NEHEMIA 6 - AMÜSÜH HÜM CL Bible (BSI)

Nehemia azhihde Mulomülapkhi

¹ Chipiripitbo ching khimdopü müthsüyia lalashe isa chipi akhünbit lang she muwode bando de Sanballat, Tobia, Geshem tüsho isa riribonü so.

² Tahle Sanballat tüsho Geshem bünenü Ono dükhün kiulong ching I ane shoruang de thiyusheak jih. Tüshe ju I thsümüchipü arü rük thsükheah.

³ Jumonü yunithsürü thiyia thiyusheak hanbah arü ki yünü thashih, “I rhimo adungto rhimochoh dale I makikhuk. Nüsa shorupü akipü thsungkheaknü I rhimo tuklobea de?”

⁴ Ju yusheak lang arünü I kilim phüyi ki arüshih, tüshe ju aban ju ruk lang alojih.

⁵ Tüshe Sanballatnü aphüngüpü yusheak ayamlarü thiyia amüshungkhi kihüm hanbah arüshih.

⁶ Ha ruk thrüt, “Nü tüsho Jihudarübonü mührü azhihde münitpü thsüde chipi thsülokhi hode mühi lomibo ching arhunganimchoh de Geshemnü I ki tha, jumonü nünü chipi thsülochoh. Tüsho arü kurungkheak nü kiulongthsüpuh thsübah de thado.

⁷ Tüsho wukihrü khürü thiyia Jirusalem ching nü ju Juda kiulongthsüpuh ah de zhishihchoh düshe thado. Ha ruk I kiulongthsüpuhnü dükde sodo, jumonü judürü lümkhi asukachihpü thsüde ike shoruachihanü de thaakheahchoh.”

⁸ Inü api kilim thalo, “Nünü athakhi khülang she dükdü yung. Alala nü lümkangyu lang ah.”

⁹ Isa sühmüh mülade rhimo tukloshihpü thsüde arünü amüzünpü mürang. Tüshe inü tamkhüntamnü, “Tütüshe, Thrünpuh I reangzahshang!”

¹⁰ Judüki Mehetabel tsührü Delaia tsührü Shemaia aramyu tharü, ayam ching khimdobah abinkhi shorupü I yü. Apinü tha, “Nü tüsho I Amüsüh Arüngyam ching yünü rihdoa jika binanü, tümüde nü laksahpü arümuroh. Tüsho nü azhing ching laksahpü arübah.”

¹¹ Inü alo, “I alihde ajikrü mihtsürü yung. Arüngyam ching jikde I rhangdung khümkhitbah de nünü lümcho shi? Inü jude müthsü.”

¹² Küyimki inü lümakheahkhea, Shemaia kheak Thrünpuhnü masukachih de lümlo, tüshe Tobia le Sanballat bünenü abuknimbah I müzünshih-a lah.

¹³ Arünü api muloa I amünean ching müzünyukkhinü mung atsü dükheakshihde ajunopü lüm.

¹⁴ Inü tamkhüntamnü, “Thrünpuh, Tobia le Sanballat bünenü arhimokhi ju lümkhitang tüsho ane thsümüchiang. I müzünrü alibe Nodia tüsho wukihrü püpürübo lümkhitang.”

Chipi Rhimo Akhik Thsükhi

¹⁵ Nimung thünimkheak mahne ni rhimoshu Elul khinu nimung mukukheak phüngü nipü ban.

¹⁶ Küyimki isa riri mühirü lomibonü ha sokhea, arübo tre tüsho achihde lüm tümüde Thrünpuh arung hode rhimo akhik thsüdo de mihbüm abannü mükheah.

¹⁷ Ha kim amuyung Jihudarü limberünü Tobia kilim kihüm jihde thiyusheak luachihde alakheah.

¹⁸ Tümüde Juda ching ahihdo api tsangde alakheah, tümütüsho api ju Ara tsührü Shekania tsühmeak lakheah, tüsho atsührü Jehohanannü Berekia tsührü Meshullam tsührü lukheah.

¹⁹ Mihtsürübonü I ki Tobianü atsü rhimokhi tha tüsho inü athakhi athrünkhi api ki tha, tüsho I müzünde kihüm arüshih.