MUNGSHIKHÜN 95 - AMÜSÜH HÜM CL Bible (BSI)

Mungshikhi Khün

¹ O arang, isanü Atungpuh ki khün thsanü! Isanü isa akhümkhit lungto ki asühachihde ahoanü.

² Isanü makshe jihde api miki aranü; isanü mungshikhünbo bede api ki asühachihde ahoanü.

³ Tümüde Atungpuh ju ato Thrünpuh, tüsho thrünpuhbo alala kurungkheak ato kiulongthsürü ah.

⁴ Api khahbo ching alo asük dangpungbo lah; awung achangbo she api yo ah.

⁵ Keto api yo, tümüde apinü ha thrün; tüsho api khahbonü alo akung kamkhitshih.

⁶ O arang, isanü kingaünanü tüsho mükhümanü; isanü Atungpuh isa Thrünrü miki khukninganü.

⁷ Tümüde api isa Thrünpuh, tüsho isa api rimlopung mihtsürü, tüsho api khah ching namfimihnubo ah. Khihni nüsanü api düsheak aniang:

⁸ “Nüsa mulong azhihkhi ching nangde, tüsho sunglo ching rükakikhi nimung nangde dümüküp,

⁹ küyimki nüsa bebuhrünü I rükakheahkhea; arünü I rhimo ngüa lalashe arünü I mütsana lu.

¹⁰ Tümüde kam yirü I ju lün lung mulong rozhakde alakheah, tüsho tha, ‘ Ha arü mulong ching rholode atsokhi mihtsürü, tüsho arünü I limrobo mümükheah.’

¹¹ Jumonü inü I mulong zhipzhip ching thiyuchihchim thsü, ‘ Arünü I sühakhim ching müyüzah.’ ”