THRÜNTAN 13 - AMÜSÜH HÜM CL Bible (BSI)

Abram tüsho Lot Müzütkhi

¹ Judüki Abramnü aniube tüsho api lakhi alala, tüsho api lung Lot bebah Ijip chingnü wukhiukbah Negeb lim wutu.

² Abram ju akam-shiwüh, shotoyinchi tüsho suna ching khide alarü lakheah.

³ Tüsho apinü Negeb chingnü hantsahmusubah Bethel le Ai dükeak akhuhlim anihbuh khimyam lapung Bethel khiungde yü,

⁴ tüsho akhuhlim apinü kingaün sadam thsüpung lakheah; tüsho ju ching Abramnü Atungpuh mung jikheah.

⁵ Abram lung yükhi Lot she mihnubo le moshibo tüsho yamkhün le yamlarübo lakheah.

⁶ Kheakü arü rukhüh lapü thsüde alopung musuhdah, tümütüsho arü lakhit-kukruk ato lakheah.

⁷ Tüsho Abram shiwüh le Lot shiwüh kheahrü dükeak alanaji akhiuk. Ju kim ching Kananrü le Perizrü she lomi ching lakheah.

⁸ Jumonü Abramnü Lot ki tha, “Muzhobah I tüsho I shiwüh kheahrü le nü shiwüh kheahrü dükeak alanaji mülashihnü; tümüde isa keoniorü ah.

⁹ Nü mikhuh alo abümnü müla düpü? Muzhobah I kheaknü atrütang. Nü huzulim yüsho, I tsülim yübah; yungsho nü tsülim yüsho, I huzulim yübah.”

¹⁰ Lotnü zünga kheah tüsho Zoar thrippeang Jordan dükhün ju ke tsüde aduhkhi Atungpuh shahwün nangde, Ijip lomi nangde alakheah. (Ha akhuhlim Sodom tüsho Gomorra thsümünimkhi lakheah).

¹¹ Judüki Lotnü api thsungkheak Jordan dükhün alala mokhit tüsho aniakhiuklim hantsahmusude yü. Tüsho arü khülangnü khülang kheaknü chamachih.

¹² Abramnü Kanan lo ching la, tüsho Lotnü adükhün kiutobo ching la, tüsho api khimyambo Sodom khiungde thsü.

¹³ Tüshe Sodom mihtsürübo hodakde mihbukmuyuk tüsho Atungpuh azhihde neak yihbeaka lakheah.

Hebron lim Abram Yükhi

¹⁴ Api kheaknü Lot akhin dunglim, Atungpuhnü Abram ki tha: “Nü mük züngang tüsho nü lakhi dangpungnü dukulim, düjinglim, aniakhiuklim, tüsho aniyüzahlim kheahang;

¹⁵ tümüde nünü angükhi lomi inü nü tüsho nü tsühsoniusobo kilim lünnü ajihbah.

¹⁶ Tüsho inü nü tsühsoniusobo asungthulung nangde akamshihbah; junangde khürünü asungthulung khekhuksho nü tsühsoniusobo she akhekhukbah.

¹⁷ Asürang, lomi ashanglim tüsho atolim hode tsahang, tümüde inü ju nü kilim jihchoh.”

¹⁸ Jumonü Abramnü api khimyam akhin, tüsho yübah Hebron ching Mamre arüngako sangbo thüninde la, tüsho Atungpuh kilim kingaün sadam khülang thsü.