THRÜNTAN 24 - AMÜSÜH HÜM CL Bible (BSI)

Isak Niube

¹ Kheakü Abraham zoban a ashinbuhrü lakheah, tüsho Atungpuhnü lüpdükhi ching Abraham müngühjih.

² Jumonü Abrahamnü api lakhi alala kurungkheak yakzanshuhbuh ayamlarü azopü ki tha, “Muzhobah, nü khah I pho dükeak zoang,

³ junangde I lakhi bolung Kananberü lungnü nünü I tsührü niube mulushihpü Atungpuh , yinmi tüsho alomi Thrünpuh tamde thiyuchihchimshihbah;

⁴ tüshe nünü I lomi tüsho I keoniorü kilim yüang tüsho I tsührü Isak niube lujang.”

⁵ Tüsho yamlabuhnü api ki tha, “Khükia alibenü ha lomi lim I yande marüde alabah. Nü arüpung lomi lim inü nü tsührü belode ayüpü?”

⁶ Tüshe Abrahamnü api ki tha, “I tsührü ju ching belode müyüpü kümkangang.

⁷ Atungpuh yinmi Thrünpuh, shepünü I keoniorü lomi tüsho I buh yamkhün chingnü I bea lukhea, tüsho I ki thiyuchihchimde tha, ‘Nü tsühsoniusobo kilim inü ha lomi jihbah,’ apinü nü müngüh api yunirü thiyibah tüsho nünü ju chingnü I tsührü niube lujihbah.

⁸ Tüsho alibenü nü yande arüpü mümulongsho, ha thiyuchihchimkhi chingnü nü zuzu labah, judü lang I tsührü ju ching belode düyü.”

⁹ Jumonü yamlabuhnü api khah anihbuh putungrü Abraham pho dükeak zo, tüsho ha dünkheak thiyuchihchim thsü.

¹⁰ Judüki yamlabuhnü api putungrü yo kemel 10 lu tüsho chamachih, tümüde api putungrü kukrukbo alala anihbuh khah ching lakheah. Tüsho apinü tsahmusubah Mesopotamia lim, Nahor kiuto ching yü.

¹¹ Tüsho apinü arelim aliberübo kekhip yüpü kim ching, kemelbo ju kiuto aleanglim kekhip ki khukninga binshih.

¹² Judüki apinü tha, “O Atungpuh I putungrü Abraham Thrünpuh, muzhobah khihni I akuk ngüshang, tüsho I putungrü Abraham ki amuzho huhang.

¹³ Kheahang, I ha kheak kekhip ki zhiplah, tüsho kiuto mihtsürü tsührübebo ke khippü akhiukchoh.

¹⁴ Inü aliberü khülang ki, ‘Muzhobah inü ayungpü nü kephüh koyuang,’ de thasho anihbenü thashang, ‘Yungang, tüsho inü nü yo kemelbo she aduhbah’— alibe ju nünü nü yamlarü Isak khilim mokhitkhi lashang. Ha hode nünü I putungrü ki amuzho huhdo de inü amükheahbah.”

¹⁵ Apinü müthakhamyide, Rebeka adubuh kheak kephüh shuhbah akhiuk. Alibe ju Abraham niurü Nahor le aniube Milka ane tsührü Bethuel tsührübe lakheah.

¹⁶ Alibe ju khide jak atsü atsangkhitkhi lakheah. Alibenü kekhip ching yükibah kephüh ching mide yuk tüsho atu.

¹⁷ Tüsho yamlabuhnü alibe shorupü shande yübah tha, “Muzhobah nü kephüh ching yo I yungshang.”

¹⁸ Alibenü tha, “Yungang, I tungpuh.” Judüki alibenü niokheam tüsho kephüh akhah ching shuhkhi tüsho api yungshih.

¹⁹ Küyimki api ayungkhamshihkhea, alibenü tha, “Inü nü yo kemelbo thsungkheak she arü muyungkhamyi khiungde ke khipbah.”

²⁰ Jumonü alibenü nahnahde kephüh ju sangphuru ching yeahkeang, tüsho ke hihde akhippü kekhip ching shande yü, tüsho api yo kemelbo alala khilim ke suhdahde khip.

²¹ Mihtsürü junü malande lang, Atungpuhnü api hantsahkhi akuk ngüshih-a lashi yungnü amükheahpü alibe kheak kheahmüripde alakheah.

²² Küyimki kemelbo ayungkhamkhea, mihtsürü junü suna nupungnüpü düpüt 6 tüsho suna bingkhüm düpüt 115 dün yo lubah yukjih.

