ROMRÜ KILIM PAULNÜ ATHRÜTKHI KIHÜM HUHTANYU 4 - AMÜSÜH HÜM CL Bible (BSI)

Akin Hode Abraham Alim Mütsankhi

¹ Dale tüsho isa jipürü Abraham dünkheak hadürü yimkhitkhi ching tümü thaba?

² Tümüde Abraham ju rhimobo hode alim mütsana lasho, api akükheangpü lado, tüshe Thrünpuh miki yung.

³ Amüsühyunü thachoh, “Abrahamnü Thrünpuh kin, tüsho api kilim thiyuro-lungki khejih.”

⁴ Kheakü rhimobuh kilim api mihkhah mo ju thsambah nangde yung tüshe api ngüpü lakhi khejihchoh.

⁵ Tüsho shepü mürhimo tüshe amükinrü alim kamshihbuh kinrü kilim api akin ju thiyurolungki khejihchoh.

⁶ Junangde rhimo kheaknü büthsüde mihtsürü kilim Thrünpuhnü thiyuro-lungki khejihkhi Davidnü she müngühmühi tha:

⁷ “Shepü amülimbo bahjihcho, tüsho shepü neakbo lüpdojihchonü müngühmühi;

⁸ Mihtsürü shepü azhihde Atungpuhnü api neak mükhechonü müngühmühi.”

⁹ Ha müngühmühi ju tsütabahrü ki lang akhipkhitkhea shi, tsütamübahrü ki she a? Akin ju Abraham kilim thiyuro-lungki khejih de isanü thachoh.

¹⁰ Dale küde thsah ju api ki khejihkhea? Ju api tsütamübahchoki a shi? Ju ashulim yung, tüshe api tsütamübahyichoki ah.

¹¹ Apinü tsütabahkhi ju api tsütamübahyichoki akin hode alakhi thiyuro-lungki amütsan yungsho mütsanyüm khülang nangde leangkhi. Jumonü api ju tsütamübahde akinrü alala abuh ah, junangde arü ki thiyurolungki khejihbah.

¹² Tüsho api ju tsütabahrü thsungkheak lang yung tüshe api tsütamübahyichoki isa abuh Abraham akin jingshu ching tsahrü tsütabahrü abuh ah.

Akin Hode Thrünpuhnü Alokhikhi Leangkhi

¹³ Abraham tüsho api tsühsoniusobo ki alomi yamrüplurüp arünü alubah de alokhikhi ju yakzan hode yung tüshe akin thiyuro-lungki hode arü.

¹⁴ Tümüde yakzan yande alarü yamrüplurüp lurü thsüsho, akinnü ju adün-amo müla tüsho alokhikhi ju akeangkeang,

¹⁵ tümütüsho yakzannü bukakhiuk hande arüchoh, tüshe küching yakzan mülanü athsümünim müla.

¹⁶ Jumonü alokhikhi ju akin hode arüchoh, junangde alokhikhi ju mihmüthsüm kheak labah tüsho yakzan yande alarü kilim lang yung tüshe Abraham akin ching larü api tsühsoniuso alala ki alokhibah tümüde api isa alala abuh ah.

¹⁷ Ha thrüta lah: “Inü nü trükshih ahihdo abuh kamshihdo.” Api ju asherü kilim rhangdung jihkhi tüsho amülakhi thiyukhüm jih-a lashihkhi kheak kinkhi Thrünpuh miki isa abuh ah.

¹⁸ Trükshih ahihdo abuh kampü thsüde mulonglam mülakhi azhihde mulonglam ching apinü kin; api ki ha thaa lakheah, “Junangde nü tsühsoniusobo labah.”

¹⁹ Api kam 100 bande azorü lakheah; tüshe api pang ashekhi nangde lümlüm she yungsho Sara tsührü mülalashe api akin anikhüh mükam.

²⁰ Thrünpuhnü alokhikhi dünkheak apinü akin müniukniuk, tüshe api akin ching düküngde kam tüsho Thrünpuh müretahshih.

²¹ Thrünpuhnü alokhikhi arhimokhukbah de apinü mütsandakde alakheah.

²² Jumonü api ki thiyuro-lungki khejih.

²³ Kheakü api ki khejihkhi anihbuh thsungkheak lang athrütkhi yung,

²⁴ tüshe isa thsungkheak she ah. Isa Tungpuh Jisu ashe chingnü arhang kamloshihbuh Thrünpuh kheak kinrü isa ki khejihbah.

²⁵ Api ju isa neakbo dünkheak ashepü ching jih tüsho isa alim kamshihpü thsungkheak arhang kamloshih.