THRÜNTAN 12 - AMÜSÜH HÜM CL Bible (BSI)

Thrünpuhnü Abram Jikhi

¹ Kheakü Atungpuhnü Abram ki tha, “Nüsa mihtsürü tüsho nü buh yamkhün nüsa lomi bahjihbah inü nü ki huhpü lakhi lomi ching yüang.

² Inü nü trükshih ato kamshihbah; inü nü müngühjihbah tüsho nü mung ato kamshihbah; tüsho nü müngühmühi labah.

³ Shepünü nü müngühjihchonü inü müngühjihbah, tüsho shepünü nü athruchonü inü muthrumüneanbah; tüsho nü lung alomi yamkhün alala müngühjihbah.”

⁴ Jumonü Atungpuhnü api ki thakhi nangde Abramnü chamachih, tüsho Lot api lung yü. Tüsho Abram ju Haran chingnü tsahmusuchoki kam 75 azorü lakheah.

⁵ Judüki Abramnü aniube Sarai le aniurü tsührü Lot, arünü ahanmukhungkhi lakhit-kukruk tüsho Haran ching arübo azhorübo alala bea lu tüsho Kanan lomi ching yüpü tsahmusu. Junangde arü Kanan lomi ching arü.

⁶ Abramnü Shekem ching More sangdung ato lapung khiungde lomi hode hantsah. Ju kim ching Kananrübo lomi ching lakheah.

⁷ Judüki Atungpuhnü Abram ki akhiuk tüsho tha, “Nü tsühsoniusobo ki inü ha lo jihbah.” Tüsho apinü ju ching api ki akhiukbuh Atungpuh kilim kingaün sadam khülang thsü.

⁸ Ju chingnü api aniyüzahlim Bethel tüsho aniakhiuklim Ai lakhi aniakhiuklim Bethel wungbo lim yü. Ju ching apinü Atungpuh kilim kingaün sadam khülang thsü tüsho Atungpuh mung ji.

⁹ Jumonü Abramnü tsahmusu tüsho Negeb limpeang mutuklode yü.

Abram Ijip ching

¹⁰ Kheakü lomi ching khümzung lakheah, tüsho Abramnü Ijip ching lacholapü yüki, tümüde lomi ching khümzung ju muthsukdakde alakheah.

¹¹ Api Ijip ching yüzahpü lachoki, apinü aniube Sarai ki tha, “Nü a jaktsükhi liberü ah de inü mükheahlah.

¹² Küyimki Ijiprünü nü ngübanü arünü athabah, ‘Ha api niube ah.’ Arünü I laksahbah; tüshe nü a alashihbah.

¹³ Nü ju I niurü ah de thaang, junangde nü dünkheaknü I tsüde alabah, tüsho nü hode I rhangdung labah.”

¹⁴ Junangde küyimki Abram Ijip ching arükhea, alibe ju khide jaktsüde Ijiprünü ngü.

¹⁵ Pharao torübonü she alibe ngü tüsho anihbe jaktsükhi kiulongthsüpuh ki tha. Tüsho alibe ju Pharao yam ching bede yü.

¹⁶ Apinü alibe dünkheaknü Abram ki tsüde rhimo tüsho api kilim namfimihnubo tüsho mihnubo, moshi, donkibo, azhorübo, tüsho kemelbo jih.

¹⁷ Tüshe Abram niube Sarai dünkheaknü Atungpuhnü Pharao tüsho api yamkhün arüm atonü thsümüchi.

¹⁸ Pharaonü Abram ji tüsho tha, “Nünü I ki rhimokhi ha tümü a? Nü niube ah de tümü thsükhi I ki müthakhea?

¹⁹ Tümüde nünü, ‘Alibe I niurü ah’ de thabah anihbe I niube thsüpü lushihkhea? Jumonü kheakü, ha kheak nü niube lah; anihbe bea lubah tsoang.”

²⁰ Jumonü Pharaonü anihbuh thsungkheaknü api mihtsürübo ki thiyukhüm jih; tüsho arünü aniube tüsho api lakhi alala bede thiyia tsoshih.