MUNGSHIKHÜN 94 - AMÜSÜH HÜM CL Bible (BSI)

Thrünpuh Alala Mahkhaprü

¹ O Atungpuh , Thrünpuh shepünü royimcho, O Thrünpuh shepünü royimcho, tah-a yüshang.

² Asürang, O alomi mahkhapang; kükheangküyangrü thsümüchiang.

³ Atungpuh , mihbukmuyuk külokhüh laba, mihbukmuyuk külokhüh asühba?

⁴ Arünü lülüshishi yubo thakhitchoh; amütsü rhimorü alala akükheangnü milah.

⁵ Arünü nü mihtsürü adütre kamde yihnakchoh, O Atungpuh , tüsho nü yamrüplurüp thsümüchichoh.

⁶ Arünü khimoberü le jaksorü laksahchoh, tüsho buhrü mülarü khukshikchoh.

⁷ Tütüshe arünü thachoh, “Atungpuhnü müngü, yungsho Jakob Thrünpuhnü mümükheah.”

⁸ Anikhitang, nüsa mihtsürü bolung lümzülümdo mülarübo; tüsho nüsa mahkhaprübo, küyimki nüsa lümlung laba?

⁹ Shepünü nükhün thrünkheanü, apinü musoba de? Shepünü mük thrünkheanü, apinü müngüba de?

¹⁰ Shepünü trükshihbo khuhlanga huhchonü, shepünü mükheahmudu thsangyuchonü, apinü müthsülangba de?

¹¹ Mihtsürü lümkhi ju akeangkeang de Atungpuhnü mükheahlah.

¹² Mihtsürü shepü ki nünü khuhlanga huhchonü, O Atungpuh , tüsho nü yakzan chingnü thsangyuchonü müngühmühi;

¹³ junangde mihbukmuyuk thsungkheak alokhün mükiuyi khiungde küpkhuk nimungbo chingnü nünü api sühakhim jihbah.

¹⁴ Tümüde Atungpuhnü api mihtsürü yana mübah, yungsho api yamrüplurüp mübahyuk.

¹⁵ Tüshe mahkhapkhi ju thiyuro-lungki lim rholochoh, tüsho mulong ching lungkirü alalanü ju yanbah.

¹⁶ Amütsü rhimorü azhihde I thsungkheak shepü asürüba? Amülim rhimorü azhihde I thsungkheak shepü zhipba?

¹⁷ Atungpuh I rungrü müthsükhülaa, nahde I me zhikde kama labah.

¹⁸ “I jing lihchoh,” de inü thasho, O Atungpuh , nü amüthsümnü I tholochoh.

¹⁹ I lümthsünü mükhebinkhi ching, nünü ashukheamkhinü I me asühshihchoh.

²⁰ Amülimkhi kiulongthsü-binkiu, küpünü yakzan hode amütsü asahchonü, nü lung arihako laba de?

²¹ Arünü thiyuro-lungkirü rhangdung azhihde rukhüh mukhungchoh, tüsho amülim mülarü sheshihchoh.

²² Tüshe Atungpuh ju I chipi, tüsho Thrünpuh ju I tsoyukpung lungto lakheah.

²³ Apinü arü kheak arü nihbuh mülimkhi hankihdo, tüsho arü nihbuh mihbukmuyuk ching arü dükheakshihbah; Atungpuh isa Thrünpuhnü arü dükheakshihbah.