NAHUM 3 - AMÜSÜH HÜM CL Bible (BSI)

¹ Ayokhe! thiyih bukkhi kiuto, akeangyunü amikhi, ayankhikhinü amikhi, ayankhikhinü akheam müla!

² Shitso düsheak tüsho lolungbe jingkhün, khora jukkihchoh tüsho khora-lolungbe dükhiungchoh!

³ Khoraberünü müneahchoh, nukshang phürapchoh tüsho thsüh rakrakchoh, ashekhi keamkihchoh, ashemibo mujunglah, ashemi pangbo mükhebin– arübo ju mibo kheaknü mürhelochoh!

⁴ Tümütüsho mükhebinkhi müzammüram amülim thsükhinü, münitphülapkhi, anihbe wurük, shepünü lomi tüsho mihtsürü anihbenü bemüchihkhi tüsho wurük hode azhorü kamshih,

⁵ inü nü azhihde lah, Wuto Atungpuhnü thachoh, tüsho nü rungthsün nü miro kheak lahkihjihbah; tüsho inü trükshihbonü nü bünkeang kheak tüsho kiulongthsübonü nü achih ngükhi kheahshihbah.

⁶ Inü müneanmuru nü kheak bahbah tüsho bahyukde nü jungbah, tüsho mükkheahdung kamshihbah.

⁷ Judüki nü ngürü alalanü nü kheaknü arholobah tüsho athabah, “ Nineve thsümünima lah; shepünü anihbe lümrhihba?” Nü shukheamrü inü küchingnü ayimba?

⁸ Nü a Nile kheak lakhi Thebes, kenü mükamdoa lakhi a shi? Ayung ju anihbe tsunglobe, kebo anihbe chipi lakheah.

⁹ Kush tüsho Ijip ju anihbe sühmüh arün mülakhi lakheah; Put tüsho Libya anihbe müshiprü bolung lakheah.

¹⁰ Tütüshe anihbe rama lubah ramtso ching yü; anihbe khungarübo she kiudunglimro yean aban ching adütre kamde kingthünak; anihbe mükheahmudurü dünkheaknü azanbo thsü, tüsho anihbe torü alala wuhrünliubo yuk.

¹¹ Nü she amüshangbah, nü jikde ayübah; nü thiriri kheaknü tsoyukpung yimbah.

¹² Nü chipibo alala akhuh asokihkhi kurungasodung nangde–aniungsho atsührü mün ching keamchoh.

¹³ Nü rithsürübo kheahang: arübo azoberü nangde lah, nü lomi chipiripitbo nü riribo kilim khimshuhmülih-a lah; nü chipiripit rihbebo monü aniuabahdo.

¹⁴ Ayanchoki thsungkheak ke khipang, nü chipibo thsakhamang; lotaklung thsüpü alo müleang, tüsho lotaklung tsanglungang!

¹⁵ Ju ching monü aniubah, nukshangnü nü lipkhibah. Hanü nü tangkhonü nangde tsühabahbah. Tangkhobo nangde nü hihde kamdo!

¹⁶ Nünü shothsümolorübo thüning ching chiningbo kheaknü hihde kamshihdo. Tangkhobo nangde arü ghi chutreakbah phinde tsochoh.

¹⁷ Nü aheangrübo sangyü-tangkhobo nangde, nü yo atorübo tangkho boto athsak nimung shahwün kheak binkhi nangde lah–küyimki ani akhiukbanü, arübo phinde tsoabahchoh; arü küching yüdünü shenü mümükheah.

¹⁸ Nü yo namfimihnu neakrübo yapshea lah, O Asiria kiulongthsüpuh; nü yo mükheahmudurübo anechoh. Nü mihtsürübo abemukhungrü mülade müzüngbo kheak hiumüzüta lah.

¹⁹ Tümünü nü mü müthsüngukhuk; nü yurikhi ashebe lah. Nü yusheak sorü aban nü keamkhi dünkheak khah damchoh, Khürünü akheam mülakhi nü bukmükekhi chingnü tsokhidü de?