THRÜNTAN 15 - AMÜSÜH HÜM CL Bible (BSI)

Abram kheak Thrünpuh Tangzüng

¹ Ha dunglim Atungpuh yu michih khülang ching Abram kilim arüde tha, “Dütre Abram. I nü tsung, khide ato nü thsambah ah.”

² Tüshe Abramnü alo, “ Atungpuh Thrünpuh , nünü I tümü jihba, tümütüsho I a tsührü mülade lah, tüsho I yamrüplurüp lupü thsüde Damaskarü Eliezer lah?”

³ Tüsho Abramnü tha, “Nünü I kilim tsührü müjih; jumonü I yamkhün ching azhorü khülangnü I yamrüplurüp lubah.”

⁴ Judüki Atungpuh yu api kilim arü: “Ha mihtsürü nü yamrüplurüp lurü müthsü, tüshe nü pang chingnü arükhi tsührü khülang nü yamrüplurüp lurü thsübah.”

⁵ Apinü anihbuh wungdo ching bekhit tüsho tha, “Thüning lim kheahang, tüsho chiningbo nünü khekhamkhuksho kheang.” Tüsho apinü anihbuh ki tha, “Junangde nü tsühsoniusobo labah.”

⁶ Abramnü Atungpuh kheak kin, tüsho api kilim anihbuh ju thiyuro-lungki khejih.

⁷ Judüki Atungpuhnü api ki tha, “I ha lomi nü kilim jih-a yamrüplurüp lushihpü Kaldea ching lakhi Ur chingnü nü bekhitbuh Atungpuh ah.”

⁸ Tüshe Abramnü keokhi, “Atungpuh Thrünpuh , ha lomi yamrüplurüp lupü küde thsah inü amükheahba?”

⁹ Jumonü apinü anihbuh ki tha, “I kilim kam mahsam bankhitkhibo moshi 1, mihnu 1, namfimihnupung 1, tüsho guduru 1, müthrithrümpü nunu 1 de lubah arang.”

¹⁰ Abramnü harü alala api kilim lude arü tüsho aphulungnü mahne thsüde khaprüp, tüsho büthsüthsü thrip abande zo; tüshe apinü wuhnu a mahne thsüde mükhaprüp.

¹¹ Küyimki müleangtopübo shihmibo kheak akikheanü, Abramnü yana tsoshih.

¹² Ani yüzahde alachoki, Abram yapshede yü, tüsho amiting akheah tüsho atrebe api kheak arü.

¹³ Judüki Atungpuhnü api ki tha, “Nü tsühsoniusobo khiungke lomi ching hanrü thsüpü tüsho arü tankihpü lakhi tsükjide mükheahang, tüsho arünü arübo kam chi phüyi thsümüchibah.

¹⁴ Tüsho arünü atankihpü lakhi trükshih she inü mahkhapbah; ju dunglim arübo lakhit ato lubah akhiukbah.

¹⁵ Kheakü nü a sühakhim ching nüsa jipürü lung yübah; nü a shinde labah kiuyuka bahbah.

¹⁶ Nü tsühsoniuso ha ching alode marüchoki lün phüyi labah, tümütüsho inü Amorrü yankhitpü thsüde arü mülimkhi musuhdahyi.”

¹⁷ Küyimki ani yüzahbah mitingdo akamkhea, mokhühkhi mophüh khülang tüsho tsünduphung khülang akhiukbah shiwüh khapnakkhi phulung chingnü hode yü.

¹⁸ Ju nimung Atungpuhnü Abram kheak tangzüng khülang thsü tüsho tha, “Nü tsühsoniusobo kilim inü ha lo jihchoh, Ijip ayung chingnü Euphra ayung ato–

¹⁹ lomibo berukhi ju Kenrü, Kenizrü, Kadmonrü,

²⁰ Hitrü, Perizrü, Repharü,

²¹ Amorrü, Kananrü, Girgashrü tüsho Jebusrü.”