NEHEMIA 8 - AMÜSÜH HÜM CL Bible (BSI)

Ezranü Yakzan Khekhi

¹ Tüsho ju khinu atan ni mihtsürü alala nihbuh langzü mihtsürü khülang kamde Jirusalem ching Ke Chipiripit müngüh wungdo limro mukhungde arü, tüsho arünü Ezra ki Atungpuhnü ajihkhi Mosa Yakzan Hüm lubah arang de tha.

² Jumonü Ezranü khinu thüne atan nipü amukhungrü miki hande arü– athrürübo, aliberübo, tüsho azürü alalanü tsüde anikhit.

³ Wungdo limro chipiripit ki apinü arü ki yakzan ju yapsunü animuro khiungde khe, tüsho arü alalanü keamramde ani.

⁴ Ezra a ju kim ching thsungkheak thsükhi sang sadam kheak zhip. Mihtsürü harü tsülimpeang zhip: Mattithia, Shema, Anaia, Uria, Hilkia, tüsho Maaseia, tüsho huzulim zhiprü: Pedaia, Mishael, Malkhija, Hashum, Hashbaddana, Zekaria, tüsho Meshullam.

⁵ Ezranü sadam achang kheak mihtsürübo kumung yükih azhipchoki, arü alala müknü api kheak kheahkih. Apinü hüm khimshuh akede arü alala wusu.

⁶ Ezranü tha, “Wuto Thrünpuh, Atungpuh shiang!” Mihtsürübonü khah shuhkihde alo, “Amen, Amen!” Arü miro alo lim kheahbah, khukningde kingaün.

⁷ Jushu arünü nihbuh binpung wusu, tüsho Levirübo harünü arü ki yakzan thathünaka huh: Jeshua, Bani, Sherebia, Jamin, Akkub, Shabbethai, Hodia, Maaseia, Kelita, Azaria, Jozabad, Hanan, Pelaia.

⁸ Mihtsürübonü anikhitpü thsüde arünü Thrünpuh yakzan ju yihphülapde thathünaka huh.

⁹ Küyimki mihtsürübonü yakzan sokhea, arü mulong khide qiu tüsho atrippü tankih. Jumonü kovünor Nehemia, amükeambuh tüsho yakzan mükheahmudurü Ezranü mihtsürübo ki tha, “Ha nimung ha Atungpuh nüsa Thrünpuh kilim amüsüh ah, nüsa mulong dürozhak tüsho dütrip.

¹⁰ Kheakü thüyam lim yüang tüsho aniojiang. Nüsanü tsühyungpü musuhdahrü ki chamachihang. Khihni ha isa Atungpuh kilim amüsüh ah, jumonü mulong dütukthsü. Asühpü Atungpuh nü ajihkhi hode nüsa reangzahshihbah.”

¹¹ Jumonü Levirünü mihtsürü alala keamramshihde tha, “ Keamramde laang, tümüde ha nimung amüsüh ah; lungride düla.”

¹² Tüsho mihtsürü alala thüyam lim yübah tsühyungde asühachih tüsho püpürü ki she arü lakhi chamachih, tümüde arü ki khea huhkhi yubo arünü anikhit.

Khimyam Thünio

¹³ Ju khinu ashidopü trük ching azothsürübonü amükeamrü tüsho Levirü lung nungbah, yakzan yubo yimpü Ezra ki mukhung.

¹⁴ Tüsho Israelrü tsührübo khinu thünepü thünio ching khimyam ching laang de Atungpuh nü thiyukhüm jihkhi Mosa yakzan ching ngü.

¹⁵ Jumonü arünü Jirusalem tüsho püpü kiutobo ching thiyusheak hade azhiyukshihpü thiyi: “Awungbo ching wukhiukang tüsho tsünsang, oliv, rhümthüneabe sangbün dung tüsho püpü sangdungbo chingnü yakzan ching thrüta lakhi nangde yünshim thsüpü akhahbo ngama hanbah arang.”

¹⁶ Jumonü mihtsürübonü hande arübah arü yam kheak, thüyam ki, arüngyam yeande, Ke Chipiripit yean wungdo limro tüsho Ephraim Chipiripitbo ching yünshimbo thsü.

¹⁷ Ramtso chingnü alunglorü alalanü yünshim thsübah ju ching la; tümüde Nun tsührü Jihusua kim chingnü rhimode arüchoki Israelrünü ha ruk nioa mükheah. Tüsho arü asühachihkhi ju ato lakheah.

¹⁸ Thünio atan ninü akheam khiungde nimung aban apinü Thrünpuh yakzan hüm chingnü khe. Arünü nimung thüne arüng, tüsho yakzan ching lakhi yande nimung atizheah ni akheam arüng münchi mung.