²³ Apinü keokhi, “Nü shepü tsührübe a? Muzhobah I ki thaang, isa azhing ching binkheampü thsüde nü buh yam ching khiungshak lashi?”

²⁴ Alibenü alo, “I a Milkanü Nahor kilim zübejihkhi Bethuel tsührübe ah.”

²⁵ Tüsho alibenü thalo, “Ayimkippü thsüde sangrung-neang le ajim, tüsho abinkheampü khiungshak isa suhdahde lah.”

²⁶ Judüki mihtsürünü aku mükhüm tüsho Atungpuh kingaün.

²⁷ Tüsho apinü tha, “I putungrü ki api amüthsüm tüsho thiyuro mübahyukkhi I putungrü Abraham Thrünpuh Atungpuh shiang. I thsungkheaknü, Atungpuhnü I hantsah ching I putungrü keoniorü yam lim bede arüdo.”

²⁸ Alibenü alihde yü tüsho harü dünkheak abe ki thaa huh.

²⁹ Kheakü Rebeka akhiung amung Laban lakheah, tüsho apinü kekhip ki lakhi mihtsürü kilim niokheamde yü.

³⁰ Apinü nupung-nüpü, tüsho aniurü khah ching bingkhüm ngü müleangde, tüsho mihtsürü junü anihbe ki thakhi Rebekanü athakhi soakede, apinü wukhiuk tüsho api ju kekhip phünide kemelbo ki zhipde ngü.

³¹ Apinü tha, “Azahang, nü Atungpuhnü müngühjihbuh! Tümüde nü wungdo zhipla? Inü nü thsungkheak thüyam tüsho kemelbo thsungkheak dangpung khülang thsakhamlah.”

³² Judüki mihtsürü ju thüyam ching yüzah. Labannü kemelbo hah shuhkhijihbah sangrungneang tüsho ajim kip, tüsho api le anihbuh lung bekhi mihtsürübo jing müsühpü ke jih.

³³ Judüki api miki tsühyungpü zojih, tüshe apinü tha, “Inü athapü lakhi nü ki müthayikia inü mütsüh.” Labannü tha, “Thaang.”

³⁴ Jumonü apinü tha, “I Abraham yamlarü ah.

³⁵ Atungpuhnü I putungrü tode müngühjihdo, tüsho alarü kamdo; tüsho apinü anihbuh kilim mihnu boto le moshibo, shotoyinchi le suna, athrürü tüsho aliberü yamlarübo, tüsho kemelbo le donkibo jihdo.

³⁶ Tüsho I putungrü niube Saranü I putungrü kilim anihbe shina lachoki tsührü khülang zübejih; tüsho apinü anihbuh lakhi alala api kilim jihdo.

³⁷ Kheakü I putungrünü I ki thiyuchihchimshihde tha, ‘Nünü I lakhi lomi Kananrü tsührübebo lungnü I tsührü niube dülujih;

³⁸ tüshe nünü I buh yamkhün tüsho keoniorü kilim yüang tüsho I tsührü niube lujang.’

³⁹ Tüsho inü I putungrü ki tha, ‘Küsa aliberünü I yande marüde alabah.’

⁴⁰ Tüshe apinü I ki tha, ‘Atungpuh , shepü miki I tsahchonü api yunirü nü lung arüshihbah tüsho nü limro akuk ngüshihbah; tüsho nünü I keoniorü tüsho I buh yamkhün chingnü I tsührü niube lujihbah.

⁴¹ Nü I keoniorü bolung yünü akhiungchoki ha thiyuchihchim chingnü mütsanmükhibah; tümüde arünü alibe nü kilim müjihsho, ha thiyuchihchim chingnü nü zuzu labah.’

⁴² “Tüsho ha nimung inü kekhip ki arü tüsho tha, ‘O Atungpuh I putungrü Abraham Thrünpuh, nünü kheakü I yüpü limro ching akuk ngüshihsho,

⁴³ kheahang, I kekhip ki zhiplah; tüsho küyimki atsangkhitkhi ke khippü arüba, tüsho inü alibe ki thaba, “Muzhobah nü kephüh ching yo ayungpü I kilim ke anükhüh jihang,”

⁴⁴ tüsho alibenü I ki, “Yungang, tüsho inü nü yo kemelbo thsungkheak she akhipbah,” de thasho–alibe ju I putungrü tsührü thsungkheak Atungpuhnü amokhitkhi lashang.’

⁴⁵ Tüshe inü I mulong ching müthakhamyide, Rebeka adubuh kheak kephüh hanbah akhiukde alakheah; tüsho alibenü kekhip ching yüki tüsho ke ju khip. Tüsho inü alibe ki tha, ‘Muzhobah I yungshang.’

