho?” Jumonü alibenü Atungpuh ki keokhipü yü.

²³ Atungpuhnü alibe ki tha, “Nü nuyam ching trükshih mahne lah, tüsho nünü azübekhi mihtsürü mahne müzütbah; khülang ju püpü kheaknü amürangbe labah, azopünü akheambuh tankihbah.”

²⁴ Küyimki alibe zübepü kim khiungkheanü, anihbe nuyam ching athrürü mahne lakheah.

²⁵ Akhuh zübekhi ju mürümdo alakheah. Apang abümnü shihnam khim nangde alakheah; jumonü arünü api mung Esau de ji.

²⁶ Ju dunglim aniurü zübe, tüsho api khahnü Esau lahzhi kheak tholo; jumonü api mung Jakob de ji. Alibenü ane zübejihchoki Isak kam 60 azorü lakheah.

Esaunü Adüjirü Alim Yinkhi

²⁷ Azüne ju zode arü, tüsho Esau ju shihyanrü, rimshih mihtsürü lakheah, tüshe Jakob a azhihayih mihtsürü, khimyam ching larü lakheah.

²⁸ Tüsho Isaknü Esau muzho tümütüsho apinü alaksahkhi anihbuhnü asühde tsüh, tüshe Rebekanü Jakob muzho.

²⁹ Nimung khülang Jakob hühkeang wo khiungde alakheah; tüsho Esau ju thulu chingnü khümkeaka alung.

³⁰ Esaunü Jakob ki tha, “Muzhobah awo amürüm ju I kipang, tümüde I khümkeaka lah.” Jumonü api mung Edom de ajikheah.

³¹ Tüshe Jakobnü tha, “Akhuhde nünü I kilim adüjibuh alim yinang.”

³² Tüsho Esaunü tha, “Kheahang, I ashepü thsüchoh; jumonü zübekhialimnü I tümü alü thsüpü?”

³³ Judüki Jakobnü tha, “Khihni nünü I ki thiyuchihchimang.” Jumonü apinü anihbuh ki thiyuchihchim, tüsho api zübekhi-alim Jakob kilim yinabah.

³⁴ Tüsho Jakobnü Esau kilim yikhap le hühkeang wo jih; tüsho apinü tsühyungbah nihbuh limro yü. Hanangde Esaunü anihbuh zübekhi-alim mükhemükim thsü.