THRÜNTAN 22 - AMÜSÜH HÜM CL Bible (BSI)

Abraham Akin Rükakikhi

¹ Kim anükhüh dunglim Thrünpuhnü Abraham ki rükakide tha, “Abraham!” Apinü alo, “I ha ching lah.”

² Judüki Thrünpuhnü tha, “Nünü muzhode alakhi, nü tsührü khülang lang alakhi Isak bebah Moria lomi lim yüang, tüsho inü nü ki thapü lakhi awungbo lung khülang kheaknü api taka kingaünkhi jihang.”

³ Jumonü Abrahamnü yapsu mükikde asürü tüsho api yo donki hah thsü, tüsho api lung athrününgtsüng 2 tüsho atsührü Isak be; küyimki apinü taka kingaünpü sang suhdahde ayihkheanü, Thrünpuhnü api ki thakhi dangpung lim tsahmusude yü.

⁴ Mahsam nimungpü Abrahamnü abina kheah tüsho limshu chingnü ju dangpung ngü.

⁵ Abrahamnü athrününgtsüng büne ki tha, “Donki lung ha kheak aleangang; azübuh le I ju ching yübah kingaünbah, tüsho ikenü nüke kilim alode arübah.”

⁶ Jumonü Abrahamnü taka kingaünbe sang lu tüsho atsührü Isak dubuh kheak shuhkihjih; tüsho apinü akhah ching mo le nukjip lu, tüsho ane rukhüh yü.

⁷ Tüshe Isaknü abuh Abraham ki tha, “Abuh!” Tüsho apinü alo, “I tsah-a, I ha ching lah.” Tüsho apinü tha, “Kheahang, mo tüsho sang ha kheak lah, tüshe taka kingaünpü namfimihnunu küching la?”

⁸ Abrahamnü alo, “I tsah-a, taka kingaünpü thsungkheak namfimihnunu Thrünpuhnü ajihbah.” Tüsho anenü rukhüh yü.

⁹ Judüki Thrünpuhnü api ki thakhi dangpung ching ane arü. Abrahamnü ju ching kingaün sadam khülang thsü, tüsho sang tsanglunga zo; tüsho apinü atsührü Isak rhükbah kingaün sadam kheak, sang mujung kheak yapshih.

¹⁰ Abrahamnü api laksahpü nuk lubah akhah shuhkih.

¹¹ Tüshe Atungpuh yunirünü yinmi chingnü api ji tüsho tha, “Abraham, Abraham!” Tüsho apinü alo, “I ha ching lah.”

¹² Tüsho apinü tha, “Azübuh kheak nü khah düchung, yungsho api ki tümü düthsü; tümüde kheakü nünü Thrünpuh trelah de inü mükheahlah, tümütüsho nünü nü tsührü khülang lang alakhi I ki müsühmüh.”

¹³ Judüki Abrahamnü zünga kheah, tüsho api dunglim namfimihnupung khülang sangrung ching ajuhbo kheaknü wukloa lakheah. Abrahamnü yü tüsho namfimihnupung ju lubah api tsührü müthri taka kingaünkhi jih.

¹⁴ Tüsho Abrahamnü ju dangpung ki, Atungpuhnü Ajihbah de ji; khihni khiungde ha thachoh, “Atungpuh wung chingnü ajihbah.”

¹⁵ Judüki Atungpuh yunirünü mahne kipü yinmi chingnü Abraham ki ji,

¹⁶ tüsho tha: “Inü ha thiyuchihchimdo, Atungpuhnü thachoh, tümütüsho nünü nü tsührü khülang lang alakhi tukloa muzode rhimodo,

¹⁷ müngühmühi ching inü nü müngühjihbah, tüsho wühjabuja ching thüning ching chiningbo tüsho keyean loyibo nangde nü tsühsoniusobo bushihbah; tüsho nü tsühsoniusobonü arü riri kiutobo müküh-a lubah.

¹⁸ Nü müjih ching alomi trükshih alala müngühmühibah, tümütüsho nünü I ki mihyuanido.”

¹⁹ Jumonü Abrahamnü ayamlarü büne kilim alode yü, tüsho arünü tsahmusude rukhühnü Beersheba lim yü; tüsho Abraham Beersheba ching la.

Nahor Tsühsoniusobo

²⁰ Kim anükhüh dunglim aniurü Nahor kilim Milkanü tsührübo zübejih-a lah de Abrahamnü so:

²¹ adüjibuh Huz, aniurü Buz, Aram abuh Kemuel,

²² Kesed, Hazo, Pildash, Jidlaph, tüsho Bethuel.

²³ Bethuel ju Rebeka abuh kam. Milkanü Abraham niurü Nahor kilim harü tsührü 8 zübejih.

²⁴ Api hanniube Reuma she tsührübo lakheah: Teba, Gaham, Tahash tüsho Maaka.