⁴⁶ Alibenü nahnahde adubuh kheaknü kephüh müngükhi tüsho tha, ‘Yungang, tüsho inü nü yo kemelbo she ayungshihbah.’ Jumonü inü yung, tüsho alibenü kemelbo she yungshih.

⁴⁷ Judüki inü alibe ki keo tüsho tha, ‘Nü shepü tsührübe a?’ Tüsho alibenü alo, ‘Milkanü Nahor kilim zübejihkhi Bethuel tsührübe ah.’ Jumonü inü anupung kheak nüpü yukjih tüsho akhah ching bingkhümbo yukjih.

⁴⁸ Inü I ku mükhüm tüsho Atungpuh kingaün, tüsho I putungrü tsührü thsungkheak aniurü tsührübe lupü I thiyuro limro ching bebuh Atungpuh I putungrü Abraham Thrünpuh shijih.

⁴⁹ Kheakü nünü I putungrü ki amuzho tüsho thiyuro huhba shi yungnü I ki thaang, jude yungsho I tsülim yungsho huzulim anguhanü.”

⁵⁰ Judüki Laban tüsho Bethuel bünenü alo tüsho tha, “Ha Atungpuh kilimnü arüchoh; isanü nü ki amütsü yungsho atsü she müthakhuk.

⁵¹ Ha ching nü müngüh Rebeka lah; anihbe bebah yüang tüsho Atungpuhnü asukkhi nangde anihbe nü putungrü tsührü niube thsüshang.”

⁵² Küyimki Abraham yamlabuhnü arü yubo sokhea, apinü alo lim mükhümde Atungpuh kingaün.

⁵³ Judüki yamlabuhnü suna le shotoyinchi mürezhingzhing tüsho khimmihbo lude akhiukbah Rebeka kilim jih; apinü akhiung le abe büne kilim she amo-achak thsambahbo jih.

⁵⁴ Tüsho api le api lung bekhi mihtsürübonü tsühyung tüsho ju re ju ching binkheam. Küyimki arü yapsu asürükheanü, apinü tha, “I putungrü kilim I yüshang.”

⁵⁵ Tüshe alibe akhiung le abe bünenü tha, “Anünübe isa lung nimung thürü lang she binshang; jushu alibe yüshang.”

⁵⁶ Tüsho apinü arü ki tha, “I düzhipdo, tümütüsho Atungpuhnü I limro akuk ngüshihdo; I putungrü kilim yüpü thsüde I yüshang.”

⁵⁷ Jumonü arünü tha, “Isanü anünübe jibah tüsho anihbe ki keobah.”

⁵⁸ Judüki arünü Rebeka ji tüsho tha, “Nü ha buh mihtsürü lung yüba shi?” Tüsho alibenü alo, “I ayübah.”

⁵⁹ Jumonü arünü Rebeka tüsho anihbe kümrü, tüsho Abraham yamlarü le api mihtsürübo thiyia yüshih.

⁶⁰ Tüsho arünü Rebeka müngühjih tüsho tha: “Isa niurü, nü a chithürü thürübo abe thsüang shi; tüsho nü tsührübonü arü riri kiutobo kukkhitshang.”

⁶¹ Judüki Rebeka tüsho anihbe yamlaberü anenü thsakham tüsho kemelbo kheak binbah mihtsürü ju yande yü. Junangde yamlabuhnü Rebeka bea lu tüsho chamachih.

⁶² Kheakü Beer-lahai-roi chingnü Isak arü, tümüde api Negeb ching lakheah.

⁶³ Isaknü lümakheahpü arelim thulu ching yü; tüsho abina kheahshe kemelbo arüde alakheah.

⁶⁴ Judüki Rebekanü zünga kheah, tüsho küyimki anihbenü Isak ngükheanü kemel kheaknü aki;

⁶⁵ tümüde alibenü yamlabuh ki thakheah, “Isa shorupü thulu ching la ju shepü a?” Tüsho yamlabuhnü alo, “Ju I putungrü ah.” Jumonü alibenü kudukiube lu tüsho anihbe muhiudo.

⁶⁶ Tüsho yamlabuhnü anihbuhnü arhimokhi alala Isak ki thaa huh.

⁶⁷ Judüki Isaknü alibe ju abe Sara khimyam ching bede yüzah; apinü Rebeka bea lu tüsho aniube kam, tüsho apinü anihbe muzho. Jumonü abe sheabah dunglim Isak mulong shukheam.