MUNGSHIKHÜN 9 - AMÜSÜH HÜM CL Bible (BSI)

Thiyuro dünkheak Makshe-jihkhi

¹ Inü I mulong athrünkhinü Atungpuh kilim makshe jihbah; inü amüyinsahbe rhimobo alala thabah.

² Inü nü lung asühbah tüsho asühachihbah, inü nü mung shide khün thsübah, O Khide Achang.

³ Küyimki I riri rholoba, arü angakbah tüsho nü miki dükheakbah.

⁴ Tümüde nünü I alim tüsho I dünkheak thsakhamjih; nü thiyuro ching mahkhapde kiulongthsü-binkiu kheak bin.

⁵ Nünü trükshihbo thürüh, nünü mihbukmuyuk thsümünim; nünü arü mung lün thsungkheak nankhita bah.

⁶ Thiriri ju lünnü athsümünim ching dükheakdo; nünü kiutobo rukkhitdo; arü lümrhihpü dükheakdo.

⁷ Atungpuhnü lünnü kiulongthsüchoh; apinü mahkhappü api kiulongthsü-binkiu thsakhamlah.

⁸ Apinü thiyuro-lungki ching alomiküp mahkhapbah; apinü thiyuronü mihtsürübo yakzan shuhbah.

⁹ Atungpuh ju junoa larü thsungkheak tsoyukpung, küpkhuk kim ching kurampung lah.

¹⁰ Tüsho sherünü nü mung mükheahlanü arünü nü kheak kinbah, tümüde, O Atungpuh , nü yimrü nünü mübahyuk.

¹¹ Zion ching lakhi Atungpuh mung shikhi khün thsang! Mihtsürü bolung api rhimobo thaang!

¹² Thsünüde alarü Thrünpuhnü lümkhitchoh; arünü azhikhi apinü mümih, tüsho arü ki amülim rhimorü apinü thsümüchichoh.

¹³ I ki müthsümang, O Atungpuh ! I riribonü I thsünüshihkhi kheahang! Ashe chingnü I khümkhitang, O Atungpuh ,

¹⁴ junangde Zion tsührübebo miki inü zhipbah nü mung shikhi thabah, tüsho nü akhümkhit ching asühachihbah.

¹⁵ Trükshihbo arünü akiukhi shingkung ching keamyuk; arü zheang ching arü phuhdo.

¹⁶ Atungpuhnü aküdah thsüde mükheahshih, apinü mahkhapdo; mihbukmuyukbo arü khahnü athsükhi qimürip ching phuh-a lah.

¹⁷ Mihbukmuyuk Ashe-lomi ching yübah, Thrünpuh bahyukrü trükshih alala.

¹⁸ Tümüde müthsümülarü kamruhroro mihamübah; zhochihrü mükkin thsükhi lünnü müdükheak.

¹⁹ Asürang, O Atungpuh , mihtsürünü nü dükukshih; trükshihbo nü miki mahkhapang!

²⁰ Arübo treshang, O Atungpuh ! Trükshihbonü arü ju mihtsürü ah de mükheahshang!