ROMRÜ KILIM PAULNÜ ATHRÜTKHI KIHÜM HUHTANYU 15 - AMÜSÜH HÜM CL Bible (BSI)

Nü Yungde Püpürü Asühshang

¹ Isa reangzahde alarünü reangmüzahrü akuk müngükhi ching arümkheambeah, tüsho isa asühpü thsungkheak yung.

² Isa mihbüm abannü nihbuh yamhingrü düküngde atsü kamshihpü asühshahnü.

³ Tümütüsho Khristanü nihbuh masühshih; tüshe amüsühyu ching thrütkhi nangde, “Nü mükhemükimkhibo I kheak keam.”

⁴ Tümüpürü adüso nimungbo ching thrütkheanü, isa thsangyupü thsungkheak lakheah, junangde amüsühyu düküngkhi tüsho tuthsukkhinü isa mulonglam labah.

⁵ Adüküng tüsho tuthsukkhi Thrünpuhnü Jisu Khrista lung arihde khülangnü khülang arihakode alapü nüsa ki mülüshang,

⁶ junangde rukhühnü nüsa düsheak khülang thsübah isa Atungpuh Jisu Khrista Abuh tüsho Thrünpuh müretahbah.

Khiungkerü thsungkheak Thiyusheak Atsü

⁷ Khristanü Thrünpuh müretahpü thsungkheak nüsa leangkhikhi nangde khülangnü khülang leangkhiang.

⁸ Tümüde jipürü ki alokhikhi adüngakhipü Thrünpuh thiyuro thsung thsüde Khrista ju Jihudarü yamlarü kamkheah de inü nüsa ki thachoh,

⁹ tüsho junangde khiungkerünü api amüthsüm thsungkheak Thrünpuh müretahpü lakheah. Ha thrüta lah, “Jumonü inü khiungkerü bolung nü shijihbah, tüsho nü shide khün thsübah”;

¹⁰ Kheaküshe tha, “Api mihtsürü lung asühachihang, O khiungkerü”;

¹¹ tüsho kheaküshe, “Khiungkerü alalanü Atungpuh shiang, tüsho mihtsürü alalanü api shishang”;

¹² tüsho kheaküshe Isaianü thachoh, “Jesse tsühsoniuso arübah; khiungkerü yakzan shuhpü api arübah tüsho api kheak arünü mulonglam labah.”

¹³ Mulonglam Thrünpuhnü api kinkhi chingnü nüsa asühachih tüsho mungtsünü mishang, junangde Amüsüh wu hode nüsa mulonglam suhdahde alabah.

Paulnü Mulong Tode Athrütkhi Amütsan

¹⁴ I keoniorübo, nüsa atsünü mide, mükheahmudu alalanü mide, tüsho khülangnü khülang thsangdanachihpü kukkhi hode nüsa dünkheak I reangkeamlah.

¹⁵ Tüshe ju yubo dünkheak lang lümkhitloshihde khide mulong tode inü nüsa kilim thrütdo, tümütüsho Thrünpuhnü I kilim amüthsüm jihkhi hode

¹⁶ khiungkerü kilim Thrünpuh thiyusheak-atsü amükeamrü thsüde tankihpü ching Jisu Khrista tankihrü thsükhinü, junangde khiungkerü kingaünkhi ju Amüsüh Menü atsangkhitkhi, aleangkhikhukbe labah.

¹⁷ Jisu Khrista ching, Thrünpuh thsungkheaknü I rhimo dünkheak kükheangpü amütsan lah.

¹⁸ Inü athakhi tüsho arhimokhinü, khiungkerünü Thrünpuh ki mihyuanishihde Khristanü I hode akuk ngükhi kheak hode inü tümü she müthanü–

¹⁹ Me wu hode amüyinsahbe tüsho khinthiyinbe wunü, junangde Jirusalem chingnü mükamde yünü Illyrikum khiungde Khrista thiyusheak-atsü khiukde zhiyukdo.

²⁰ Khürünü khimtankhi kheak inü mürhimopü thsüde Khrista mümükheahpung ching thiyusheak-atsü thsangyuthsangrapü ju kamruhroro I mükkheahkih lakheah.

²¹ Ha thrüta lah, “Api dünkheak sherü ki müthakheanü arünü angübah, tüsho küyimkishe api dünkheak musorünü anikhitbah.”

Paulnü Rom Rhua Kheahpü Lümkhi

²² Junangde I nüsa kilim arüpü khip aban zhipdode lado.

²³ Tüshe kheakü, harü kewungbo ching I rhimopü dangpung müla, tüsho I nüsa kilim arüpü kam ashang chingnü mulong dukde lado,

²⁴ I Spain lim yüchoki inü nüsa shorupü lümlah. Tsahhode alachoki inü nüsa shorupü mulonglam lah tüsho I nüsa lung anükhüh kheak bin dunglim I hantsah ching nüsa arung ngübah.

²⁵ Tütüshe kheakü, amüsührübo kilim arung jihpü hanbah I Jirusalem lim yüchoh.

²⁶ Tümütüsho Macedonia tüsho Akaiarünü Jirusalem ching amüsührü bolung zhochihrü thsungkheak asühde arung jihpü rhimo;

²⁷ arünü ju rhimopü pungkhi, tüsho atsütsü, arübo kilim arü shozüng lah, tümüde khiungkerünü arü me müngühmühi ching shihcham lusho, arünü kukruk müngühmühi chingnü arü rungbeah.

²⁸ Jumonü küyimki inü ha banba, tüsho inü thremukhungkhi arü kilim jihbanü, limro ching nüsa shorude Spain lim yübah;

²⁹ tüsho küyimki I nüsa kilim arübanü Khrista müngühmühi khiukdahkhi ching I arübah de inü mükheahlah.

³⁰ Keoniorübo, I thsungkheaknü Thrünpuh kilim nüsa tamkhüntamnü ching I lung arihpü isa Atungpuh Jisu khrista tüsho Me amuzho hode inü nüsa ki tuthsukchoh,

³¹ junangde Judea ching amükinrübo kheaknü I bekhitbah, tüsho Jirusalem ching I tankihkhi amüsührübo ki aleangkhikhukbe labah,

³² junangde Thrünpuh lümkhi hode I nüsa kilim asühde arübah tüsho nüsa lung bekhi ching reangzahbah.

³³ Mungtsü Thrünpuh nüsa alala lung laang. Amen.