NEHEMIA 9 - AMÜSÜH HÜM CL Bible (BSI)

Mihtsürübonü Neak Alokhikhi

¹ Ju khinu nimung mukukheak phüyi ni Israelrübonü shungliukhim phuyu tüsho arü ku kheak asungthulung kamkihde khümkeak thsüde mukhung.

² Tüsho arünü khiungkerü kheaknü chamkhi, tüsho zhipbahle arü neak le jipürü neak alokhi.

³ Kimkhü 3 bande arü ki Atungpuh arü Thrünpuh yakzan kheyuk, jushu kimkhü 3 arü neak alokhide Atungpuh arü Thrünpuh kingaün.

⁴ Ju ching Levirü thsungkheak sadam lakheah, ju kheak zhiprü Jeshua, Bani, Kadmiel, Shebania, Bunni, Sherebia, Bani tüsho Kenani. Arünü Atungpuh arü Thrünpuh ki achangnü tamkhüntamnü.

⁵ Tüshe Levirü, Jeshua, Kadmiel, Bani, Hashabneia, Sherebia, Hodia, Shebania tüsho Pethahia pürünü tha, “Zhipang tüsho Atungpuh nüsa Thrünpuh shiang, api akheam mülakhi lünnü lün shiang! Müngühmühi tüsho mungshikhi alala kurungkheak shuhkihkhi nü mung müretahkhi müngühmühi thsang!”

Neak Alokhikhi Tamkhüntamnü

⁶ Israelrünü hade tamkhüntamnü: Nü, Atungpuh , nü lang Atungpuh ah; nünü thüning, achangbe thüningbo tüsho chiningbo thrün. Nünü alo, keto tüsho ju ching mungjithürü bebah thrün; nünü alala kilim rhangdung jih. Thüningrü botonü khukningbah nü kingaün.

⁷ Nü, Atungpuh Thrünpuhnü Abram mokhit tüsho Babilon lomi Ur chingnü bekhit; nünü api mung Abraham de müthrijih.

⁸ Nü kheak thiyuro lah de nünü api ngü tüsho api kheak tangzüng. Nünü api kheak Kananrü, Hitrü, Amorrü, Perizrü, Jebusrü tüsho Girgashrü lo api tsühsoniuso lashihpü thiyuchihchim. Nünü thiyuchihchimkhi rhimodo, tümüde nü thiyuro. @1-LINE- SP ACE=

⁹ Isa jipürü Ijip ching thsünükhi nünü ngü; Amürüm Keto ching arünü arung kheangde azhikhi nünü so.

¹⁰ Pharao kiulongthsüpuh, atorü tüsho ju lo mihtsürü azhihde mükheahmihbe tüsho khinthiyinbe yüshih, tümüde arünü nü mihtsürü küde junokheanü nünü mükheah. Nünü nü mungthukhi khihni khiungde lah.

¹¹ Nü mihtsürü thsungkheak nünü keto azüshihde limro huh, tüsho arü akung lo ching bekhiung. Arü müshamrü lung keto asük ching jipyukkhi nangde thüraksah.

¹² Animung amo dungtonü nünü arü be tüsho mo dungtonü azhing ching arü limro yinshih.

¹³ Nü yinmi chingnü Sinai Müzüng kheak aki; nünü nü mihtsürü ki asukachih tüsho thiyuro yuzüng, yakzan, tüsho thiyukhümbo jih.

¹⁴ Amunimung mümihde azopü nünü arü ki mükheahshih, tüsho nü yamlarü Mosa hode arü ki thiyukhüm, thiyuzüng tüsho yakzanbojih. @1-LINE- SP ACE=

¹⁵ Arü khümde alachoki, nünü yinmi chingnü yikhap kip tüsho arü kethürichoki lung chingnü ke rhapkhita duh. Arü kilim jihpü alokhikhi lo mükühshihpü nünü arü ki tha.

¹⁶ Tüshe isa jipürübonü nihnihde la tüsho nü yukhüm mani.

¹⁷ Arünü mihyuanipü reanglo; arünü nünü arhimokhi mihdo; arünü nünü amükheahmihbe huhkhi mihdo. Arü kükheangkhi chingnü limberü mokhitbah Ijip azhorü kuhi ching belobah ayüshihpü kamshih. Tüshe nü a neak bahjihrü Thrünpuh ah; nü a mihmüthsümrü tüsho amuzhorü, arünnü bukakhiukchoh. Nü mihmüthsüm ato; jumonü nünü arü mübahyuk.

¹⁸ Arünü sangthsü moshi nunu pang yande thsü tüsho ju thrünpuhnü arü Ijip chingnü bekhit de tha! Arünü küdükhüh mükhemükimde, Atungpuh !

¹⁹ Nünü arü sunglo dang ching mübahjih, tümüde nü amüthsüm ju ato. Animung tüsho azhing limro huhkhi amo dungto yungsho mo dungto nünü lubah mutso.

