NEHEMIA 2 - AMÜSÜH HÜM CL Bible (BSI)

Nehemia Jirusalem lim Yükhi

¹ Kiulongthsüpuh Artazerzes kiulongthsü kam muku bankhitchoki, Nisan khinu ching api yimtsühde alachoki inü yukhu hande yünü jih. Küyimkishe I mulong tukthsüde api miki muhuhakheah,

² jumonü apinü keokhi, “Nü mutukthsüthsüa tümüde nü miro mulong tukthsüde huhcho le? Ha tümü yung tüshe mulong masühkhinü ah.” I khide tre

³ tüsho alo, “ Kiulongthsüpuh, kutsüpde laang! Isa jipürü kiuyuka bahpung kiuto thsümünima tüsho chipiripitbo monü takabah-a lachoki tümüde I mulong mutukthsüpü?”

⁴ Kiulongthsüpuhnü keokhi, “Nünü akünkhi ju tümü a?” Inü yinmi Thrünpuh ki tamkhüntamnü,

⁵ tüsho kiulongthsüpuh ki tha, “Nünü mulongde inü amushukhi anijihsho, isa jipürü kiuyuka bahpung, Juda lomi ching kiuto thsülopü I yüshang.”

⁶ Kiulongthsüpuhnü aniube arheang ki binbahle I ki keokhi, “Nü külokhüh hantsahba tüsho küyimki alodarüba?” Kiulongthsüpuhnü I yüshihpü mülü, jumonü adükeak api ki thaa huh.

⁷ Jumonü I Juda lim yükhukpü thsüde aniyüzahlim kovünorbo kilim kihüm jihang de inü kiulongthsüpuh ki tha.

⁸ Tüsho kiulongthsüpuh sangmüküh neakbuh Asaph kilim, arüngyam shahwün chipiripitbo, kiuto chipi thsungkheak tüsho I lapung thsüpü sang jihshihpü kihüm thrütang de inü tha. Inü akheangkhi alala kiulongthsüpuhnü mülüjih, tümüde Thrünpuh I lung lakheah.

⁹ Kiulongthsüpuhnü bonungrü aberü tüsho khoraberü khürü I lung arüshih, tüsho Aniyüzahlim Euphra thrip hantsahmusu. Ju ching kovünorbo kilim inü kihüm jih.

¹⁰ Tüshe Sanballat Beth-horon kiuto chingnü tüsho Tobia Amonrü, Israelrü thsungkheak rungde arhimorü arüa lah de sobah ane mulong masühde kam.

¹¹ I Jirusalem lim yü, tüsho nimung mahsam khiungde

¹² Jirusalem thsungkheaknü arhimopü I mulong ching Thrünpuhnü aqiukhi she ki she mütha. Tüshe thüning dukmuro I asürü tüsho I lung aturü khürü bebah tso. Shiwüh she inü abekhi donki lang isa lung be.

¹³ Azhing ching ju kiuto chingnü tsahmusubah Jindükhün Chipiripit huzulimpeang tüsho jingbolim shirung shihye hode müneanmuru bahpung chipiripit lim yü. I yübah kiuto chipi keamkhi tüsho chipimurungbo monü takabahkhi chinzhina kheah.

¹⁴ Tüsho aniakhiuklim Kenü Chipiripit le kiulongthsüpuh kedükim yimde kumung lim wutu. Inü abekhi donkinü lungtraktrak hode müyükhuk,

¹⁵ jumonü azhing ching Kidron jindükhün limnü yübah chipi ju chinzhina kheah. Junangde I arükhi ru yande Jindükhün Chipiripit hode kiuto lim alodarü.

¹⁶ I küching lakhea tüsho tümü rhimokheanü atorü shenü she mümükheah. Ju lang yung tüshe Jihudarü amükeamrü, limberü, atorübo, yungsho rhimo ching shihcham lupü larü she ki she mütha.

¹⁷ Tüshe inü arü ki tha, “ Kheahang isa küdükhüh thsünükhi ching la, tümüde Jirusalem thsümünima lah tüsho chipiripitbo monü taka lah! Arang, isanü Jirusalem chipi thsüloanü, ju hode isa kheak mihmüthsüm mülakhi arün thsüshihanü.”

¹⁸ Tüsho Thrünpuhnü küruk I lung lakhea tüsho I rungde, tüsho kiulongthsüpuhnü tümü thakheanü arü ki thaa huh. Arünü alo, “Isanü athsülopü tankihanü!” Tüsho arünü rhimo tankihpü tsanglung.

¹⁹ Küyimki Sanballat, Tobia tüsho Arabrü Geshem arünü isa akeanangkhi sokhea, arünü isa kheak münejihde tha, “Nüsanü rhimocho ju tümü ah de lümcho le? Nüsa kiulongthsüpuh azhihpü thsücho de?”

²⁰ Inü alo, “Yinmi Thrünpuhnü isa akuk ngüshihbah. Isa api tankihrünü thüyam thsüpü tankihbah. Tüshe nüsa Jirusalem yamrüplurüp lupü alim müla tüsho ju ching nüsa shihcham müla.”