ROMRÜ KILIM PAULNÜ ATHRÜTKHI KIHÜM HUHTANYU 16 - AMÜSÜH HÜM CL Bible (BSI)

Salüm Yu

¹ Kenkrea borü ching tankihberü, isa keonioberü Phoebe dünkheak inü nüsa kilim thiyumütsan jihchoh.

² Amüsührünü arhimopü thülünkhi ching, Atungpuh mung chingnü nüsanü alibe leangkhiang, tüsho nüsa kilimnü yihnüpü tümüpürü labanü anihbe rungang, tümüde alibenü ahihkhüh kilim tüsho I she rungde arüdo.

³ Jisu Khrista ching I lung rukhüh rhimorü Priscilla tüsho Aquila büne ki salüm jihang;

⁴ anenü I rhangdung thsungkheak hahmülang luchoh–I tüsho khiungkerü borübo alalanü ane kilim makshe jihchoh;

⁵ arü yam ching mukhungrü borü ki she salüm jihang. Asia ching akhuh Khrista thsungkheak mulong müthrikhi inü muzhobuh Epaeneta ki salüm jihang.

⁶ Nüsa bolung mürangde arhimobe Mari ki salüm jihang.

⁷ I keoniorü tüsho rukhüh aramrübo Andronika tüsho Junia ki salüm jihang; ane ju amüsüh-thsangyurü bolung amükheahkhi tüsho I müngüh Khrista ching lakheah.

⁸ Atungpuh lung inü muzhokhi Ampliata ki salüm jihang.

⁹ Khrista ching isa rukhüh rhimorü Urbana, tüsho inü muzhokhi Staki ki salüm jihang.

¹⁰ Khrista kheak thiyuro lakhi Apelles ki salüm jihang. Aristobula yamkhün ki salüm jihang.

¹¹ I keoniorü Herodion ki salüm jihang. Narkisa yamkhün ching Khristan keoniorübo ki salüm jihang.

¹² Atungpuh rhimo ching larü Tryphaena tüsho Tryphosa ki salüm jihang, Atungpuh lung mürangde arhimokhi amuzho Persis ki salüm jihang.

¹³ Atungpuh lung adungtorü Rufus, tüsho tsührü nangde I mütrübe abe ki salüm jihang.

¹⁴ Asynkrita, Phlegon, Herme, Patroba, Herma, tüsho arü lung larü ki salüm jihang.

¹⁵ Philologa, Julia, Nereu tüsho achi, Olympa, tüsho arü lung larü amüsührü alala ki salüm jihang.

¹⁶ Amüsüh mün müthsüpkhinü khülangnü khülang ki salüm jihang. Khrista borübo alalalnü nüsa kilim salüm jihchoh.

Akheam Thsangdankhi

¹⁷ Keoniorübo, nüsa ki thsangyukhi akin-yakzan azhihde achamnak tüsho küpkhuk rhimorü mütsanpü nüsa ki tuthsukchoh; arü kheaknü chamkhiang.

¹⁸ Tümüde hadürü mihtsürübonü isa Atungpuh Khrista mütankihchoh, tüshe arü buk thsungkheak ah, tüsho arü yu atsü tüsho atsankhinü amülim mülarü mihtsürü mulongbo thsungyukchoh.

¹⁹ Nüsanü mihyuanikhi dünkheak mihbüm abannü sodo, jumonü nüsa kheak I asühkhinü mide lah; tüshe nüsanü atsü dünkheak inü nüsa lümlung larü tüsho amütsü dünkheak lümlang thsüshihnelah;

²⁰ junangde mungtsü Thrünpuhnü nahde nüsa jing khüp Arimri zünakbah. Isa Atungpuh Jisu Khrista amüthsüm nüsa lung laang.

²¹ I lung rukhüh rhimorü Timothinü nüsa kilim salüm jihchoh; I keoniorübo Lucia, Jason tüsho Sosipaternü she ah.

²² Ha kihüm thrütbuh, I Tertianü nüsa kilim Khristan salüm jihchoh.

²³ I tüsho borü alala yamputungpuh Gaianü nüsa kilim salüm jihchoh. Kiuto rahpung akambuh Erasta tüsho isa keoniorü Quartanü nüsa kilim salüm jihchoh.

²⁴ Isa Atungpuh Jisu Khrista amüthsüm nüsa alala lung laang. Amen.

Akheam Mungshi Tamkhüntamnü

²⁵ Isanü Thrünpuh kilim müretah jihanü! Jisu Khrista dünkheak inü nüsa ki thiyusheak atsü thsangyuthsangrakhi tüsho ahokhi lün ashang rama lakhi thiyuro amikheak akhiukkhi yande apinü nüsa akin ching düküngde azhipshihpü kuklah.

²⁶ Judüalalashe kheakü, wukihrübonü athrütkhi hode thiyuro ju amikheak akhiukshih; tüsho akheam müla Thrünpuh yukhüm hode trükshih alala ki ju mükheahshih, junangde alalanü akinbah tüsho mihyuanibah.

²⁷ Alala lümlung labuh, Thrünpuh kilim lang, Jisu Khrista hode lün thsungkheak müretahshang! Amen.