²⁰ Nü tsüyihkhi chingnü tümü rhimobeanü nünü arü ki tha; nünü arü mün chingnü manna mutuklojih tüsho ayungpü ke jih.

²¹ Sunglo dang ching kam yirü amuyung arü mütrü; arü khimmih küyimkishe mümürhüt tüsho arü jing thsüde mübüm. @1-LINE- SP ACE=

²² Nünü arü ki lomibo, kiulongthsübo tüsho arü arerü lobo kukkhitshih. Arünü Heshbonrü lo Sihon yakzan zhimpung Og kiulongthsüpung Bashanrü lo yankhia lushih.

²³ Thüning ching chiningbo nangde nünü arü kilim tsührübo jih, tüsho nünü arü jipürü ki müküh-a lushihpü thakhi lo ching arü bebah arü.

²⁴ Jumonü mihtsürübonü yübah Kanan lo müküh-a lu; nünü arü miki ju lo ching larü Kananrü, kiulongthsürü tüsho mihtsürübo junoshih, junangde arünü akünkhi arü kheak rhimo.

²⁵ Müküpde chipi ayünkhi kiutobo, lotsülo, lakhitnü amikhi yambo, kiua lakhi kekhipbo, tüsho kurungasolu, oliv dungbo, nü mihtsürübonü yankhia lu. Arü künkhi tsühde shihkih; nünü ajihkhi kukruk atsübo ching arü reangkeamde asüh. @1-LINE- SP ACE=

²⁶ Tüshe nü mihtsürübonü nü azhihde mihyu mani; nü yakzan arü dunglim bah. Wukihrübo sherünü nü kilim rholoang de arü müzünde azhikheanü laksah. Arünü khide nü mükhemürang thsü,

²⁷ jumonü nünü arübo arü thsünüshihrü thiriri khah ching jihabah. Tüsho arü küpkhukkhi ching arung kheangde azhichoki nünü yinmi chingnü alojih. Nü amüthsüm ato ching arü riri khah chingnü khümkhitpü limberü thiyi.

²⁸ Küyimki mungtsü alodarükhea, arünü neak yihbeaklo, tüsho nünü arübo arü riri khah ching jihabah. Judüalalashe küyimki mulong rholode arü khümkhitshihpü nü ki keokhea, kim kim ching, nünü yinmi chingnü so, nü amüthsüm ato ching arü khümkhit.

²⁹ Nü yuzüng anishihpü nünü arü ki müzünde tha, tüshe arünü ha anibah rhangdung lapü thsüthsü she arünü kükheangde nü yakzan mani, tüshe nü yakzan azhihde neak yihbeak. Mulong müküpde tüsho nihnihde, arünü mihyuanipü reanglo.

³⁰ Kam ashang nünü arü ki arümkheam, tüsho nü memüsühnü wukihrübo hode thashih; tüshe arü nükhünnü mani, jumonü nünü arübo püpürü lomi khah ching jihabah.

³¹ Tütüshe, nü amüthsüm tokhinü, nünü arü mübahyuk yungsho müdükheakshih. Nü a amuzho tüsho amüthsüm Thrünpuh. @1-LINE- SP ACE=

³² O Thrünpuh, isa Thrünpuh, nü küdükhüh ato! Küdükhüh atrebe, küdükhüh wu! Nünü tangzüngkhibo thiyuronü rhimodo. Asiria kiulongthsürünü isa junokhi chingnü, kheakü khiungde! Isa kiulongthsürübo, limberübo, amükeamrübo tüsho wukihrübo, jipürübo, tüsho mihtsürü alala kheak küpkhukkhi nü miki anikhüh nangde dükamshih!

³³ Nünü isa alungki ching thsümüchido; neak yihbeakbeak she nünü isa muzhode müthsüm.

³⁴ Isa jipürübo, kiulongthsürübo, limberübo tüsho amükeamrünü nü yakzan müyan. Arünü nü yukhüm tüsho müzünde athakhi mani.

³⁵ Arünü arü kiulongthsü ching, nünü arü kilim jihkhi nü tsüdakkhi ching, tüsho nünü arü müngüh zojihkhi ato tüsho lotsülo ching nü mütankih; tüsho arünü amütsü rhimo chingnü murholo.

³⁶ Kheahang, nünü isa jipürü kilim sangsolungso tüsho tsühyungpübo atsü tsühde asühshihpü jihkhi lo ching khihni isa azhorü lah.

³⁷ Tüsho isa neak hode alo chingnü akhiukkhibo nünü isa kurungkheak zojihkhi kiulongthsürübo kilim jihchoh; arünü isa pang tüsho isa shiwüh kheak arü künkhi rhimochoh, tüsho isa mulong kimikhi ching lah.

Mihtsürübonü Tangzüng Mütsan-dokhi

³⁸ Harübo dünjikhi hode, isa Israelrünü düküngde tangzüng, tüsho thrüt tüsho limberübo, Levirübo tüsho amükeamrübonü arü mütsan yümkih.