MUNGSHIKHÜN 96 - AMÜSÜH HÜM CL Bible (BSI)

Thrünpuh ju Atoachang Kiulongthsürü

¹ O, Atungpuh ki khün aso khülang thsang! Atungpuh ki khün thsang, alomi alala.

² Atungpuh ki khün thsang, api mung shiang; api akhümkhit thiyusheak atsü nimung aban zhiyukang.

³ Trükshihbo lung api müretahkhi, mihtsürü alala bolung api amüyinsahbebo khipkhitang.

⁴ Tümüde Atungpuh ju ato tüsho tode ashijihpü lah; api ju thrünpuhbo alala kurungkheak trepü lah.

⁵ Tümüde mihtsürü thrünpuhbo alala sangthsübo ah, tüshe Atungpuhnü thüningbo thrün.

⁶ Wüntre tüsho wüntre-müretah api miki lah; sühmüh tüsho jaktsü api arüngakopung lah.

⁷ Atungpuh shiang, O mihtsürü yamkhünbo, Atungpuh müretah tüsho sühmüh shiang.

⁸ Atungpuh müretahkhi mung shiang; kingaün khülang lubah arang tüsho api arüngyam ching azahang.

⁹ O, amüsüh jaktsü ching Atungpuh kingaünang! Api miki ajanang, alomi alala.

¹⁰ Trükshihbo lung thaang, “Atungpuhnü kiulongthsüchoh; alomiküp she düngde thsüa lah, ha maphap; apinü thiyuro-lungkinü mihtsürübo mahkhapbah.”

¹¹ Yinmibo asühachihang, tüsho alomi asühang; keto tüsho ju ching lakhi alala arungshang;

¹² Thulu tüsho ju ching lakhi alala asühachihshang. Sangdungbo alalanü Atungpuh miki asühachihbah.

¹³ Tümüde api arüchoh, tümüde api alomi mahkhappü arüchoh. Apinü alomiküp thiyuro-lungkinü, tüsho mihtsürü api thiyuronü mahkhapbah.