ROMRÜ KILIM PAULNÜ ATHRÜTKHI KIHÜM HUHTANYU 2 - AMÜSÜH HÜM CL Bible (BSI)

Thrünpuh Mahkhap

¹ Jumonü, O mihtsürü, nüsa shepünü püpürü kheak mahkhapchonü amudopü müla; tümüde api kheak mahkhapkhinü nü küdah thsüde bahyukchoh, tümütüsho nü, mahkhaprünü ju nangde rhimochoh.

² Thrünpuh mahkhap ju hadürü rhimorü kheak lungkide keamchoh de isanü mükheahlah.

³ O mihtsürü, nünü hadürü rhimode labah ju rhimorü ki mahkhapchoki nünü Thrünpuh mahkhap tsokhibah de lümcho shi?

⁴ Yungsho Thrünpuh tsükhinü nü mulong müthripü lim bechoh de mümükheahde api tsükhi, arümkheam tüsho arorikhi mükhemükimcho de?

⁵ Tüshe nü nihnihkhi tüsho nü mulong müküpkhinü Thrünpuh bukakhiukkhi, api thiyuro-lungki mahkhap amikheak akhiuk nimung thsungkheak nü azhihde bukakhiukkhi zomukhungchoh.

⁶ Tümüde mihtsürü aban apinü arhimokhi yande Thrünpuhnü thsambah jihbah.

⁷ Atsü rhimode, müretah, wüntre, tüsho amüshebe rhangdung yimrü kilim apinü lün rhangdung jihbah.

⁸ Tüshe yihnelunerü tüsho thiyuro bahyukbah amütsü yimrü thsungkheak mulong zhipzhip tüsho bukakhiuk labah.

⁹ Amütsü rhimorü mihtsürü aban akhuhde Jihudarü tüsho Greekrü thsungkheak thsümütsü tüsho lümthsünü labah;

¹⁰ tüshe atsü rhimorü aban, akhuhde Jihudarü tüsho Greekrü thsungkheak müretah, wüntre tüsho mungtsü labah.

¹¹ Tümüde Thrünpuhnü jakkheahkhi muhuhchoh.

¹² Yakzan mübede neak yihbeakrü alala yakzan mübede adükheakbah, tüsho yakzan bukkhüpnü neak yihbeakrü alala yakzannü mahkhapbah.

¹³ Tümüde Thrünpuh miki thiyuro-lungkirü ju yakzan anirü yung, tüshe alim mütsanpü larü ju yakzan yande arhimorübo lah.

¹⁴ Küyimki yakzan mülarü khiungkerünü yakzannü yihnüpü lakhi yande mihnü arhimobanü, arübo yakzan mülaa lalashe arü thsungkheak ju yakzan kamchoh.

¹⁵ Arü mulong ching yakzan thrüta lakhi rhimonü ahuhkhi arü lümkhinü thiyumütsan thsüchoh, tüsho arü dükeak ching arü lümkhinü amülim jihchoh yungsho amülim bahachihchoh.

¹⁶ Ha I yo thiyusheak-atsü yande Thrünpuhnü Jisu Khrista hode mihtsürü lümkhibo mahkhap nimung dünjibah.

Jihudarü tüsho Yakzan

¹⁷ Tüshe nünü nü küdah thsüde Jihudarü de jisho tüsho yakzan kheak mulong tode Thrünpuh kheak chingkihkhi kükheangsho,

¹⁸ tüsho nünü yakzan chingnü anikhitkhinü api lümkhi mükheahde tümü atsüanü leangkhisho,

¹⁹ tüsho nü ju müktukrü thsungkheak limthorü, amiting ching larü thsungkheak ayin khülang ah de mütsansho,

²⁰ yakzan chingnü mükheahmudu tüsho thiyuro lade makharü thsangdanrü tüsho amümükheahrü thsangyurü thsüsho–

²¹ dale tüsho nü shepünü püpürü thsangyuchonü, nü küdah thsüde müthsangyu de? Ahühkhi azhihde nünü thsangyuchoki nünü ahühcho shi?

²² Mihtsürünü müzammüram müyihbeakbeah de nünü thabah, nünü müzammüram yihbeakcho shi? Nünü sangthsü thraneanchosho, arüngyam jangkhicho shi?

²³ Nü shepünü yakzan ching kükheangchonü, nünü yakzan thsümünimde Thrünpuh ki wüntre müjihcho shi?

²⁴ Tümüde ha thrüta lah, “Nü dünkheaknü khiungkerü bolung Thrünpuh mung mükhemükima lah.”

²⁵ Nünü yakzan anisho tsütabahkhi ju adün-amo lah; tüshe nünü yakzan thsümünimsho, nü tsütabahkhi ju tsütamübahkhi kamchoh.

²⁶ Jumonü mihtsürü khülang tsütamübahde yakzan yukhüm anisho api ju tsütabahkhi nangde mükhebea de?

²⁷ Nü shepü athrütkhi la tüsho tsütabah-a lalashe yakzan thsümünimkhi lanü, shih tsütamübah tüshe yakzan zobuhnü nü bahyukbah.

²⁸ Mihtsürü ju amikheak lang a sho, yungsho amikheak shih tsütabahkhi lang a sho Jihudarü yung.

²⁹ Shepü alunglim lanü api Jihudarü ah tüsho atsütsü tsütabahkhi ju mulong tüsho me ah tüshe atsütsünü yung. Api mungshi ju mihtsürü kilimnü yung tüshe Thrünpuh kilimnü lah.