ROMRÜ KILIM PAULNÜ ATHRÜTKHI KIHÜM HUHTANYU 8 - AMÜSÜH HÜM CL Bible (BSI)

Me ching Rhangdung

¹ Jumonü kheaküa Jisu Khrista ching larü thsungkheak abahyukkhi müla.

² Tümüde Jisu Khrista ching Me rhangdung yakzannü neak yakzan tüsho ashe chingnü I zuzu kamshih.

³ Tümüde mihnü yiuhyiuhde akamshihkhi hode yakzannü müthsükhukkhi, neak kingaün jihpü neak larü nangde api tsührü thiyide, neak bahyukpü Thrünpuhnü rhimo,

⁴ junangde shih yande yung tüshe Me yande atsahrü, yakzannü thiyurolungki yihnüpü lakhi isa kheak dünjibah.

⁵ Tümüde sherü shih ayannü lachonü arü lümkhi shih kheak lachoh, tüshe sherü Me ayannü lachonü arü lümkhi Me kheak lachoh.

⁶ Shih kheak mulong zokhi ju ashekhi, tüshe Me kheak mulong zokhi ju rhangdung tüsho mungtsü.

⁷ Tümüde shih kheak mulong zokhi ju Thrünpuh kilim thiriri; junü Thrünpuh yakzan ki mümükhümkhuk, yungsho junü müthsükhuk;

⁸ tüsho shih ching larünü Thrünpuh masühshihkhuk.

⁹ Atsütsü Thrünpuh Me nüsa kheak lasho, nüsa shih ching müla tüshe me ching lah. Shepü Khrista Me mülanü api yo yung.

¹⁰ Tüshe nüsa kheak Khrista lasho, neak hode nüsa pangbo shea lalashe, thiyurolungki hode nüsa mebo arhang lah.

¹¹ Ashe chingnü Jisu bemusubuh Me nüsa kheak lasho, ashe chingnü Jisu Khrista bemusubuhnü nüsa kheak lakhi Me hode ashepü lakhi nüsa pangbo kilim rhangdung jihbah.

¹² Jumonü keoniorübo, isa mah larü ah tüshe shihnü akünkhi lapü lim yung.

¹³ Tümüde nüsanü shih ayannü lasho nüsa ashebah, tüshe nüsa Me hode pangnü arhimomihkhibo sheshihsho, nüsa arhang labah,

¹⁴ tümütüsho Thrünpuh Menü aberü alala Thrünpuh tsührübo ah.

¹⁵ Tümüde nüsanü trede atsopü azhorü me müleangkhi, tüshe tsührü thsüpü me leangkhido. Api hode isanü zhichoh, “Abba, Abuh!”

¹⁶ Me junü isa Thrünpuh tsührü ah de isa me kheak thiyumütsan thsüchoh,

¹⁷ tüsho isa ju tsührübo a sho, yamrüplurüp lurü ah–api müretahkhi ching isanü shihcham lupü thsüde isanü api thsünükhi shihcham lusho, Thrünpuh yamrüplurüp lurü tüsho Khrista lung rukhüh yamrüplurüp lurü thsübah.

Arübe Müretahkhi

¹⁸ Kheakü isa thsünükhibo ha isa ki akhiukpü lakhi müretah lung akepü müthülün de inü lümchoh.

¹⁹ Thrünpuh tsührübo thsungkheak amikheak akhiukpü thrüna lakhi alalanü mulong dukde aleanglah;

²⁰ tümüde thrüna lakhi ju aküdahnü yung, tüshe Thrünpuh lümkhinü abahyukkhi kamshih;

²¹ tümütüsho thrüna lakhi ju she athsümünim kuhi chingnü Thrünpuh tsührübo müretahkhi zuzu ching bekhitbah.

²² Tümüde thrüna lakhi alala zübe-thsünü kheakü khiungde rukhüh ashede arüchoh de isanü mükheahlah.

²³ Tüsho thrüna lakhi lang yung, tüshe Me akhuh sangaso isabo, tsührübo kampü, isa pangbo rhokhitpü aleangde alunglimnü ashechoh.

²⁴ Tümüde ha mulonglam ching isa khümkhitkheah. Angükhi mulonglam ju atsütsü mulonglam yung, tümüde apinü angükhi thsungkheak shepünü mulonglamcho?

²⁵ Tüshe amüngükhi thsungkheak isanü mulonglamsho ju thsungkheak isanü arümde aleangchoh.

²⁶ Junangde isa yiuhyiuhde alachoki Menü isa rungchoh; tümüde küde tamkhüntamnübanü isanü mümükheah; thiyubonü müthakhukbe ashede Me küdahnü isa thsungkheak Thrünpuh ki mushujihchoh.

²⁷ Tüsho mihtsürü mulong yimbuh Thrünpuhnü Me lümkhi mükheahlah, tümütüsho Thrünpuh lümkhi yande amüsührü thsungkheak Menü mushujihchoh.

²⁸ Api lümkhi yande jia larü, apinü amuzhorü ki lüpdükhi ching Thrünpuhnü atsü thsungkheak rhimochoh de isanü mükheahlah.

²⁹ Sherü Thrünpuhnü mokhita lanü, api tsührü nangde akampü büthsüde zochoh, junangde keoniorü ahihdo bolung api tsührü ju akhuhbuh thsübah.

³⁰ Tüsho apinü mokhita larü apinü ji; tüsho apinü jia larü alim mütsanjih; tüsho apinü alim mütsanjih-a larü apinü müretahshih.

Jisu Khrista ching Thrünpuh Amuzho

³¹ Dale tüsho isanü ha küde athaba? Thrünpuh ju isa thsungkheak a sho, isa azhihrü she la?

³² Shepünü nihbuh tsührü müsühmühde isa alala dünkheak jihabahkheanü, apinü lüpdükhi isa kilim müjihba de?

³³ Thrünpuhnü amokhitrü azhihde shepünü amüdampü hande arüba? Alim mütsanbuh ju Thrünpuh ah;

³⁴ shepünü amülim jihba? Juju shebah arhang kamlokhi, Thrünpuh khah tsülim lakhi isa thsungkheak mushujihbuh Jisu khrista a shi?

³⁵ Shepünü Khrista amuzho chingnü isa chamkhiba? Thsümütsü-ato, lümthsünü, thsümüchi, khümzung, bünkeang, atrebe yungsho thsühnuk a shi?

³⁶ Ha thrüta lah, “Nü dünkheaknü isa nimung amuyung laksah; isa ju alaksahpü lakhi namfimihnunu nangde khejih.”

³⁷ Yung, harü alala ching isa muzhobuh hode isa ju akuk ngürü kheaknü alü ah.

³⁸ Tümüde inü amütsankhi ju ashepü, rhangdung, yunirü, yakzanshuhrü, kheakü lakhi yungsho arüpü lakhi,

³⁹ achang, asük, yungsho thrüna lakhi alala ching tümünü she Atungpuh Jisu Khrista amuzho chingnü isa müchamkhikhuk.